Skip to contentدۆن كيشوتێ پەکەکێ
سمکۆ عەبدولعەزیزی
دۆن كیشوت كه‌ساتیه‌كە ئاشۆپیه د وێژه‌یا جیهانێ دە پر تێ بكار ئانین، ئەڤ ناڤ پرانی ژ وان كه‌سان رە تێ گۆتن یێن کو د ئاشۆپێ دە ژیان دکن، ئاشۆپا خوە وەکە راستیێ دبینن و هەول ددن ب کەلەجانەکە بهێز وێ ئاشۆپێ بەرچاڤ بکن و کەسێن دن ژی وێ ئاشۆپێ ب راستی و حەقیقەت ببینن.
موراد قارایلان د سالێن دەرباس بوویی دە و ب تایبەت پاش چوونا رێبەرێ وی بۆ ئیمرالیێ راستی نەخوەشیا دۆن کیشۆت بوویە و رۆهژ ب رۆژ کاراکتەرا دۆن کیشۆت بوونێ پێتر د کەساتیا وی دە خوە دیار دکە.
قارایلان د 29/6/2024 دە هەڤپەیڤینەک ب رادیۆ دەنگێ گەل یا پارتیا خوە رە ئەنجام دا، د ڤێ هەڤپەیڤینێ دە وسا خویا دبە کو یان موراد قارایلان وسا دفکرە کو د سالێن 70 دە ژیان دکە و هایا وی ژ پێشکەتنێن د ژیانێ دە چێبووین تونەیە، یانژی ناخوازە ڤان گوهەرین و پێشکەتنان قەبوول بکە کو هەنە.
د سالێن حەفتێیان دە مرۆڤ دکاری ب رێیا گۆتنێن مەزن بیسەران ب گۆتنێن خوە رازی بکە، مەبەست ژ ئاخافتنێن مەزن و قەبە ئەو پەیڤن یێن کو نە مەرجە ئەو پەیڤ راستی بن، بەلکو مەرج ئەڤە ب وان پەیڤان بکاری کارتێکرنێ ل سەر هشا کەسێ بیسەر بکی و ب ڤان پەیڤان وان بکی کۆلەیێن خوە.
مورادێ دۆن کیشۆت ژ بیر کریە کو نها سەردەم هاتیە گوهەرتن و ژیان پێشکەتیە و ب تایبەتی ژ ئالیێ تەکنەلۆجی ڤە گهشتیە وێ رادەیێ کو ژیریا دەستکرد هاتیە چێکرن، هەر تشتا کو تو بخوازی تو دکاری ب رێیا ژیریا دەستکرد د دەما چەند خۆلەکەکان دە ب دەنگ و رەنگ ڤە دروست بکی و وەکە راستیەک بێخی بەرچاڤێ خەلکێ، دڤێت مورادێ دۆن کیشۆت بزانبە خوە د شیان دە یە ب رێیا تەکنۆلۆژیایێ مەکابا پیێ وی تێ دە ژی دەنگ و رەنگێن وی ڤەگوهێزە.
مورادێ دۆن کیشۆت دبێژە “ژ ئەگەرا بەرفرەهبوونا بەشا ئیستیخباراتا ترکیێ، ئەڤ وەلات گهایە ئاستەکی کو هەر کارێ ئەو بخوازە دکارە بکە، ژ بەر کو د نها دە دەولەتا ترک دو جورەیێن ئیستیخباراتێ (ئیستیخباراتا دەروونی، ئیستیخباراتا ئەلکترۆنی) هەنە و د ڤێ داویێ دە ب رێیا ڤان جورەیێن ئیستیخباراتێ کارییە هندەک چالاکیێن مە یێن لەشکەری پووچ بکە و ب ڤێ یەکێ هەژمارەک ژ لەهنگان مە ژ دەست داینە، لۆما پێویست دکە ئەم گوهەرتنێ بێخن جورێ خەبات و تەکۆشینا خوە”، دەربارا ڤێ گۆتنا مورادێ دۆن کیشۆت ئەز دکارم ڤان گۆتنان ببێژم:
راستە، ترکیە ژ ئالیێ تەکنۆلۆژیایێ ڤە پڕ پێشکەتیە و ئەڤ پێشکەتنا تەکنۆلۆژی خستیە د خزمەتا لەشکەری دە.
بەری کو تو بخوازی گوهەرتنێ بێخی شێوازێ خەبات و تەکۆشینا گەریلایان، پێویست دکە تو ب خوە گوهەرینێ د زێهنیەتا خوە دە بکی و دوور بکەڤی ژ کەساتیا خوە یا دۆن کیشۆتی، مەبەستا من ئەڤە کو د گۆتنێن خوە دە راستیێ ببێژی، ژ بەر کو د ڤێ سەردەمێ دە راستی نایێ ڤەشارتن، هەر وەک کورد دبێژن، “رۆناهیا رۆژێ ب بێژینگێ نایێ ڤەسارتن”.
دزانم مەبەستا تە ژ گوهەرینا ئاوایێ خەبات و تەکۆشینێ چیە، مەبەستا تە ئەڤە کو ئیرۆ مینا بەرێ ئیران هاتیە مەیدانێ و هەموو ئالاڤێن خوە یێن پێشکەتی وەکە “درۆن، مووشەک و هتد” خستنە د خزمەتا وە دە.
مورادێ دۆن کیشۆت، گەلۆ تە پرسەک ژ خوە کریە کا چما ئیرانێ ئەڤ چەک خستنە د خزمەتا وە دە؟ گەر تو هەمان پرس ژ من بکی ئەزێ ب ڤی ئاوا بەرسڤا تە بدم، ئەزێ ژ تە رە ببێژم مەبەستا ئیرانێ ژ ڤی کاری ئەڤە:
– حکوومەتا هەرێما کوردستانێ لاواز بکە.
– هەست و هزرا نەتەوی یا کوردان بێخە د خەتەریێ دە.
– حکوومەتا هەرێمێ ب نەچاری بکەڤە د خزمەتا شیعەگەریێ دە.
– وە ل دژی ترکیەیێ بکار بینە هەیا کو هندەک دەستکەفتیان ب دەست بخە.
– هەرتم ژ ترکیەیێ رە ببێژە ئەز دکارم رەوشا تە تێک بدم.
– ئەز ب باوەرم مورادێ دۆن کیشۆت ئەڤ گۆتن ژ تە رە نە گۆتنێن نوو نە، ژ بەر کو تو دزانی نها تو یێ بوویە کاراکتەرەکی سەرەکە د پلانا ژ ئالیێ جەمیل بایک و ئیرانێ و ترکیەیێ ڤە هاتیە دانین ژ بۆی چەوانیا لاوازکرنا حکوومەتا هەرێما کوردستانێ.
– هەر وسا دزانم کو هوون یێن بوویە کۆلەیێن سەرۆکێ خوە، سەرۆکێ وە گۆتیە ترکیێ گەر هوون رێ ب من بدن ئەزێ ب لاوازکرنا ستاتویا هەرێما کوردستانێ خزمەتا دەولەتا خوە “ترکیەیێ” بکم.
