تاو تاو

• سمکۆ عەبدولعەزیزی

پەکەکێ ئەوقاس بیرەوەری هەنە کو گەر ب درێژاهیا رۆژێن سالێ بیرەوریێن وێ بێن ساخکرن وێ سال ب داوی وەرە و بیرەوەریێن وێ ب داوی نابن.

پێش دو رۆژان سالڤەگەرا 40 سالیا خەباتا چەکداری یا پەکەکێ بوو، 40 سال ل سەر خەباتا چەکداری یا ڤێ پارتیێ دبۆرن، لێ بەلێ هەیانی نها نەکاریە 40 مەتران ژ ئاخا کوردستانێ ئازاد بکە، 40 سال دەرباس بوون و نها چیا و دەشت و نەهالێن باکورێ کوردستانێ کو پێش نها د دەستێن پەکەکێ دە بوون نها بوونە جیهێن تۆریزمێ ژ دەولەتا ترک رە، پێش 40 سالان لەشکەرێ ترکیەیێ ب حەسرەت ل چیایێن کوردستانێ دنێری و مەراق دکر بزانبن ژیان د ڤان چیایان دە چەوایە، لێ نها پشتی 40 سالان ژ خەباتا چەکداری یا پەکەکێ ئەڤ چیا بوونە جیهێن لیستکێن سەر بەرفێ و تۆریزمێ، هەر وەها بوونە جیهێن ڤەحەواندنا کارگەهێن پیشەسازی ژ دەولەتا ترک رە، ب ئاوایەکی کو نها چەکدارێن پەکەکە ژ دوور ڤە ل ڤان دەڤەران دنێرە و نکارە ب دۆربینەیێ ژی ڤان هەرێمان ببینە.

پاش 40 سالێن خەباتا چەکداری کو ب هەزاران وەلاتپارێز بوون جانگۆریێن کوردستانێ و ب هەزاران کەس ژی بوون پەککەفتی، ت مالباتەکە باکور نەما کو کەسەکی وان وەکە زندانیێ سیاسی نەیێ زندانکرن، ب ملیۆنان کەس کۆچبەری باژارێن ترکیەیێ بوون و نها جوانێن کورد کارێ گارسۆنیێ د خوارنگەهێن مەترۆپۆلێن ترکیەیێ دکن، ئەڤ یەک د ئاستەکی دە یە کو گەر یەک پەیڤا کوردی ژی نەزانبی و تو هەری خوارنگەهەکی ل هەر باژارێ ترکیەیێ وێ ت پرسگرێکەک ژ تە رە نەدەرکەڤە ژ بەر کو یێن د رەستۆرانتان دە دخەبتن تەڤ کوردن، ئەڤ ژی پشتی 40 سالان ژ خەباتا چەکداری یا پەکەکێ!

پاش ڤان دەردەسەریێن کوردان پشتی 40 سالان ژ خەباتا چەکداری یا پەکەکێ تەجرووبە کری ژ نوو دە دۆن کیشۆتێ پەکەکێ “مورات کارایلان” تێ و دبێژە، “درۆشما مە ژ بۆی قۆناغا بێ وێ ئەڤ بە، ‘تاو تاو بژی سەرۆک ئاپۆ'”، ئانکو پەکەکێ کورد ژ درۆشما یان کوردستان یان نەمان ئانینە رەوشەکی کو ببێژن بژی سەرۆک ئاپۆ، درۆشما بەرخوەدان ژیانە ژ بۆی “تاو تاو” وەرە گوهەرتن، درۆشما سەرخوەبوونا کوردستانێ مافەکی خوەزاییە، وەرە گوهەرتن بۆ دەمۆکراسیکرنا ترکیەیێ ژ ئالیێ پەکەکێ ڤە وەکە وەلاتپارێزی تێ دەستگرتن، لێ جڤینێن سیاسی یێن پارتیێن کورد ب دەولەتا ترکیەیێ رە وەکە بێ نامووسی ب ناڤ دکن، گەلۆ ب راستی ژی کی بێ نامووسە؟ یێن کو تەڤ باکور و بەشەک ژ باشوور و رۆژئاڤا رادەستی دەولەتا ترک کری بێ نامووس و خایینن یان ژی یێن جڤینێن سیاسی ب دەولەتا ترک رە دکن؟

 دۆن کیشۆتێ پەکەکێ د داخویانیا خوە دە دبێژە، سەرهلدانا سالا 1991ان ل باشوورێ کوردستانێ چێبووی ژ ئەنجاما خەباتا گەریلا بوو، دەما من ئەڤ ئاخافتنا کارایلان بهیستی ب راستی ژی ئەز ماتمایی مام، گهیشتم وێ باوەریێ کو یان دۆن کیشۆتێ پەکەکێ راستی نەخوەشیا ئالزەهایمەر بوویە یان ژی گەلێ کورد ب نەزان دزانە و حەنەکا ب مە دکە، ژ بەر کو هەر کەس دزانە پێش سەرهلدانا 1991ان یا باشوورێ کوردستانێ زیدەتر ژ 10 پارتیێن چەکدار یێن کورد د بن ناڤێ بەرەی کوردستانێ دە خەبات دکر و پرانیا چیایێن باشوورێ کوردستانێ د بن دەستهلاتا وان دە بوو و ب هەرێمێن ئازادکری دهاتن ناسکرن، لێ دۆن کیشۆتێ پەکەکێ ئەڤ یەک ژ بیر کریە و دخوازە ب گوهەرتنا دیرۆکێ هەر تشتی بکە پارا خوە.

 گەلۆ تە ژ بیر کریە “ئدریس بارزانی” بوو کە رێ ب وە دایی بهێن باشوورێ کوردستانێ و ل ور ئامادەکاریێن خوە بکن و دیسا ڤەگەرن باکور؟ دەما هوون د وان سالان دە دەرباسی باشوور بووی خوە وە نەدزانی شۆتکا خوە گرێ بدن، پێشمەرگەیان هوون فێر کرن، پێخستنا ئاگر، پەروەردەیا لەشکری تەڤ پێشمەرگەیان نیشانی وە دان، د یەکەم شەرێ وە یێ ل دژی سوپایێ ترکیەیێ دە ژی پرانا بەشداربوویان پێشمەرگە بوون و مل ب ملێ وە ل دژی ترکیەیێ شەر کر.

ل داویێ ژ کارایلان رە دبێژم، گەر هوون و کۆنسەیا خوە راستی ئێشا بیرچوونێ بوونە، ئەڤ نایێ وێ واتەیێ کو کوردێن باشوور ژی راستی ڤێ نەخوەشیێ هاتنە، گەلێ باشوور ژ بیر نەکریە، دەما د سالا 1988 دە هاتین ئەنفالکرن، دەما کۆجا ملیۆنی یا سالا 1991ان، چەکدارێن پەکەکێ ل شوونا وەرن و ئالیکاریا گەل بکن، خالێن کۆنترۆلێ دانین و چەکێن گەلێ باشوور ژ وان ستەندن.