دلۆڤان عەلی
-سیاسەتا تەسلیمکرنا چیا و گران
د چەند رۆژێن بۆری دە مەدیایا پەکەکێ ڤیدیۆیەک بەلاڤ کربوو کو تێ دە تێ دیتن کو لەشکەرێن ترکیێ ل دەردۆرا گوندێ کێستە یێ باشوورێ کوردستانێ دگەرن. ئەڤ ڤیدیۆ بوو سەدەما کارڤەدانێن مەزن، لێ ت کەسی ب تەمامی ناڤەرۆکا مەسەلێ راڤە نەکر و ھەر کەسی ب ئاوایەکی ب بێوژدانی حکوومەتا ھەرێما کوردستانێ تۆمەتبار کر. ھەر چقاس ئەڤ نە مژارەکە نوو بە و گەلەک جاران رەوشێن ب ڤی رەنگی روو دابە ژی لێبەلێ گاڤا کو پەکەکە دکەڤە د رەوشەکە خراب دە دخوازە ب ڤان دەرەوان بالا خەلکێ بکشینە و رایا گشتی ب ڤان مژاران بخاپینە.
پەکەکە ئەڤ 45 سالن باژار، گوند، چیا و گەلیێن کوردستانێ بێ شەر رادەستی داگیرکەران دکە. ل ھەر جھێ کو پەکەکە لێ ب جھ ببە، دەولەتا ترک بێیی کو گولـلەیەکێ بتەقینە وێ داگیر دکە. پەکەکە ب ڤێ ھەلوەستا خوە رۆلا پارێزڤانییا پەیمانێن سایکس-بیکۆ و لۆزانێ دگرە سەر خوە.
پەکەکە ب دلسۆزی ئەرکا خوەیا ل ھەمبەر خوەدیێن خوە ب جھ تینە، لێ یێن کو ھێ ژی دەرەوان ل وژدانا خوە دکن و چاڤێن خوە ژ راستیێ دگرن، ژ تەرۆریزما پەکەکێ ھێجەتان چێدکن.
لەشکەرێن ترک چاوا ھاتن کێستە؟
د سالا 2020 دە وەزارەتا پێشمەرگە ب فەرمی ژ پەکەکێ داخواز کر کو کێستە رادەستی ھێزێن پێشمەرگە بکە. ژ بەر کو کێستە ھەرێمەک ستراتەژیکە، ئەگەر پێشمەرگە نەچە وێ دەرێ دەولەتا ترک دێ داگیر بکە. لێ تەرۆریستێن پەکەکێ داخوازا وەزارەتا پێشمەرگە رەد کرن. وان گۆتن کو ئەو ھەرێمێن سینۆری یێن د بن کۆنترۆلا وان دە رادەستی ت کەسی ناکن و ئەو دێ خوە بپارێزن. ئەگەر پێشمەرگە بکەڤە ھەرێمێ دێ ئالۆزی دەرکەڤن.
سالەک شوون دە، د سالا 2021 دە دەما کو دەولەتا ترک دەست ب ئۆپەراسیۆنا پەنجە-کلید کری، تەرۆریستێن پەکەکێ گەلەک ھەرێمێن ستراتەژیک بێ شەر رادەستی دەولەتا ترک یا داگیرکەر کرن و ل ور گولـلەیەک ژی نەتەقاند. کێستە یەک ژ وان ھەرێمان بوو کو پەکەکێ بێ شەر رادەستی دەولەتا ترک کری.
پەکەکە ھەرێمێن نۆرمال تەسلیمی داگیرکەران ناکە. تەنێ جھێن گرینگێن لەشکەری و سینۆری یێن ستراتەژیک تەسلیم دکە. ھەلبەت پەکەکە ڤێ یەکێ ب پلانەکا قاییم دکە و ل گۆر تەعلییماتا ئەنقەرەیێ ھێزێن خوە دەرباسی ڤان ھەرێمان دکە.
د ڤان 5 سالێن داوی دە جھێن ستراتەژیکێن پەکەکێ لێ ب جھ ببوون (مەتینا، کورەژارۆ، بەرواری بالا، گرێ ئامێدی، بناڤی، کێستە) و ھەرێمێن دن، نھا د دەستێ دەولەتا ترک دە نە.
