در. کەمال سلێمانی
ئەز گەلەکی ھەول ددم کو رەخنەیێن خوە یێن ل سەر پەکەکێ د ئاستەکێ مەدەنی و وەکە نیقاشەکێ دە بھێلم. لێ ئالیگرێن ڤێ پارتیا تۆتالیتار ژ بلی زمانێ سڤکاتیێ و تۆھمەتبارکرنێ نکارن ب چ زمانەک دن باخڤن. چاندا ئاپۆیی نە چاندا دیالۆگ و رەخنەیێ یە. چاندا ئێریش، تۆمەتبارکرن، سڤکاتی، خەبەرگۆتنێ و ترساندنێ یە. چ هزرەک کو بنگەھەکا وێ یا مەنتقی تونە بە، نکارە لگەل دژبەرێ خوە یێ رەوشەنبیری و سیاسی ب ئاوایەکی مەنتقی تەڤبگەرە. رێڤەبەرێن پەکەکێ ژی کو ب سالانە ب گەف و ئێریشان کاریبوون ھەگەمۆنیایا شەخس پەرەستیێ ل سەر ھندەک کوردان فەرز بکن، نکارن ژ ڤێ زیھنیەتا ترساندنێ دەرکەڤن. نزانن کو هزرکرنا سیاسی و نەرینا کوردان د دەربارێ سیاسەت کرنێ و رەفتارێن کوردان ل ھەمبەر تەقدیسا نە د جی دە یا پارتیان هاتیە گوهەرتن.
پشتی کورتە نڤیسەکێ ل سەر سلۆگانا “بێ سەرۆک ژیان نابە” بەردەوام ھندەک کەس ب ئالیگری کرنا پەکەکێ تم ب سڤکاتیێن سکسی، میت و ئیتیلاعات بوونێ من تومەتبار دکن. ئەشکەرەیە کو ئەگەر ئەز میت بامە، دا رێز و حورمەتا من گرن و گوھ دن گۆتنێن من. ئەڤ تاوانبارکرن تەنێ خوەلیسەری و دینبوونا ڤان کەسان و پارتیا وان رادگھینە. ژ بەر ڤێ یەکێ ژی دخوازن ب تاوانبارکرنێ رێ ل بەر فکر و رەخنەیێ بگرن. ژ ئالیێ دن ڤە ئەڤ یەک ب باندۆر بوون و گونجاویا ڤان جورەیێن رەخنەیان ل سەر وان نیشان ددە.
من گەلەک ھەول دا کو ھەستێن ئالیگرێن پەکەکێ ل بەر چاڤان بگرم و ھەتا کو ژ دەستێ من تێ وان نەێشینم و ب وان رە ئاستەکێ دیالۆگێ بهێلم. لێ، دەما پارتیەک ژ بۆ کەسەکی ببە جھێ عیبادەتێ و تو وی کەسی رەخنە بکی، ئیحتیمالا کو ھەستێن ئەندامێن وێ پارتیێ نەێشینن تونەیە. دەما پارتیەک کو بێ سەرۆک بوونێ ژیان و مرۆڤ و ھەبوونێ ب هیچ تشتەک بحەسبینە و تو بەرەڤاژی وی جیھانەک دن ببینی، ل هەمبەر هەڤ سەنگەر گرتن سەدی سەدە. دەما کو پارتیەکێ تەڤ تشت ژ بلی مافێ مرۆڤێ کورد ژ بۆی ب ئازادی ئاخافتن و رەخنە و ژیانا ئازاد پیرۆز کر؛ د ھەمان دەمێ دە باسی پیرۆزیا ژیان و ئازادیێ بکە، مینا وێ یەکێ یە کو د قادا ماینکری دە بمەشە و ھەر تەڤگەرەک کو دکە زرارێ ددە خوە و دەردۆرا خوە. رەوشا پەکەکێ یا نھا ئەڤە، هێزا زێدە و هزرکرنا کێم مینا فیلەکی د ناڤا هەرییێ دە یە.
پەکەکە دبێژە سەرۆکێ وێ پیرۆزە و بێیی سەرۆکێ پەکەکێ کوردان مافێ ژیانێ نینە و ھەر کەسێ کو سەرۆکێ پەکەکێ رەخنە بکە میتە. سەرۆکێ پەکەکێ ژی ژ بۆ پەسندانا میتێ پڕ تشت گۆتینە و چ جاران ژ پەسندانا میتێ بێزار نەبوویە. لێ نە پەکەکێ و نە ژی ئالیگرێن وێ چ پرسگرێک لگەل پەسندانا ئۆجالان یا ژ بۆی میتا ترک نینە.
ئۆجالان میتا ترک وەکە رزگارکەرێ کوردان ب ناڤ دکە، ئۆجالان د پرتووکا خوەیا ب ناڤێ رزگاریا دەمۆکراتیک دە (ل. 406) ب ئەشکەرە دبێژە کو میتا ترک کۆبانی رزگار کر. لێ بەلێ، دەما کو داعشێ ب ئالیکاریا دەولەتا ترک ئێریشی کۆبانێ کری، کۆبانێ ژ سێ ئالیان ڤە ھاتبوو دۆرپێچکرن. تەنێ دەریێ مورشدپنارێ مابوو (روویێ ترکیێ) کو دەولەتا ئەردۆگان و میتا ترک ب رێیا وی دەری ژی داعشی دشاندن سەر کۆبانێ و شەرڤانێن کورد. لێ ئۆجالان ئەشکەرە دبێژە کو میتا ترکیێ بوو کو کۆبانی رزگار کری.
ئەڤ یەک ژی تەڤی وێ یەکێ بوو کو بالافرێن هەڤپەیمانیا ناڤدەولەتی دەست ب بۆمبەبارانکرنا داعشێ کری و دەولەتا ترک نەچار کر کو قەبوول بکە کو ھێزێن پێشمەرگە ژ باشوور ب رێیا باکور بچە کۆبانێ و پشتگریا شەرڤانێن رۆژاڤا بکن. لێ بەلێ ئۆجالان روومەتا ئازادکرنا رۆژئاڤا نە ب شەرڤانێن رۆژئاڤا، نە ب پێشمەرگەیێن باشوور و نە ژی ب هەڤپەیمانیا ناڤدەولەتی نەدا. ل شوونا وێ، ئەو کوردان دەیندارێ میتێ دبینە، ئەو میتا کو داعش د رۆناھیا رۆژێ دە و ل بەر کامیرایێن تەلەڤزیۆنێن جیھانێ شاندبوو ژ بۆی روحا کوردێن رۆژئاڤا.
خوشک و برایێن من یێن کورد، گەر وە پرسگرێک لگەل رۆژەڤا میتێ یا ل دژی کوردان ھەبە، ژ ڤر دەست پێ بکن و ھەر تشتێ وەکە ڤێ ھوون د من دە دبینن تلا خوە د چاڤێن من رە بکن و من ب میت بوونێ تاوانبار بکن.
ھەڤۆکا دویەمین: “میتێ موداخەلەیا تایبەت کر. د راستیێ دە، وێ [میتێ] کۆبانی رزگار کر. پرتووکا رزگارییا دەمۆکراتیک 2015 ر.406
