رێخستنا هیۆمان رایتس ووچ دبێژە، ترکیە ب پێشوازیکرنا محەمەد جاسم (ئەبوو عەمشە) و سەیف ئەبووبەکر، پشتگری ددە کۆمێن سووری یێن تاوانێن گران کرنە.
هیۆمان رایتس د راپۆرتەکێ دە راگهاند، «د وێنەیێن کو ل مەدیایا جڤاکی هاتنە بەلاڤکرن دە، سەرۆکێ مه‌هه‌پێ دەڤلەت باهچەلی کو هەڤپەیمانێ سەرەکە یێ حکوومەتا ترکیەیێ یە و سەرۆکێ مافیایێ عه‌لائه‌ددین جاکج ب گەرمی پێشوازی ل دو سەرکردەیێن ئارتێشا نشتیمانی یا سووریەیێ، محەمەد جاسم و سەیف ئەبووبەکر کرنە، ئەو هەر دو کەس ژی ب کرنا تاوانان ل سووریەیێ تێن تاوانبارکرن و د لیستەیا جەزایێن ئامەریکایێ دەنە».
هه‌ر وها دبێژە: «محەمەد جاسم و سەیف ئەبووبەکر گەلەک بنپێکرن ل دژی خەلکێ کرنە، وەک رەڤاندن، ئەشکەنجەکرن، دەستدرێژیا سەکسی و دەستدانینا سەر مال و ملکێن خەلکێ».
هیۆمان رایتس دا زانین: «وێنەیێن مەدیایێ یێن ب ڤی رەنگی نیشان ددن کو ترکیە نە تەنێ ڤان بنپێکرنان چارەسەر ناکە، د هەمان دەمێ دە پێشوازی ل بەرپرسیاران دکە و وان هان ددە».
هەروها گۆت: «گرێدانا باهچەلی ب وان هەر دو سەرکردەیێن کۆمێن چەکدار رە، هەولێن ژ بۆ حەسابپرسینا وان تێک ددە و ئەرێکرنا فەرمی یا نەپەنی و رازیبوونا ژ کریارێن وان رە نیشان ددە».
ئەڤ رێخستنا چاڤدێریا مافێن مرۆڤان تەکەز دکە: «مێڤانپەروەریا ئەشکەرە یا کو ل ترکیەیێ ژ ڤان هەر دو کەسان رە هاتیە کرن، ل دژی بەرپرسیاریێن ترکیەیێ یێن وەکی هێزەکە داگیرکەرە و پشتگوهکرنا ئاشکەرە ل هەمبەر بەرپرسیاری، دادمەندی و ئارامیا پێشەرۆژا ل هەرێمێ نیشان ددە».
محەمەد جاسم «ئەبوو عەمشە» سەرۆکێ میلیشیایا «سولتان سلێمان شاهـ»ە و سەیف ئەبووبەکر سەرکردەیێ گرووپا «ئەل-حەمزات»ە و ل گۆر چالاکڤانێن عەفرینێ، وان هەر دویان ژ دەما داگیرکرنا عەفرینێ ڤە ب سەدان وەلاتیێن کورد رەڤاندنە و باجێن گران ل گوندیان سەپاندنە و دەستێ وی د کوشتنا جیگرێ سەرۆکێ ئەنجوومەنا خوەجهییێ شیێ ئەحمەد شێخۆ و گەلەک کەسێن دن دە هەیە.
وەزارەتا خەزینەیێ یا ئامەریکایێ د تەباخا 2023ان دە، جەزا ل سەر محەمەد جاسم (ئەبوو عەمشێ) و سەیف ئەبووبەکر راگهاندبوون و ئەو وەک ب بنپێکرنێن مافێن مرۆڤان تاوانبار کربوون.