ترکیێ د سالا 2022 دە خوە ئامادە دکر کو ل چیایێ کورەژارۆ ئۆپەراسیۆنەکا لەشکەری پێک بینە، لێ رێڤەبەریا ھەرێما کوردستانێ رێ نەدا و گۆت کو چ ئەندامێن پەکەکێ ل ور نینن. پشتی دەمەکێ تەرۆریستێن پەکەکێ ھێزێن خوە برن کورەژارۆ و ل ور ب جھ کرن. سالا بۆری ئارتێشا ترکیێ بێیی کو گولـلەیەکێ بتەقینە چیایێ کورەژارۆ ژ دەستێ پەکەکێ وەرگرت. پەکەکێ ژ دەستپێکێ ڤە ھای ژ ڤێ پلانێ ھەبوو و دەما کو ترکیێ چ ھنجەت نەددیت کو بکەڤە ھەرێمێ، تەرۆریستێن پەکەکێ چوون کورەژارۆ و ترکیە کشاندن وێدەرێ. چیایێ کورەژارۆ ھەرێمەکە خوەدی گرینگیەکا ستراتەژیک و ئەردنیگارییە.
کەسێن کو حکوومەتا ھەرێما کوردستانێ ژ بوویەرا کێستە بەرپرسیار دبینن، لێکۆلین نەکرن کو بوویەر چیە و چما قەومییە. وان ئەڤ رەوش وەکە بەشەک ژ شەرێ مەدیایی یێ تەرۆریستێن پەکەکێ و تابوورا پێنجەمین یا دەولەتا ترک دە نرخاندن. تەڤی کو وان ژ ھەر کەسی چێتر دزانیبوو کو دەولەتا ترک ب ئالیکاریا پەکەکێ ل ھەر جھێ کو بخوازە دکارە داگیر بکە، ب ئاوایەکی بێشەرم ویژدانا خوە بفرۆشن.
یێن کو ڤێ کامپانیایا رەش ل دژی حکوومەتا ھەرێما کوردستانێ پێک تینن، ب کورتاسی گوھەرتۆیێن دووران کالکان و ھێلین ئوموتێن بێچەکن. ئەو و تەرۆریستێن قەندیلێ کنجێن ھەمان قووماشێ نە.
یێن کو ھین ژی راستیان ئینکار دکن و ژ پەکەکێ رە ھێجەتان چێدکن، دڤێت بەرسڤا ڤان پرسان بدن:
-کێ 4 ھەزار و 500 گوندێن باکورێ کوردستانێ رادەستی دەولەتا ترک کر؟
-کێ چیایێن جوودی، ئۆرەمار، گابار، فەراشین، ھەرکۆل، ئاگری، باگۆک، ئەنگیزەکێ، چیایێ رەشکێ، ماوا، باستا، ساسۆن و چیایێ جیلۆ رادەستی دەولەتا ترک کرن؟
-گرێ جاسووسان کو ھەرێما ھەری ستراتەژیکا قەندیلێ یە، کێ رادەستی ئیرانێ کر؟
-کێ چیایێ کورمانج، عەفرین و سەرێکانیێ رادەستی چەتەیێن دەولەتا ترک کرن؟
ل ڤر دڤێت ئەم جارەکا دن داخوویانییا سەکرەتەرێ گشتی یێ بەرێ یێ لژنەیا ئەولەھیا نەتەوەیی یا تورکیەیێ سەرلەشکەر تونجەر کلچ بینن بیرا خوە: “تێکۆشینا ل دژی پەکەکێ ژ بۆ مە نە ئەوقاس گرینگە، ژ بەر کو ئەم ل دژی پەکەکێ شەرەکی کۆنترۆلکری دمەشینن. یا ژ بۆ مە گرینگ، پێشیگرتنا دەولەتەکێ ل باشوورێ کوردستانێ یە. بارزانییێ کو دخوازە ڤێ ئارمانجێ پێک بینە دڤێت ئەم وی ل بەر چاڤێن کوردێن ترکییەیێ نەباش نیشان بدن، یا گرینگ ژ بۆ مە ئەڤە.” ئەڤ گۆتن ژ ھەموو پرسان رە بەرسڤا ھەری زەلالە.
-دیرۆکا پەیمانێن ئەولەھیێ یێن د ناڤبەرا ترکیێ و ئیراقێ دە
ب سالانە مەدیایا تەرۆریستێن پەکەکێ رایا گشتی دخاپینە و ب داخوویانیێن دەرەوێن د چاپەمەنیێ دا راستیان بەرۆڤاژی دکن. یێن کو خوە وەکە رۆژنامەڤان، سیاسەتمەدار و رەوشەنبیر پێناسە دکن، ڤێ دەرەوا پەکەکێ ب بازار دکن.
