کوشتنا ھاوکار جاف بوویەرەکە کو دڤێت ژ بۆ گەلێ ھەرێما کوردستانێ ژ گەلەک ئالیان ڤە بێ نرخاندن و دڤێت قەت نەیێ ئاساییکرن. ئەو بویەر ب شێوازێ خوە، لووتکەیا بوویەرایە. تێ دە تایبەتمەندیێن ھەری قرێژ یێن جڤاکا کورد ھەنە: خیانەت، بێبەختی و دژمناتیا ھەڤدو.
ژ نووڤە دیزاینکرنا یەنەکێ
بوویەرێن کو د سالا 2020 دە دەست پێ کرین و وەکی بوویەرێن تیرمەھێ تێن زانین، ژ ھاوکار جاف بگرە ھەتا گەلەک کەسێن دن ژیانا خوە ژ دەست دان. ئەگەر ئەم پیچەکا دن ڤەگەرن پاش، پشتی سالا 2012 د ناڤ یەنەکێ دە پێڤاژۆیەکە جودا دەست پێ کر. پشتی وێ دیرۆکێ، لگەل نەخوەشیا مام جەلال، یەنەکێ دەست ب وەنداکرنا ھەڤدەنگییا خوەیا رێخستنی کر و ئیرانێ دەست ب ئافراندنا گرووپەکا سەرۆکاتیێ ژ بۆ یەنەکێ کر. ئەوێن کو جیھانا سیاسەتێ ژ نێزیک ڤە دشۆپینن باش دزانن کو پشتی سالا 2012، ئیرانێ ل ھەمبەر ئیحتیمالا کو یەنەکەیا بێ مام جەلال دێ بەلاڤ ببە، دەست ب تەڤگەرێ کر. ئیرانێ ب پێشبینیا کو یەنەکەیەکا لاواز دێ رێ ڤەکە ژ بۆ پەدەکەیەکا مەزن و زێدەکرنا باندۆرا وێ ل سلێمانیێ، لۆما ژی دەست ب سازکرنا نوویا یەنەکێ کر. ژ ئالیەکی دن ڤە ژی ھەول دا کو پەکەکە بینە ھەرێمێ و ل ڤر ئەنیەکا دژی پەدەکێ ئاڤا بکە. د ڤێ دەمێ دە پێشی لاھۆر جەنگی بوو ناڤەک کو دەرکەت پێش.
مالباتا ئیبراھیم ئەحمەد، کو خوەزوورێ جەلال تالابانییە ژی، ئەڤ رەوش قەبوول نەکر و پێڤاژۆیا تەسفیەکرنا لاھۆر جەنگی دەست پێ کر. پێڤاژۆیەکا گەلەک ھۆڤ و بێرەحم ھات ژیان کرن. لاھۆر جەنگی و دەردۆرا وی یا نێزیک ژ پارتیێ ھاتن ئاڤێتن. ئەڤ پێڤاژۆیا یەک-کەسی یا یەنەکێ ل جەم گەلەک کادرۆیێن یەنەکێ نەرازیبوون چێکر و ڤەقەتین ژ رێخستنێ دەست پێ کر. ھاوکار جاف یەک ژ وان بوو.
ھاوکار جاف 41 سالی بوو، تام 20 سالان د ئاستا بلند دە خزمەتا یەنەکێ کربوو. وی د ئیستیخباراتا یەنەکێ زانیاری دە کار دکر. د ڤێ دەما پەڤچوونان دە ژ یەنەکێ و سلێمانیێ ڤەقەتیا و ل ھەولێرێ ب جھ بوو. دەما کو دو کەچێن وی یێن بچووک د ترومبێلێ دە بوون، ترومبێلا وی ھاتە تەقاندن.
