ژ شەڤا بۆری ڤە مژارا ئالایێن کو ژ بەر سەردانا ئەردۆگان یا هەولێرێ ل کۆلانان هاتنە دانان د مەدیایا جڤاکی دا بوویە رۆژەڤا سەرەکی. هن کەس ل هەمبەری ئالایێن ترکان ب راستی ب هەستێن وەلاتپارێزیێ تەڤدگەرن. ئەو بەشەکێ بچووکه ژ وان یێن کو رەخنه‌یێ دکه‌ن. په‌كه‌كێ و دەردۆرا وێ ئەڤ مژاره كریه كه‌مپینه‌كا مەزن، ئەم ڤێ ژ وان یێن ب نیه‌ته‌كا باش ره‌خنه‌یێ دكه‌ن، جودا دكه‌ین، ژ بەر کو د ڤێ مژارێ دا هەلوەستا په‌كه‌كێ و ده‌ردوورا وێ ب تەنێ دوروویاتی، خیانه‌ت و دژمناتی یە. ئه‌و یێ هەول دده‌ن ڤێ مژارێ ژ بۆ كه‌مپینا خوە یا ل دژی بارزانی و په‌ده‌كێ ب کار بینن.
ئۆجالانی ل بەر چاڤێ رایەدارێن دەولەتا ترک چل لیتك هاڤێتن و گۆت: «ئەز دخوازم خزمەتکارێ دەولەتا (ترکیه‌یا) خوە بم، دایكا من ترکە، ده‌رفه‌تێ بده‌نه من کو ئەز شڤانێ جۆلەمێرگێ ژی فێری ترکیێ بکه‌م».
ئالایێن کو ژ بەر سەردانا ئەردۆگان هاتنە دانان، زێدەنە یان نه، جهێ نیقاشێ یە. هەرێما کوردستانێ کو ژ ئالیێ دەولەتێن کۆلۆنیالست یێن هەرێمی و هندەک رێخستنێن ب سەر ڤان دەولەتان ڤە هاتییە دۆرپێچکرن. ل رۆژهلاتا ناڤین هەڤسەنگیێن کو ناهێنه ئینکار کرن هەنە. ل رۆژهلاتا ناڤین تو نکاری ل گۆرا وێ یا تو ژێ حه‌ز دکه‌ی و ژێ حه‌ز ناکه‌ی سیاسەتێ و دیپلۆماسیه‌تێ بکه‌ی. پەیوەندیێن هەرێما کوردستانێ ل گەل ئیراق و ترکیێ د چارچۆڤەیا ڤێ ئەرکێ دا نە.
مژارا مەزنبوونا په‌یوه‌ندییان د شیان دا یه بهێته نیقاشکرن و شرۆڤەکرن. لێ داوی هێزا كو ڤێ شرۆڤێ بکەت په‌كه‌كەیە!. ژ بەر کو ستراتیژییا په‌كه‌كێ ترکبوونە. ژ سالا 2000ێ ڤه ئۆجالان و په‌كه‌كێ دەست داینه هەڤ ژبۆ كو کەمالیزمێ و ئالایێ ترکان ل کوردان خوەش بکه‌ن، ل ڤێرێ و وێراهه ژ میتۆلۆژی، سەربۆر و دیرۆکێ ژێگران بەرهەڤ دکه‌ن. ئەم ڤان هەموویان دانینه لایه‌كی، ڤیدیۆیێن دانپێدانێن ئۆجالان كو ل بەر چاڤێ رایەدارێن دەولەتا ترک «چل لیتكان» دهاڤێژیت و دبێژیت، «ئەز دخوازم خزمەتکارێ دەولەتا (ترکیه‌یا) خوە بم، دایكا من ترکە، ده‌رفه‌تێ بده‌نه من کو ئەز شڤانێ جۆلەمێرگێ ژی فێری ترکیێ بکه‌م».
ئەڤ په‌كه‌كە یا کو ژ بۆ ئاپۆی دچنه سوجدێ و ئەو ئاپۆیێ کو نه‌هاتیه سێدارەدان و هەمی نرخێن نەتەوه‌یا کورد فرۆتینه دەولەتا ترک، نکاریت ب دژبەرییا ئالایێ کو ل هەولێرێ هاتیه دانان ببیته وەلاتپارێز. خازۆكێن بەر دەرییێ دەولەتا ترک نکارن شەرەفا وەلاتپارێزییێ تەمسیل بکه‌ن.
