سەرۆککۆمارێ ئیرانێ ل کرمانێ ئامەریکا و ئیسرایل ب دەستوەردانا د تەقینێن کرمانێ دە تۆمەتبار کرن و راگھاند کو پلانا ئامەریکایێ یا ئاڤاکرنا ئیسرایلەکە دن ل ھەرێمێ ژ ئالیێ قاسم سولەیمانی و ھێزێن بەرخوەدانێ ڤە ھاتیە پووچکرن.
سەرۆککۆمارێ ئیرانێ رەیسی د رێورەسما ڤەشارتنا کەسێن د تەقینا کرمانێ دە ھاتین کوشتن، بەحسا رۆلا فەرماندارێ بەرێ یێ سوپایا قودسا پاسدارێن ئیرانێ قاسم سولەیمانی د بھێزکرنا ئیرانێ ل ھەرێم و جیھانێ کر.
ئیبراھیم رەیسی دیار کر کو داعش ب دەستێ ئیسرایلێ ھاتیە ئاڤاکرن و گۆت: “رەژیما سەهیۆنیست دخوەست ب ناڤێ ئیسلامێ ل ھەرێما مە خیلافەتا ئیسلامی ئاڤا بکە، ل ور (فلستین) د بن ناڤێ جووهیاتیێ دە و ل ڤر ژی ب ناڤێ ئیسلامێ.
ل ئیراق و سووریەیێ دخوەست کو داعشا خوە وەکی خیلافەتەکە ئیسلامی ئاڤا بکە لێ سولەیمانی تەڤگەرەکە بەرخوەدانێ یا ھەرێمی ل دژی وان ئاڤا کر.”
سەرۆککۆمارێ ئیرانێ ئیبراھیم رەیسی د بەردەوامیا ئاخاڤتنا خوە دە گۆت: “پلانا ئامەریکایێ یا ئاڤاکرنا رەژیمەکە دن یا سەهیۆنیست ل ھەرێمێ ژ ئالیێ حاجی قاسم و ھێزێن بەرخوەدانێ ڤە ھات پووچکرن. حاجی قاسم سولەیمانی نەھشت ئەڤ پلانا ئامەریکیان ب سەر بکەڤە.
وی کارەکی مەزن کر، کین و نەفرەتا ئامەریکیان، رەژیما سەهیۆنیست و بریکارێن وان یێن ل ھەرێمێ ل ھەمبەری حاجی قاسم، ناڤێ وی، رێیا وی و زیارەتکارێن مەزارگەھا وی، سەدەما کریارێن تەرۆریستی یێن وانە.”
“ئیسرایلا دویەم” ئان ژی “ئیسرایلەکە دن” ئەڤ تێگەھ پشتی ریفراندووما 25 ئیلۆنا 2017 ل باشوورێ کوردستانێ زێدەتر تێ بکارئانین.
