سمکۆ عەبدولعەزیزی
دۆن کیشۆتێ پەکەکێ، موراد کارایلان د بەشەکە دن ئا داخویانیا خوە یا ب مناسبەتا 40ەمین سالڤەگەرا شەرێ چەکداری یێ پارتیا خوە ل دژی دەولەتا ترکیەیێ دە، ژ نشکاڤە دخوازە خوە وەکە رەوشەنبیرەک بدە ناسکرن و دبێژە، ” ژ خوە ئەز دکارم بێژم ئەڤ تێکۆشینا کو ئیرۆ گھشتی ڤێ ئاستێ، ل سەر سێ لنگانە. یەک فەلسەفە، ئیدەۆلۆژیا رێبەر ئاپۆ و فەلسەفەیا ئاپۆگەری، ئەڤ روح ل سەر ڤان بنگەهان ھاتە ئاڤاکرن.” ئانکو دخوازە ووسا بدە خویاکرن کو بەرخوەدان و شۆرەشا نەتەوی ژ فکرا ئاپۆ هاتیە وەرگرتن.
گەر ئەم نها د داویا سالێن هەفتێیان ژ چەرخا رابۆری دە ژیابان دبوو ئەڤ گۆتن خوەش هاتبان بهیستن و پڕ کەسان باوەر کربان، ژ بەر کو د وێ دەمێ دە هایا کوردان ژ ت تشتەکی نەبوو، کوردان د وێ دەمێ دە ب تەنێ چاڤ و گوهێن خوە بکار دئانین، چاڤێن کوردان ژ بۆی دیتنا کوردستانێ کا چەوا هاتیە داگیرکرن و ئەو زۆرداریا ب سەر وان دە دهات وەکە “قەتلیعام، شەوات، کوشتن، زیندان و هود…”، گوهژی ژ بۆی بهیستنا هەر گۆتنەکێ دهات بکارئانین کو تێ دە بەحسا رزگاریا کورد و کوردستانێ د بن دەستێ داگیرکەران دە بکە.
پەکەکێ ل سەر ڤێ بنگەهێ تەڤ هەول دان کو گوهێن جوانێن کوردان تژە بکە ژ سلۆگانێن نەتەوی و یەکپارچەیی و رزگاریا کوردستانێ.
دڤێ دۆن کیشۆتێ پەکەکێ بزانبە، ئەڤ نە ئەو چاخە کو ب هن گۆتنێن گران و دوور ژ راستیێ بکاربە گەل بخاپینە، ئیرۆ سەردەما تەکنەلۆژیایێ و ژیریا دەستکردە و مرۆڤ دکارە ب هێسانی بگەهە راستیێ. دڤێ کۆنسەیا پەکەکێ ڤێ راستیێ بزانبە و ل گۆر ڤێ سەردەمێ داخویانیان بدە هەیا کو گەل بکاربە باوەر بکە.
کارایلانێ دۆن کیشۆت دبێژە، “ئەم روحێ بەرخوەدانا گەریلا ژ فەلسەفەیا بەرخوەدانا رێبەر ئاپۆ وەردگرن”. گەر کەسەک ئۆجالان ناس نەکە ئەڤ گۆتن وێ ژ وی رە پڕ خوەش و بالکێش بە، لێ کەسێ کو ئۆجالان ژ روویێ هزری و پراکتیکی ناس بکە وێ ب ڤان گۆتنان بکەنە ب ئاوایەکی کو دەنگێ کەنا وی بگهیژە ئاسیمانان، ژ بەر کو ئۆجالان هەر د زارۆکتیا خوە دە هەیانی نها کەسەکی ترسۆنەک بوو، گۆتنێن ئۆجالان یێن ل ئیمرالیێ و د داگەها ترکیەیێ دە کری باشترین میناکن ل سەر ئاخافتنا من کو کەسەک ترسۆنەکە.
ئەزێ ل ڤر هن میناکان باس بکم کو تێ دە ب زەلالی خویا دبە ئۆجالان کەسەکی ترسۆنەکە، ئۆجالان د دانووستاندنا خوە یا ب یالچین کووچک رە کو د بن ناڤێ “داستانا ژیانێ” دە چاپ کریە، دبێژە، “دەما ئەز زارۆک و ژاندارما دهاتن گوندێ مە و تەقە دکر، ئەز پڕ دترسیام و ژ ڤر دچووم ور، ئەز پر ترسۆنەک بووم، ژ ترسان دە مر مار دکوشتن، هەلبەت ئەڤ نە ژ مێرخاسیا من بوو، ژ ترسۆنەکیا من بوو. ئۆجالان دیسا دبێژە، ئەز کەسەکی ترسۆنەک بووم ژ بەر ڤێ یەکێ من هەول ددا زارۆکان ل دەردۆرا خوە کۆم بکم و وان بترسینم، هەیانی ئەو راستیا ترسۆنەک بوونا من نەزانن. دەما ئۆجالان د سالا 1972 دە هاتیە دەستەسەرکرن دەمەکی د زندانێ دە دمینە، دەما ئۆجالان تێ سەربەست بەردان سۆند دخوە کو جارەکە دن نەکەڤە زندانێ و دبێژە، نەخوەشترین ژیان، ژیانا د زندانێ دە یە. ل سەر ڤێ ئەساسێ دەست ب رەڤێ دکە، دخوازە ب هەر ئاوایی بە جارەکە دن نەکەڤە د زندانێ دە، پێش کو ل کینیایێ ژی وەرە گرتن، پاسەوانا وی یا کەچ ژ وی رە گۆت، “سەرۆک، دەمانجەیێ ژ من بگرە و ل بەر خوە بدە، لێ بەلێ د بەرسڤ دە ئۆجالان گۆت، هوون شەرەکە کلاسیک ژ من دخوازن، ئەز کارەکی ب ڤی ئاوا ناکم.” پاش کو ئۆجالان ل کینیایێ تێ دەستەسەرکرن، هێژان د بالەفرێ دە بوو، هێژان چ ئیشکەنجە ژی ل وی نەهاتبوو کرن دەما گۆتی، دایکا من ژی ترکە، رێ ب من بدن خزمەتا دەولەتا خوە ‘ترکیەیێ’ بکم. دیسا دەما ل ئیمرالیێ یەک ژ بەرپرسێن میتێ ب وی رە دئاخڤە و ب کامەرایێ گۆتنێن ئۆجالان تۆمار دکە، دبێژە، “ئەزێ ببم تاشارۆنێ دەولەتا ترک، گەر دەولەت هنەکێ ئالیکاریا من بکە، ئەزێ باشوورێ کوردستانێ بکم بەشەک ژ ترکیەیێ.
ل داویێ دبێژم، گەریلا ل پەی ڤێ شۆپا ئۆجالان کەتیە، لۆما ژ چیایێ گابارێ بازدایە و هاتیە ل چیایێ گارێ و دیسا دبێژە، سالن ئەم ل بەر خوە ددن و ئەم ب سەر کەتنە.