په‌یوه‌ندیێن په‌ده‌كێ و باشوورێ کوردستانێ ل گه‌ل ترکیێ شەفافن و پێویستی ب ماسککرنێ نینە. لێ په‌كه‌كە نە وه‌سایە. عەڤدلا ئۆجالان ژ 15ێ سباتا 1999ێ هەتا نها ب دەهان هەڤدیتنێن ڤەشارتی ل گه‌ل رایەدارێن دەولەتا ترک ئه‌نجام داینه. رایەدارێن په‌كه‌كێ ل برۆکسل و ئەنقەرە، ئیمرالیێ ل گه‌ل رایەدارێن میتێ و ئاكه‌پێ یێن ترک ب دەهان هەڤدیتن کرینه. ل پشت پەردەیێن ڤەشارتی شەڤەکێ عەفرین رادەستی ئارتێشا ترک کر و ب کۆلانا خەندەکان هەموو باکوورێ کوردستانێ رادەستی دەولەتا ترک کر. ئۆجالان و رێخستنا وی ئالایێ کوردستانێ ئالایێ رەنگین ل هەر جهێ کو لێ چالاک بوو، شەوتاندن و قەدەغە کرن و ب تەڤلێبوونا تەڤگەرا کورد ل باکورێ کوردستانێ کرن دووڤەلۆکێ کەمالیزمێ. وێنەیێن ئاپۆی و ئاتاتورکی ب هەڤرا د هاتن بلند کرن. په‌كه‌كێ د میتینگێن باکوور دا ئالایێ ترکیێ ددا دەستێ جوانێن کورد. ئەو په‌كه‌كە یا کو د بن ته‌علیماتا دەولەتا ترک دا تەڤدگەریت، نکاریت بۆ چ کەسێ بەحسا وەلاتپارێزیێ بکەت. مەسەلە ئەو قاس زەلالە. له‌وما ژی ئەم دبێژین: «ئەوێ خەبەرا دبێژیتە دینێ من، دڤێت دەستپێکێ سەحکەتە دینێ خۆ».
چ سابوون نکارن خیانەتا په‌كه‌كێ پاقژ بکەن
رێڤەبەرێن په‌كه‌كێ بەسێ هۆزات و ئایتەن دێرسم ب سەرێ خوە دقیرن، «شەنگال نە کوردستانە!» و ل ئیراقێ ل سەر ملێ جوانێن کورد ئالایێ حه‌شدا شەعبی ددانن و وان دکه‌نه چەتەیێن شیعە یێن ئیراقێ و حه‌شدا شەعبی. ئەم قەبوول ناکه‌ین یێن کو ب ناڤێ رۆژنامەگەر و رەوشەنبیر خوە دده‌نه ناسین لێ یەک گۆتنێ ژی ل سه‌ر ڤێ خیانەتا په‌كه‌كێ نابێژن، پشتره ئالای ل هەولێرێ رەخنە دکه‌ن، ئەم ژی دبێژینه وان هوون سەختەکارن.
ئەم مەیدانێ بۆ سیاسەتا شەرێ تایبەت یێ په‌كه‌كێ و یه‌نه‌كێ ناهێلین. یه‌نه‌كه پارتیەکە کو کەرکووک ل بەر چاڤێ هەموو دنیایێ فرۆت، ئێجا دێ چه‌وا رابیت و شیرەتێن وەلاتپارێزیێ ل په‌ده‌كێ كه‌ت ! چ سابوون نکارن خیانەتا په‌كه‌كێ پاقژ بکەن.
یێن هەولێرێ رەخنە دکه‌ن، بلا ده‌ستپێكێ ل خوە بنێرن و حەدێ خوە بزانن. بلا هه‌ر كه‌سه‌ك ڤێ بزانیت كو « ب تنێ زه‌کاتا وەلاتپارێزییا بزاڤا بارزانی تێرا په‌كه‌كێ و ب دەهان تەڤگەرێن وەک په‌كه‌كێ دکەت كو وان ژی بكێشیته د خه‌تا وه‌لاتپارێزیێ دا».
