تەڤگەرا ئازادی د رۆژا 14/12/2023 دە، داخویانیەک دەربارێ ھلبژارتنێن ئەنجوومەنێن پارێزگەھێن ئیراقێ ب تایبەت پارێزگەھا کەرکووکێ دا، د ڤێ داخویانیا دوور و درێژ دە نە ب تەنێ تەڤگەرێ ب یەک پەیڤ ژی باسی کوردستانی بوونا کەرکووکێ نەکر، بەرەڤاژی هەتتا ناڤێ کوردستانێ ژی د داخویانیا خوە دە نەئانی و ئێریشی وێ پارتیێ کر یا کو کەرکووکێ ب کوردستانی دزانە و بەردەوام هەول ددە ڤێ پەرچەیا پیرۆز یا ژ لاشێ بریندارێ کوردستانێ ب ئیخانەتەک رەش هاتیە قوت کرن جارەکە دن ڤەگەرینە هەمبێزا ولات.
یا راست ئەڤ داخویانی ل سەر ناڤێ تەڤگەرێ هات دایین، داخویانی ب خوە ژ ئالیێ پەکەکێ ڤە هاتیە بەرهەڤکرن، تەڤگەر کو شاخا باشوور یا پەکەکێ یە د داخویانیا خوە دە ب قاسی ئێریشی پەدەکێ کری ئەوقاس ئێریشی داگیرکەرێن کەرکووکێ نەکر، لێ بانگا وێ یەکێ کر کو دەنگ ب وێ پارتیێ بدن یاکو کەرکووکا دلێ کوردستانێ ب دو دەستی تەسلیمی حەشدا شەعبی و دەولەتا داگیرکەرا ئیراقێ کری.
تەڤگەرا پەکەکێ گۆت؛ “ئەم وەکە تەڤگەرا ئازادیا جڤاکا کوردستانێ، ل گۆری نێرین و پارادیگمایا خوەیا کو درووشمەیا سەرەکە ئاشتی و ژیانا ھەڤبەشە، کەرکووک بەشەک ژ کووراھیا ستراتەژی، سیاسەت و رێخستنا مەیە و د ڤێ چارچۆڤەیێ دە ل گۆری خوەندنا مەیا ل سەر رەوشا نھایا کەرکووکێ ئەڤ باژار د بن مەترسیەکە نوو دەیە. خەتەک کو فاشیزما ئەتنیکی و ئۆلی ب دەستێ فاشیزما عەرەبیا ب پێشەنگیا ھنەک عەرەبێن سوننی تێ تەمسیلکرن و فاشیزما ترکمەنانیا ب پێشەنگیا ئەنیا ترکمەن، ھەروھا فاشیزما ئالیێ کوردیا ب پێشەنگیا پارتیا دەمۆکراتا کوردستانێ (پەدەکێ) کو رۆژەڤ و ئاژاندایا وێ ژ ئالیێ دەولەتا ترکیا داگیرکەر ڤە تێ ئامادەکرن، ھەیە. ئەڤ خەتێن خەتەرناک دخوازن کەرکووکێ بەر ب پارچەبوونا دیرۆکی، چاندی، سیاسی، ھوونەری و جڤاکی ڤە ببن. ھەروھا ب ھەزاران سالە نەتەوێن کەرکووکێ ب ھەڤ رە ژیان کرنە کو ئەڤ ژی بەشەک ژ پیرۆزیێن باژارێ کەرکووکێیە.”
لێ بنێرن دەما کەسەک یان رێخستنەک بێ شەرم و بێ حەیا دبە دکارە هەیا چ قاسی دوور ژ ئەخلاق بپەیڤە و بێئەخلاقیان بەلاڤ بکە، ل گۆر “تەڤگەرا ئازدی” پەدەکەیا شەر بۆ ڤەگەراندنا کەرکووکێ بۆ هەمبێزا کوردستانێ دکە پارتیەکە فاشیزمە و ب تەنێ تەمسیلا فاشیزما کوردی دکە، یەنەکەیا کو ب هەڤبەشی ب پەکەکێ رە د خیانەتا دیرۆکی یا 16ێ جووتمەها 2017 دە کەرکووکا دلێ کوردستانێ تەسلیمی داگیرکەران کری، پارتیەکە کو نوونەراتیا ھێز و ئیرادەیا وان دکە، پارتیەکە کو دەرفەتێ ددە وان ھەموویان کو د پێشەرۆژێ دە پرۆژەیێن خوە پێک بینن، بێی گۆمان ژی پرۆژەیێن وان ب تەنێ بندەستکرنا زێدەتر یا خاکا کوردستانێ و کۆلە کرنا زێدەتر یا کوردانە د بن سیاسەتا گەنی یا ب ناڤێ “براتیا گەلان” دە.
