ھەڤسەرۆکاتیا کۆنسەیا رێڤەبەرا کۆما جڤاکێن کوردستانێ (کەجەکێ) تێکلداری ئێرشێن دەولەتا ترک ل سەر بنکە و بارەگەهێن پەکەکێ یێن د ناڤا هەرێما کوردستانێ دە داخویانیەک دا، د ڤێ داخویانیا خوە دە وەکە هەر جار ئێریشی سەر پەدەکێ و بارزانی کر، ئەڤ نە تشتەک نوو یە، ژ بەر کو کەجەکە-پەکەکە چ داخویانیەکێ نادە گەر پەدەکێ وەکە سەدەما شکەستنا خوە دەستنیشان نەکە، تشتا بالکێش د داخویانیا کەجەکێ دە ئەڤ بو کو ب ئاوایەکی نەراستەراست دانپێدان ب خیانەتا ل کورد و کوردستانێ و جاشاتیا خوە یا ژ بۆی دەولەتا داگیرکەرا ئیراقێ کر.
ئیرۆ رۆژا یەکشەمبی 7/7/2024 کەجەکێ داخویانیەک تێکلداری ئێریشێن دەولەتا ترکیێ ل سەر بنکە و بارەگەهێن پەکەکێ یێن د ناڤا باشوورێ کوردستانێ دە پارڤە کر، د ڤێ داخویانیا خوە دە جارەکە دن خوەست پەدەکێ وەک سەدەما شکەستنا خوە دەستنیشان بکە و بانگ ل بەرپرسێن حەشدا شەعبی یێن هەڤالبەندێن خوە د ناڤا حکوومەتا ئیراقێ دە ژی کر کو ل دژی ئێریشێن ترکیێ بسەکنن، ب ئاوایەکی دن مرۆڤ دکارە ببێژە کو کەجەکێ داخواز ژ حەشدا شەعبی کر ب هنجەتا هەبوونا ترکیێ ئەوژی بێن ناڤا خاکا هەرێما کوردستانێ دە.
تشتا هەری بالکێش د داخویانیا کەجەکێ دە ئەڤ بوو کو ب ت ئاوا باس ل “هەرێمێن پاراستنا مەدیا” نەکر، ژ بەر کو هەر دەر تەسلیمی ترکیێ کریە و ب بناڤکرنا ئێریشێن ل سەر باشوورێ کوردستانێ خوەست عاتیفەیا گەلێ باشوور موخاتەب وەرگرە و وان ل دژی ترکیێ هان بدە، لێ بەلێ ئێدی نەما گەلێ کورد باوەر ژ ڤێ سەناریۆیا پەکەکێ بکە، ئیدی گەلێ باشوور ب تایبەتی گەلێ کو ل دەڤەرێن نها شەر لێ دمەشە باش فێم کرنە، ئەڤ نە شەرە، بەلکو ئێریشەکە هەماهەنگ یا پەکەکێ و لەشکەرێ ترکیێ یە ژ بۆی داگیرکرنا باشوور، ئێدی گەلێ باشوور فێم کریە پەکەکە تەمسیلا خەتا خیانەتێ دکە.
کەجەکێ د داخویانیا خوە دە گۆت، “سەوقیاتا چەک و لەشکەران کو وەسایتێن زرخی ژی د ناڤ دە بوو، ژ رێیێن فەرمی و ئەشکەرە تێنە کرن، کو ئەڤ یەک ژی نیشان ددە کو لھەڤکرنەک ھەیە.” کەجەکێ خوەست ب ڤێ یەکێ پەدەکێ سووچبار بکە کو ب ترکیێ رە ل هەڤ کریە، لێ راستی بەرەڤاژی ڤێ یەکێ یە، گەر لهەڤکرنەک ژی هەبە ئەڤ لهەڤکرن د نێڤبەرا پەکەکێ و ترکیێ دە هەیە، سەوقیاتا چەک و لەشکەران کو وەساییتێن زرخی ژی د ناڤ دە نە تەڤ ل هەرێمێن کو پەکەکە ب “هەرێمێن پاراستنا مەدیا” بناڤ دکە رە هاتنە، ئەو د رێیێن بەرفرەهـ دە یێن کو لەشکەرێ ترکیێ د ناڤا بارەگەهێن سەرەکە یێن پەکەکێ ل “هەرێمێن پاراستنا مەدیا”رە دەرباس کرنە هاتنە و دەرباسی باشوور بوونە، پەکەکێ یەک گولـلە ژی نەبەردا وان.