ل ڤر ئەزێ ھەول بدم کو پەیمانێن ئەولەھیێ یێن د ناڤبەرا ترکیێ و ئیراقێ دە ب سالان ھاتنە چێکرن و ئۆپەراسیۆنێن لەشکەری یێن ترکیێ ل سەر خاکا ئیراقێ بنڤیسم.
-د دەستپێکا سالا 1983 دە یەکەمین پەیمانا ناڤبەرا حکوومەتا ئیراقێ و ترکیێ د ناڤبەرا سەدام حوسەیین و کینان ئەڤرەن دە ھات ئیمزەکرن. ل گۆری وێ رێکەفتنێ، حکوومەتا ئیراقێ رێ ددە ئارتەشا ترکیێ کو ژ بۆ ئۆپەراسیۆنێن لەشکەری 10 کیلۆمەترەیان دەرباسی ناڤ ئاخا ئیراقێ ببە.
-د ئادارا 1983 دە پەیمانا ھەڤکاریا ئەولەکاریێ یا د ناڤبەرا ئیراق و ترکیێ هات ئیمزەکرن. ئیراق ڤێ جارێ رێ ددە ھێزێن ترکیێ کو 30 کیلۆمەتران دەرباسی ناڤ ئاخا ئیراقێ ببن و ئێرشی ناڤەندێن پەکەکێ ب تایبەت ل دەڤەرا لۆلانێ بکن.
-د سالا 1984 دە د ناڤبەرا وەزیرێ دەرڤەیێ ئیراقێ تارق عەزیز و وەزیرێ دەرڤەیێ ترکیێ واحد مەلح ھالەفۆگلو دە پەیمانەک دن ھات ئیمزەکرن. ل گۆر وێ رێکەفتنێ، ئارتێشا ترکیێ ب دەستوورا حکوومەتا ئیراقێ دێ د ناڤا 5 کیلۆمەتران دە ژ ئاخا ئیراقێ بارەگەھێن لەشکەری ئاڤا بکە.
-د سالا 1995 دە سەددام حوسێن پەیمانەک دن ئیمزە کر و رێ دا ھێزێن ترکیێ کو دەرباسی ناڤچەیێن سینۆری یێن باشوورێ کوردستانێ ببن و شەرێ پەکەکێ بکن.
-پشتی رووخاندنا رەژیما بەعس، ئەڤ پەیمان د سالا 2007 دە ب بەشداریا وەزیرێ ناڤخوە یێ ترکیێ بەشیر ئاتالای و وەزیرێ ناڤخوەیێ ئیراقێ جەواد بۆلانی ھاتن نووکرن. ترکیە ژ بۆ تێکۆشینا ل دژی تەرۆرێ ھەتا 30 کیلۆمەترەیان دکارە بکەڤە ناڤ ئاخا ئیراقێ.
-د سالا 2009 دە ب بەشداریا رەجەپ تەییب ئەردۆگان و نووری مالکی د ناڤبەرا حکوومەتا ترکیێ و ئیراقێ دە 49 پەیمانێن نوویێن ستراتەژیک و ئەولەھیێ ھاتن ئیمزەکرن.
“ب ئەردۆگان رە گەلەک مژارێن سیاسی ھاتن گۆتووبێژکرن، مژارێن ل سەر لھەڤکرن ژ نوو ڤە ھاتن تەئییدکرن. بەردەوامکرنا تێکۆشینا ل دژی تەرۆرێ، تێکۆشینا ل دژی تەرۆرا پەکەکەیێ، بەرماھیێن پارتیا بەعس و ھەموو رێخستنێن کو ئارامیا ھەرێمێ خەراب دکن.” داخویانیا ئۆفیسا سەرۆکوەزیرێ ئیراقێ یا وێ دەمێ یا تێکلداری ھەڤدیتنێ ئەڤە.
-د سالا 2024 دە ب بەشداریا رەجەب تەییب ئەردۆگان و محەمەد شیاع سوودانی د ناڤبەرا ترکیێ و ئیراقێ دە 26 پەیمانێن ئەولەکاری و ستراتەژیک یێن نوو دێ بێن ئیمزەکرن. ل گۆر وان رێکەفتنان ترکیە ژ بۆ شەرێ ل دژی تەرۆرێ و پاراستنا سینۆرێن خوە دێ بکارە دەرباسی ناڤ ئاخا ئیراقێ ببە و ژ بۆ ڤێ یەکێ ژی حکوومەتا ئیراقێ دێ ب ھەماھەنگی کار بکە.