ب فاشیزم دانە ناساندنا پەدەکێ کو تەمسیلا کوردێن ولاتپارێز و ئازادیخواز و سەربەستیخواز دکە ئەڤ نە جارا یەکەمە، ئەڤ مەتۆد ژ سەرۆکێ وان یێ کو ژ ئالیێ میتێ ڤە هاتیە پەروەردەکرن ژ وان رە مایە، پەکەکە ب تەڤ رێخستن و رێخستنوکێن خوە ڤە ب تەنێ هەول ددە سۆزا سەرۆکێ وان ب میتێ دایی ژ بۆی پاراستنا ترکیێ و ئاسمیلەکرنا کوردان د ناڤا ولاتێن داگیرکەر دە ب جی بینە، ژ بۆی ئیسبات کرنا ڤێ یەکێ ژی ئەم نە پێدڤی ت ڤەکۆلینێن ب زەحمەتن، ب تەنێ ل بیرا خوە ئانینا ئاخافتنێن ئۆجالان یێن دەما د زیندانا ئیمرالیێ دە ژ نوونەرێ میتێ رە گۆتی، وەکە: «بارزانی خه‌ته‌ره، ئەوێ ل گەل ویلایەتێن یەکبوویی یێن ئەمەریکایێ دەولەتا کوردی دامەزرینە، لەوما ژی پێویسته ترکیە و پەکەکە ب ھەڤ رە ھەولێرێ دۆرپێچ بکن»، کافینە کو مرۆڤ بزانبە مەرەم و ستراتەژیا پەکەکێ و تەڤ رێخستنێن دن یێن د بن سەیوانا وێ دە کار دکن چییە، مرۆڤ ب دیتنا داخویانیێن ب ڤی ئاوا یێن تەڤگەرێ قەت شاش نامینە، ژ بەر کو ئەڤ داخویانی ب ئاوایەک راستە راست تەمسیلا پەکەکێ و سەرۆکێ وێ دکن.
یێن کو ژ بۆ ترکیایەکا دەمۆکراتیک، ژ بۆی خووشک و براتیا سەختە یا گەلان ب ھەزاران جوانێن کورد ب کوشتن ددن، یێن کو ژ ئالیەکێ هەول ددن شەنگالێ ژ کوردستانێ قوت بکن و ب پەرچەیەک ژ ئیراقێ دزانن، ژ ئالیێ دن ژی ناڤێ باکور رۆژهلاتێ سووریەیێ ل پەرچەیەک کوردستانێ دکن، یێن کو ب ناڤێ دەولەتبوونا کوردستانێ قەلس و هار دبن، یێن کو وەکە پرەکی کار دکن ژ بۆی دەرباسبوونا لەشکرێن داگیرکەرێن کوردستانێ، یێن کو دەستێن وان وەکە ئالێ وان یێ هەرمی ب خوینا کوردان سۆر بووینە نکارن شیرەتان ل کوردان بکن و ژ وان رە ببێژن کا دەنگ ب کێ بدن.
دبێژن کەسێ کو پەردێ بێ شەرمیێ ژ دەست دابە، ئێدی نەما تشتەک بمینە کو شەرمێ ژێ بکە، پەکەکە ژی وسایە، پەردەیێ شەرمێ ژ دەست دایە و ئێدی پەیڤا “شەرم” د فەرهانگا وێ دە ت واتەیەکە خوە تونەیە، لۆما ژی هەر بێ شەرمی و بێ حەیایەک ژ پەکەکێ و تەڤ رێخستنۆکێن دن یێن د بن سەیوانا وێ دە کار دکن تێ چاڤەرێکرن.
