سمکۆ عەبدولعەزیزی
دەمەکە درێژە چاپەمەنیا پەکەکێ کار ل سەر وێ یەکێ دکە کو ووسا نیشان بدە گەلێ باشوور بێ دەنگ و بێ هەلوەستە ل هەمبەر پەڤچوونێن د ناڤبەرا پەکەکێ و لەشکەرێ ترکیێ دە یێن ل باشوورێ کوردستانێ، دقەومن.
گەلۆ ب راستی ژی گەلێ باشوور بێ دەنگ و بێ هەلوەستە ل هەمبەر ڤان پەڤچوونان؟ ت راستیەک بۆ ڤێ پرپاگەندایا چاپەمەنیا پەکەکێ تونەیە، بەرەڤاژی گۆتنێن پەکەکێ، گەلێ باشوور ب هەموو تەخ و چینێن خوە ڤە ب دەنگەک بلند ژ هەر دو ئالیان رە دبێژە، شەرێ خوە یێ سەختە دەرباسی باکورێ کوردستانێ بکن، ب دەنگەک بلند ژ پەکەکێ و چەکدارێن وێ رە دبێژە ت پێویستیا باشوور ب هەبوونا چەکدارێن وە ل ڤڕ تونەیە، پڕ ب زەلالی و ئەشکەرە دبێژە، مە باشوورێ کوردستانێ ب خوینا هەزاران شەهیدان ئازاد کریە، ب ئاوایەکی شارستانی و دەمۆکراسی مە پارلەمەنتۆ و حکوومەتا خوە هلبژارتیە، ئەڤ سازیێن مە یێن فەرمی ل سەر ئاستا جیهانێ تێن ناسکرن، ئەم فێم ناکن پەکەکە ل سەر چ ئەساس هاتیە و ل باشوورێ کوردستانێ ل شوونا حکوومەتا هەرێما کوردستانێ و پارلەمەنتۆیا وێ کۆمارا زاپێ، هەرێمێن پاراستنا مەدیا، کەجەکە و هتد دامەزراندنە؟!
گەلێ باشوور ب دەنگەک هەری بلند دبێژە، پێشمەرگەیێن مە چیا و دەشت و نەهال و باژار و باژارۆکێن باشوورێ کوردستانێ ئازاد کرن، نها ب ئاوایەکی فەرمی مە وەزارەتا پێشەرگە، وەزارەتا ناڤخوە و سازیێن ئەولەهیێ هەنە، لێ هوون هاتنە و جارەکە دن ئەڤ هەرێمێن ئازادکری وەکە هەرێم شەر راگەهاندنە، گەلۆ قەی هوون نزانن کو ئەڤ هەرێم سالا 1991 هاتنە ئازادکرن و حکوومەتا کوردی ب هەموو هێزا خوە جارەکە دن ژیان ڤەگەراندیە ڤان هەرێمان.
ئانکو ب کورتاسی، تەڤ گەلێ باشوور ل دژی هەبوونا لەشکەرێ ترکیێ و چەکدارێن وەنە د ناڤا خاکا باشوورێ کوردستانێ، گەلێ باشوور ب قاسی کو ل دژی هەبوونا لەشکەرێ ترکیەیێ یە د ناڤا باشوور دە، ئەوقاس ژی ل دژی هەبوونا چەکدارێن وە یە د ناڤا باشوور دە، ژ بەر کو هوون وەکە پرەکێ تەڤ دگەرن ژ بۆی دەرباسکرنا لەشکەرێ ترکیێ بۆ ناڤا کووراهیا باشوور.
گەلێ باشوور باش دزانە ترکیە یەک ژ دەولەتێن داگیرکەرێن کوردستانێ یە و ت جار ب باشوور رە نابە دۆست و گەر بکاریبایە هەر د سالێن 90 ژ چەرخێ رابۆری رێ ب ئاڤاکرنا ستاتویا هەرێما کوردستانێ نەددا، ژ بۆی ڤێ مەبەستێ دخەبتی ژی، لێ کار و خەباتێن حکوومەتا هەرێما کوردستانێ تەڤ پلانێن داگیرکەران ژ ناڤ برن و کاری باشوور بەر ب ئارامیێ ڤە ببە، ب ئاوایەکی کو نە ب تەنێ ژ گەلێ باشوور رە، بەلکو ژ کوردێن هەر چار پارچەیان رە بوو جیهێ ڤەحەواندن و پاراستنێ.
هەر وەها گەلێ باشوور ل دژی هەبوونا چەکدارێن وەیە ژی، ژ بەر کو وە و چەکدارێن خوە هەیانی نها ت فێدە نەگهاندیە باشوورێ کوردستانێ، گەر هوون دخوازن جیهەکێ ئازاد بکن ژی هەرن جیهەکی داگیرکری، هەرن رۆژهەلات، هەرن باکور. مەتینا، ئاڤاشین، حەفتەنین، گارە، خاخورک و هتد ل باشوور د سالا 1991 دە هاتنە رزگارکرن و پیویستی ب هەبوونا وە ل ور تونە، هەر ژ دەما هاتنا وە ژ بۆی باشوورێ کوردستانێ هەیانی نها هوون یێن بوویە سەدەما نەئارامیا باشوور، ئەڤ نەئارامیە گهایە وێ ئاستی کو ئیرۆ لەشکەرێ ترکیەیێ دەرباسی تەڤ جیهێن ستراتەژی یێن باشوورێ کوردستانێ بوویە و قەرەقۆلێن خوە د ناڤا باشوور دە ئاڤاکرنە، و ت کەس نزانە وێ د دەمێن پێش مە دە ت پرسگرێکێن مەزن ب سەدەما هەبوونا وان ژ باشوور رە چێببن.
پرسا داوی ژ رێڤەبەریا پەکەکێ رە وێ ئەڤ بە، گەلۆ دەستکەفتیێن وە ژ بۆی باشوورێ کوردستانێ چ نە، ژ غەینی زرارێن ماددی و مەعنەوی و جانی وە چ فێدە گەهاندیە باشوور؟ ئەڤ پرسەکە کو پێویست دکە رێڤەبەریا پەکەکێ د دادگەها دیرۆکێ دە بەرسڤ بدە.