چەند رۆژان بەرێ شێورمەندێ سەرۆکوەزیرێ ئیراقێ ئیبراھیم سومەیدی د داخویانیەکا فەرمی دە گۆت: ئۆپەراسیۆنێن لەشکەری یێن ترکیێ ب ھەماھەنگی لگەل حکوومەتا ئیراقێ تێنە کرن.
ئەڤ ھەموو پەیمانێن کو د ناڤبەرا ترکیێ و ئیراقێ دە ھاتنە ئیمزەکرن. دبە کو گەلەک پەیمانێن دن کو ب ئاوایەکی ڤەشارتی ھاتبن ئیمزەکرن، لێ ئەوێن ھانێ پەیمانێن ئەشکەرە و گشتی نە.
یێن کو دخوازن ب تاوانبارکرنا حکوومەتا ھەرێما کوردستانێ رێ ل بەر مەشرووعکرنا تەرۆرا تەرۆریستێن پەکەکێ یا ل دژی نەتەوەیا کورد ڤەکن، بلا جارەکە دن دیرۆکێ بخوینن و بەرچاڤکێن خوەیێن سەختە باڤێژن. ت کەس نکارە ھەتا داوی ب دەرەو و دەزەنفۆرماسیۆنێ مرۆڤان بخاپینە!
-سیاسەتا شەوتاندنێ ژ گوندان ھەتا بازاران
د 6 مەھێن بۆری دە ل ھەولێر، دوھۆک و کەرکووکێ 7 بازارێن مەزن ھاتن شەوتاندن. شەوتاندنا ڤان بازاران بوو سەدەما گەلەک نیقاشان. د دەما شەوتاندنا بازاران دە رێخستنا ب ناڤێ (عەهدی ملی) ب رێیا مالپەرەکا ب گومان بەرپرسیاریا شەوتاندنا ڤان بازاران گرتە ستوویێ خوە. لێ پشتی لێکۆلینا ل سەر ئایپی یێ ناڤنیشانا مالپەرێ دەرکەت ھۆلێ کو ئەو مالپەر ل باژارێ حەسەکێ یێ رۆژئاڤایێ کوردستانێ یە کو نھا د بن کۆنترۆلا پەکەکێ دەیە. یێن کو بازارا یەکیتیا نەتەوەیی دکن و پارێزڤانێن ب ماسکە یێن پەکەکێ نە، ب لەز و بەز ھەول دان کو ھنجەتان چێبکن و پەکەکێ سپی بکن.
د جڤینا چاپەمەنیێ یا ھەفتەیا بۆری یا ژ ئالیێ وەزارەتا ناڤخوە یا حکوومەتا ھەرێما کوردستانێ و حکوومەتا فەدەرالا ئیراقێ ڤە ھات لدارخستن دە، وان 3 کەس ب تۆھمەتا شەوتاندنا 7 بازارێن ھەولێر، دوھۆک و کەرکووکێ گرتن. ژ 3 کەسان 2 کەس خەباتکارێن دەزگەھێن ئەولەھیێ یێن یەنەکێ و یەک ژی ئەندامێ رێخستنا تەرۆریستی یا پەکەکێ بوو. ڤان کەسان د بن پێشەنگیا پەکەکێ دە ئەڤ چالاکی پێک ئانیبوون و ژ قەندیلێ فەرمان گرتبوون.
ھەر چەند ژ دەستپێکێ ڤە دیار بوو کو ئەڤ کارێ پەکەکێ یە، لێ داخویانیێن حکوومەتا ھەرێما کوردستانێ و حکوومەتا ئیراقێ دەرفەت نەھیشتن ت کەسی کو ڤان کریارێن تەرۆریستی رەوا بکن. بەریا جڤینا چاپەمەنیێ ل سەر ڤێ مژارێ ئاگاھیێن فەرمی ژ یەنەکێ رە ھاتبوون دایین. قوباد تالەبانی و چەتۆ سالح ژ حکوومەتا ئیراقێ رە گۆتبوون، ئەم رازی نە کو ناڤێن وان کەسێن کو بازار شەوتاندنە بێن ئەشکەرە کرن، ئەگەر ئەو ئەندامێن یەنەکێ بن ژی.