ئاساییشا ھەولێرێ کەسێن کو ترومبێلا هاوکار جاف تەقاندبوون گرتن. یێن کو ھاتین گرتن گۆتن کو وان فەرمان ژ وەھاب حەلەبچەیی گرتنە کو ھێ ژی فەرماندارێ ھێزێن ئیستیخبارات و دژە تەرۆرا یەنەکێ یە. ھەر دو کوژەران سزایێ گرتیگەھا ھەتا ھەتایی(مووەببەد) وەرگرتن. یەنەکە ل ھەمبەر ڤێ رەوشێ پرۆتەستۆیەک کر و ھەتا ژ حکوومەتێ ژی ڤەکشیا.
ژ بەر کو ئەگەر رێڤەبەریا ھەولێرێ ل ھەمبەر کوشتنا ھاوکار جاف ھەلوەست وەرنەگرتبا، کوشتن دا زێدەتر بن. تەشھیرکرنا کوژەران و بریارا دادگەھێ یەنەکە راوەستاند. ئەگەر نا، نێچیرا موخالفان یا د ناڤ یەنەکێ دە دا بەردەوام بیت.
یەنەکێ گەلەک ھەول دا کو وەهاب حەلەبچەیی پاقژ بکە. ھەول دان کو وەھاب حەلەپچەیی بشینن رۆژئاڤا و وی وەک وەلاتپارێز نیشان بدن. وان راهێنانێن سەختە پێک ئانین و خوەستن وێنەیێ پێشمەرگەیەکی قەھرەمان چێکن. وەھاب حەلەپچەیی، یەک ژ مرۆڤێن سەرەکی یێن تیما بافل تالابانییە و ئەو، کوژەرەکە. نھا ئەوێن کو ب چاڤێن ڤەکری کوژەران دپارێزن، یێن کو تەنێ ژ بەر کو ئەو موخالفە ترومبێلا کو زارۆک تێ دە نە دتەقینن، د دەما ھلبژارتنێ دە سۆزان ددن کو ئەو دێ دەمۆکراسیێ بینن کوردستانێ. یێن کو ھەڤالێ خوەیێ دۆزێ دکوژن، گەلۆ ھەکە ئەو بهێن سەر دەستهەلاتێ دێ چ ب سەرێ خەلکێ نەناس ئینن. بافل تالابانی و تیما وی د پارتیا خوە یا بچووک دە ژی نەکارینە سیستەمەکە باش ئاڤا بکن. د ناڤ وان دە چ سازیەکا دەمۆکراتیک نەمایە. مرۆڤەکی تەنێ میکانیزما دارایی، ئاساییش و ئۆرگانێن چاپەمەنیێ یێن یەنەکێ ب خوە ڤە گرێدایە. یێن کو سەری ل بەر وی ناتەوینن نکارن گاڤەکێ ژی باڤێژن ناڤا ڤان سازیان. یەنەکە ب تەڤاھی بوویە سیستەمەکە دیکتاتۆری. سیستەمەکە وسا دیکتاتۆری ل سەر گەل ژی تێ سەپاندن. ھەموو کارساز ھاتنە گرێدان ب باجێ ڤە، یێن کو نە ئەندامێن یەنەکێ نە نکارن ل سلێمانیێ جھەکی کاری ڤەکن. ھەموو داھاتێن سلێمانیێ تێن تالان کرن.
دگەل ڤێ تابلۆیا ترسناک، بافل تالابانی د متینگا ھلبژارتنێ دە دبێژە کو ئەو دخوازە کوردستانێ ڤەگوھەرینە سیستەمەکە مۆدەرن و دەمۆکراتیک.
دوھ ل سلێمانیێ گەل ل ھندەک دەڤەران وێنەیێ ھاوکار جاف دالقاندبوو. برایێ وی محەمەد جاف گۆت: “ئەم دێ نەھێلن کو ئەڤ دۆسیە هێت گرتن، ئەگەر پێویست بە ئەم دێ ڤێ مژارێ ببن دادگەھا ناڤنەتەوەیی و بافل تالابانی و تیما وی تەشھیر بکن.” گەلەک ئالی دبێژن کو گەل دێ د سندۆقان دە بەرسڤا ھەری باش بدە سیستەما بافل تالابانی.