د بەشەکا دن یا داخویانیا خوە دە کەجەکێ راگهاند، “تەڤگەرا مە ل ئیراقێ وەکە رێخستنا قەدەغەکری ھاتە راگھاندن کو ئەڤ ھەولدان، ڤێ راستیێ ب شێنبەری رادخە پێش چاڤان. نەخوە، تەڤگەرەکە کو ھەر تم ب دەولەت و گەلێ ئیراقێ رە د ناڤا تێکلیەکە دۆستانە و پشتەڤانیێ دەیە، چما ژ ئالیێ حکوومەتا ئیراقێ ڤە وەکە رێخستنا قەدەغەکری بێ راکرن؟” ئەڤ داخویانیا کەجەکێ پشتی وێ یەکێ تێ کو بەردەڤکێ وەزارەتا ناڤخوە یا ئیراقێ و شانه‌یا ئه‌وله‌هیێ میقداد میری رۆژا دوشەمبێ 1/7/2024 د كۆنفه‌رانسه‌كا رۆژنامه‌ڤانی ده گۆتی: «ئەو کەسێن کو ب تۆمەتا شەوتاندنا بازارێن هەولێر، دهۆک، كه‌ركووك و دەڤەرێن دن یێن هەرێما کوردستانێ هاتنە گرتن، ئەندامێن رێخستنا قەدەغەکری یا په‌كه‌كێ نه». ب ڤێ یەکێ ب ئاوایەکی نەراستەراست پەکەکێ دانپیدان ب خیانەتا خوە کر، دانپێدان ب ڤێ یەکێ کر کو تێکلیێن وێ یێن نهێنی ب یەک ژ دەولەتێن داگیرکەر و قرکەرێن کوردستانێ رە کو ئەو ژی ئیراقە هەیە، پێویست دکە گەلێ مە ژ پەکەکێ بپرسە، گەلۆ چما هوون ب دەولەت و گەلێ ئیراقێ رە د ناڤا تێکلیەکە دۆستانە و پشتەڤانیێ دەنە؟ ما قەی دەولەتا ئیراقێ ژی مینا دەولەتا ترکیێ نە دەولەتەکە داگیرکەر و قرکەرە؟ گەلۆ ما نە دەولەتا ئیراقێ بوو کورد ئەنفال، کیمیەباران، دەربەدەر و کۆمکوژ کری؟ ما قەی کارەساتێن دەولەتا ئیراقێ ب سەر گەلێ کورد ئانین هندکن؟
کەجەکێ هەر وەها پڕ ب روو قاییمی بانگ ل هونەرمەند و رەوشەنبیرێن کورد کر کو ل دژی پەدەکێ دەرکەڤن و راگهاند، ” ل ھۆلێ لھەڤنەکرنەک ناڤا کوردان یان ژی لھەڤنەکرنەک ناڤا رێخستنێن کوردان نینە. دڤێت نێزیکاتی و نرخاندنەکە ب ڤی رەنگی نەیێ نیشاندان. پەدەکە ب رەنگەکی ڤەکری بوویە پارچەیەک ژ سیاسەتا قرکرنا کوردان. پێویستە ھەر کەس ڤێ راستیێ ببینە و ل گۆری ڤێ یەکێ نێزیکاتیەکا راست نیشان بدە.” لێ بەلێ هەر کەس ڤێ حەقیقەتێ باش دزانە کو ئەڤ نە پەدەکە، بەلکو پەکەکەیە بوویە پارچەیەک ژ سیاسەتا قرکرنا کوردان، پەکەکێ هەم ب دەولەتا ترکیێ، هەم ئیراقێ و هەم ژی سووریێ و ئیرانێ رە تێکلیێن ڤەشارتی هەنە و بوویە دارێ د دەستێ ڤان دەولەتان دە ژ بۆ لێخستنا کوردان، پەکەکە تەمسیلا خەتا خیانەتێ ل هار چار پەرچەیێن کوردستانێ دکە، ئەڤ ژی د ڤێ داخویانیا کەجەکێ دە ب زەلالی خویا دبە. ئێریشێن پەکەکێ یێن ل سەر پەدەکێ و بارزانیان ب تەنێ ژ بۆی نوخماندنا ڤێ خیانتا خوە یە.