گەلەک راستیێن دن یێن دەربارێ ڤێ دۆزێ دە دێ د پێشەرۆژێ دە ئەشکەرە ببن. د دەربارێ ڤێ دۆزێ دە گەلەک کەس ھاتنە گرتن و دانپێدان کرنە. دەقێ دانپیدانێن بەرپرسێن سەرەکە یێن شەوتاندنا بازارێن کوردستانێ دێ د دەمەک نێزیک دە ب ئاوایەکی زندی وەرە وەشاندن.
کابینەیا نەھەمینا حکوومەتا ھەرێما کوردستانێ ژ دەما دەستبکاربوونا خوە ڤە گەلەک گاڤێن خوەش و وێرەک ئاڤێتنە. لێ بەلێ گەلەک کەس ل دژی وێ دەرکەتن و ھەول دان کو پێشی لێ بگرن. ب تایبەتی ژی ژ ئالیێ دژمنێن نەتەوا کورد و چەتەیێن وان.
چەتەیێن پەکەکێ د ڤان سالێن داوی دە ب ئاوایەکی سیستەماتیک ھەول ددن کو چاڤکانیا ئەکۆنۆمییا گەلێ کورد بکن ئارمانج. ژ تەقاندنا بۆریا پەترۆلا کوردستانێ بگرە ھەتا شەوتاندنا بازارێن ھەرێما کوردستانێ، پەکەکێ ب ئاوایەکی سیستەماتیک ھەول دایە ژێرخانا ئابۆری یا کوردستانێ تێک بدە. ژ کریارێن پەکەکێ ژ بلی تەرۆریزمێ تو تشتێ دن نایێ گۆتن. ژ بەر کو تەرۆریست ب ھەر ئاوایی ھەول ددن کو د پلانێن خوەیێن تەرۆریستی دە سەرکەفتنێ ب دەست بخن. پەکەکە د ڤێ چارچۆڤەیێ دە دخەبتە.
پەکەکێ د سالێن 1990 دە ل گوندێن باشوورێ کوردستانێ ب تایبەت بەھدینان گەلەک مال شەوتاندن. د سالا 1996 دە ل ھەرێما بارزان ئاگر بەردان مالەکێ و زارۆکەک 6 مەھی شەوتاند. تشتا کو پەکەکە دکە سیاسەتەک بەردەوامە. لێ ڤێ جارێ کریارێن وان یێن تەرۆریستی ژ گوند شەوتاندنێ دەرباسی شەوتاندنا باژار و بازاران بوویە.
شاشیا ھەری مەزنا رێڤەبەریا ھەرێما کوردستانێ ئەوە کو پەکەکە ب ئاوایەکی فەرمی و یاسایی نەخستە لیستەیا تەرۆرێ. دڤێت ئەڤ چەند سال بەرێ بھاتا کرن. دڤێت ئەم خەونا کلاسیکا کو ھندەک کەس دخوازن پەکەکێ ب یەکتیا نەتەوەیی وەک کورد نیشان ددن، بدن ئالیەکی. کریارێن پەکەکێ ژ یێن داعشێ نە جودا نە. پەکەکە بەردەوامیا داعشێ یە ل دژی ملەتێ کورد.
-رێخستنێن تەرۆریستێن چەپێن ترک ل چیایێن باشوورێ کوردستانێ چ دکن؟
رێخستنێن تەرۆریستێن چەپێن ترک ب سالانە ب ناڤێن جودا ل چیایێن باشوورێ کوردستانێ دژین. رێخستن ئەڤن: (MLKP, TKP-ML, DKP-BÖG, MKP, THKP-C, Navenda Devrimci, TIKKO).
