سمکۆ عەبدولعەزیزی
ب شاشی فکرین دبە سەدەم كو کریارێن شاش په‌یدا ببن، ئه‌نجامداینا کارێن شاش ژی دبه سەدەم كو مرۆڤ ئه‌نجامێن شاش ب دەست بخە.
ئه‌نجامێن شاش ژیانا مرۆڤی ب خوە و دەردۆرێن مرۆڤی بەر ب تەنگاسیان دبە و هنده‌ك جاران ژی بەر ب نه‌مانێ ڤه دبە.
د رۆژا دامه‌زراندنا خوە دە هەیا نها پەکەکێ ب شاشى شرۆڤەیا مرۆڤێ كورد و پرسگرێکا كوردى كریه و وێ شروڤه‌كرنا شاش رۆژ ل پەی رۆژێ ره‌فتارێن نه‌باش ژ بۆی ملله‌تێ كورد و كوردستانێ ل هه‌ر چار پارچەیان ب ده‌ست ئانیە، ره‌فتارین نه‌باش یێن پەکەکێ بوونه سەدەم كو پەکەکە ئه‌نجامێن نه‌باش ب ده‌ست بینە و ملله‌تێ كورد ب کریزێن پڕ مه‌زن رە روو ب روو کریە و ده‌رباس بوون ژ ڤان کریزان ل هەر چار پارچەیان بەر ب کۆرەرێیێ چوویه.
ل ڤر پرسه‌ك سەر هل ددە، گەلۆ چه‌وا پەکەکێ شاش هزر كریه؟
ژ بۆی به‌رسڤا ڤێ پرسێ دكارم ب كورتاسی ب ڤی ئاوا هزرا خوە به‌رچاڤ بكم:
تێگه‌هێ پارتایەتیێ وه‌ك زانستێ سیاسی واتە ب كۆم هزر كرن و شرۆڤه‌كرن و دانانا به‌رنامه‌یان ژ بۆی گه‌هشتن ب ئارمانجان.
ده‌ما مرۆڤ دیرۆكا پەکەکێ دخوینە و كه‌سه‌كێ وه‌ك من كو ب سالان لگه‌ل وان كار كریه وه‌ك پراكتیك دبینە كو ئه‌ڤێ پارتیێ هه‌ر ل رۆژا دامه‌زراندێ هەیا نها ب ئاوایەکی ب كۆم هزر نه‌كریه و هەگەر جارنا ب كۆم هزر كربە ژی د ئه‌نجاما وێ هزركرنا ب كۆم كه‌سه‌ك هاتیه ب ناڤێ عەڤدللا ئۆجالان و ئه‌و هزرا ب كۆم ژناڤبریه و هزرا خوە ل سەر سه‌پاندیه.
ل ئه‌نقەرێ ل سالێن 1970 هەیا 1978 هەژمارەک كه‌سان ب كۆم هزر د دامه‌زراندنا پارتیه‌كێ دە كریه و ره‌شنڤێسه‌ك ژ بۆ په‌یره‌و و پرۆگرامێ وێ پارتیێ دانایه، لێ عەڤدللا ئۆجالان د سالا 1978 تێ ئامەدێ و بۆ دەمەکی ب تەنێ دمینە و د ڤێ دەمێ دە ئه‌و ب تەنا سه‌رێ خوە په‌یره‌و و پرۆگرامه‌كێ بۆ پارتیا كاركه‌ران ئامادە دکە و هەموو ره‌نجا چه‌ند سالان یا هه‌ڤالێن خوە پشت گوهـ دکە و دكارم ببێژم كو 5% ره‌شنڤیسا د جڤینێن ئه‌نقەرێ دە هاتیە پێشنیارکرن ناكه‌ڤه د ره‌شنڤیسا نوو دە.
د 27/11/1978 ل مالا سەیفەدین زورلو ل گوندێ فیسێ كو سه‌ر ب ئامەدێ یه ب ئاماده‌بوونا نێزیكى 20-22 كه‌سان یەکەمین كۆنگره‌یا پەکەکێ تێ لدارخستن. د ڤێ كۆنگرێ دە عەڤدللا خوە دكه هه‌ر تشت ب چه‌ندین ده‌مژمێران و ب تەنێ دئاخڤە، ئامادەبوویێن کۆنگرەیێ نەرینا خوە ده‌ربارێ ره‌شنڤیسا عەڤدللا ئۆجالان نڤێسا، لێ ئه‌نجامێن وێ دانوستاندنا د كۆنگره‌ى دە هاتیه كرن جهێ خوە د ره‌شنڤێسی دە نەکر.
یاكو ئەز دخوازم ببێژم ئەڤە، گەلۆ د پرۆگرامێ هاتیه په‌سندكرن دە، چه‌وا چاره‌سه‌ریا پرسگرێکا كوردى هاتیه به‌رچاڤ كرن ؟
ده‌ما مرۆڤ وى پرۆگرامى دخوینە ژ مرۆڤ رە دیار دبە كو چاره‌سه‌ریا پرسگرێکا كوردى ب تەنێ ل سه‌ر بنه‌مایێ سۆسیالیزما زانستى هاتیه به‌رچاڤكرن، لێ ئه‌ڤ نه سۆسیالیزما زانستى یا ماركس–لینینه، به‌لكو سۆسیالیزما ڤیه‌تنامێ یه.
ئاها ئه‌ڤه كاكلكا بابه‌تێ منه، ئه‌رێ پرسگرێکا كوردى پرسگرێکەکا نه‌ته‌وی یه یان پرسگرێکەکا چینایه‌تیه؟
سۆسیالیزم ب گشتی تێگه‌هه‌ك هزریه ژ بۆی چاره‌سه‌ریا تەخێن چڤاكى، نه‌ك چاره‌سه‌ریا ئاخێ و سەرخوەبوونا مرۆڤى و رێڤه‌به‌ریا خوسه‌ره.
پرسگرێکا كوردى ئه‌و نینه كو پشتى کورد سەربخوە دبن وێ چه‌وا خوە برێڤه ببن. پرسگرێکا كوردى ئه‌وه کو وێ چه‌وا ئاخا كوردان ژ دەستێ داگیرکەرێن کوردستانێ ئازاد بکی.
مرۆڤێ كورد ب تەڤ تەخێن خوە ڤه بن ده‌سته، ژبه‌ر وێ یەکێ پێویستە تەڤ تەخ و چین به‌شدار ببن د رزگاربوونێ دە، ئاخا كوردستانێ ئاخا هه‌موو تەخ و چینایە، نه ئاخا چینه‌كا تایبه‌ته.
د ڤر دە پەکەکە د بن سیبه‌را هزرا عەڤدللا ئۆجالان دە راستی شاشیه‌ك كۆژه‌ك هات، ژ بەر کو ئه‌و په‌یره‌وێ هاتیه دانان ژ بۆی رێڤەبرنا خه‌باتا پەکەکێ د بن سیبه‌را ب جی ئانینا تێگه‌هێ سۆسیالیزما زانستى دە هاتیه دارشتن.
واتە ب كورتاسى دبێژم كو پارتیا كاركه‌ران ژ روویێ ستراتەژى ڤە كه‌ته د شاشیێ دە و ژ روویێ ره‌فتارێ دە ژی كه‌ته د شاشیێ دە.
د بەشا دویەمین دە ئەزێ هەول بدم وان شاشیان بەرچاڤ بکم.