بارەگەھێن ڤان رێخستنان ب تایبەتی ل چیایێ گارێ یێ باشوورێ کوردستانێ نە. وەکە باسکێ لەشکەری یێ ڤان رێخستنان ژ ئالیێ فەرماندارێن ھەپەگێ ڤە تێن پەروەردەکرن و چەک و پێدڤیێن لەشکەری ژ ھەپەگێ وەردگرن. دووران کالکان ژ ئالیێ سیاسی ڤە ژ پەروەردەکرنا خەباتکارێن ڤان رێخستنێن چەپ بەرپرسیارە. دوران چاڤدێریا خەباتێن وان یێن پەروەردە و سیاسی دکە. ھەر وھا د ڤان دەمێن داوی دە ھندەک بارەگەھێن خوە برنە شارباژێر، ئاسۆس، پێنجوێن و ماوەت یێن پارێزگەھا سلێمانیێ. ژ بەر ڤێ یەکێ ل ڤان ھەرێمان بێیستقراری دەرکەتیە ھۆلێ و ترکیە ھەر رۆژ ڤان ھەرێمان ب بالافرێن بێپیلۆت بۆمبەباران دکە. خەلکێ ڤان ھەرێمان ژ ڤێ رەوشێ نەرازی نە و زیانێن مەزن دخون. لێ ژ بەر کو نھا ھەماھەنگیا تەرۆریستێن پەکەکێ ب یەنەکێ رە باشە، یەنەکە ڤان تەڤگەران ژ نێز ڤە دشۆپینە و رێ ل بەر ھەبوونا تەرۆریستێن پەکەکێ و تەرۆریستێن چەپێن ترکیێ ل ڤان ھەرێمان ڤەدکە. ژ بەر ڤێ یەکێ ژی گەل تەرجیح دکە کو بێدەنگ بمینە.
ئەڤ رێخستن ل ڤان ھەرێمان د بن سیا تەرۆریستێن پەکەکێ دە تەڤدگەرن و ب رێیا لەشکەری و چاپەمەنیێ رێڤەبەریا ھەرێما کوردستانێ دکن ئارمانج.
ل رۆژئاڤایێ کوردستانێ ژی ھێزێن لەشکەری یێن ڤان رێخستنان ھەنە و ل گەل ھێزێن پەکەکێ/یەپەگێ زلمێ ل کوردێن رۆژئاڤا دکن.
رێخستنێن چەپێن ترک، زارۆکێن کەمالیزمێ، د سیاسەت و مانیفەستۆیێن خوە دە ل دژی نەتەوەپەرەستیا کورد و ھەر ھەولدانا ئاڤاکرنا کوردستانەکا سەربخوە نە. ھەبوونا وان ل ڤان ھەرێمان د چارچۆڤەیا پلانا خێزکرنا نەخشەیا سینۆرا میساقا ملی دەیە، کو ئەڤە خەونەکا دێرینا دەولەتا ترکە.
2 سال بەرێ ل ناڤچەیا شارباژێرا سلێمانیێ ئیبراھیم چیچەک کو یەک ژ بەرپرسێن پایەبلندێن رێخستنا تەرۆریستی یا مەلەکەپێ یە، د ئەنجاما ئێریشا بالافرێن بێپیلۆتێ ترکیێ دە ھات کوشتن.
دەولەتا ترک ھەر رۆژ سڤیل و گوندێن باشوورێ کوردستانێ دکە ئارمانج و ھەبوونا ڤان تەرۆریستان ژ خوە رە دکە ھنجەت. یێن کو ئیدیعایا یەکیتیا نەتەوەیی یا دەرەوین دکن دکارن بەرسڤا ڤان پرسان بدن:
-چەپێن ترک ل چیایێن باشوورێ کوردستانێ چ دکن؟
-کی رێ ل بەر ڤان تەرۆریستان ڤەدکە کو ل ور ب جھ ببن و دەولەتا ترک بکشینە باشوورێ کوردستانێ؟
-گەلۆ قادا چالاکیا رێخستنێن چەپێن ترکێن ل دژی کوردان، چیایێن ترکیەیێ نە یان چیایێن کوردستانێ؟
دەمەکێ ئەڤ چیا و گەلی بوون جھێ چیرۆکێن قەھرەمانیا ھێزێن پێشمەرگە و نەتەوا کوردێ قەھرەمان. ب دەھان لاوێن لەھەنگێن ڤی گەلی ل ڤان چیا و نەوالان شەھید بوون و جانێ خوە فەدا کرن ژ بۆ ئازادیا کوردستانێ. لێ ئیرۆ ب سایا تەرۆریستێن پەکەکێ چەپێن ترک ل چیایێن کوردستانێ بارەگەھێن خوە ئاڤا دکن و دبن سەدەما مالوێرانیا نەتەوا کورد.
نێرینێن کو د گۆتارێ دە ھاتنە گۆتن عایدی نڤیسکارن و دبە کو ل گۆری پۆلیتیکایا وەشانێ یا دارکا مازی نەبن.
