ئیسلاما سیاسی ل باشوورێ کوردستانێ و چەند ئاخاڤتنەک
د 20ی جۆتمەهێ دە هلبژارتنێن پارلەمەنتۆیا کوردستانێ تێن لدارخستن، د ڤان هلبژارتنان دە هەژمارەک پارتیێن جودا و کەسێن “سەربخوە” بەشدار دبن، پارتیەکە وەکە پەدەکێ ب بشت بەستن ب دیرۆکا خوە باسی ئارامی، ئاڤەدانی و خوەراگریێ دکە، یەنەکە باسی رۆخاندن و ژناڤبرنا حکوومەتێ و پارتیێن ئیسلامی ژی ت پرۆژەیەکی وان تونە ب تەنێ ئەڤ نەبە کو ژ ئالیگرێن خوە رە دبێژن ئەمێ توورکێن وە تژە بکن ژ خێرا!
لێ بەلێ پارتیێن ئیسلاما سیاسی خەتەریەکە پڕ مەزن ل سەر ولات چێدکن، دیرۆک شاهدەیێ ل سەر ڤێ ئاخافتنێ ددە، ژ بەر کو ل هەر وەلاتەکی کو پارتیەکە گرێدایی ئیسلاما سیاسی گهشتبە دەستهلاتێ ئەو ولات بەر ب لاوازی و فەلاکەتێ ڤە بریە، میناک ژی ل بەر چاڤن، مسر، یەمەن، ئەفغانستان، ئیراق، سوودان و هود..
چما ئەم دبێژن پارتیێن ئیسلاما سیاسی خەتەریەکە مەزنن ل سەر جڤاکێ؟ ژ بەر کو ئەڤ پارتیانە ئازادیێن کەسایەتی سینۆردار دکن، دەست دخن ژیانا رۆژانە یا خەلکێ، پرۆگرامێن خوەندنێ دگوهەرن، ب ئاوایەکی کو لگەل رەوتێ وان یێ فکری و عەقیدی بگونجە، خوەندنا وانەیێن ئایینی د دبستانان دە زێدە و خوەندنا وانەیێن زانستی هەیا کو دکارن کێم دکن دا کو بکاربن جڤاکێ ژ پێڤاژۆیا جیهانا پێشکەفتی و مۆدەرن دوور بخن.
ئەڤ پارتیێن ئیسلاما سیاسی تێکلیێن دیبلۆماسی ل سەر بەرژەوەندیێن هەڤپار یێن دبلۆماسی یێن د نێڤەبرا دەولەتان دە ئاڤا ناکن، بەلکو تێکلیێن وان ل سەر بنگەها دژمنداری و هەڤرکیێن ب وان دەولەتان رە تێ ئاڤاکرن یێن وەکە دژبەرێن خوە دبینن، ئەو ژ سیاسەتێ پر دوورن.
کێماسیێن پارتیێن ئیسلاما سیاسی پڕ زێدەنە و هەگەر هەیانی سبە باس بکین ئەمێ نەکارن خەلاس بکن، ئەم ڤەگەرن سەر پارتیێن ئیسلاما سیاسی یێن باشوورێ کوردستانێ کو ب سلۆگان و بانگەشەیا خوە یا دەرەو دخوازن ل باشوورێ کوردستانێ کورسیێن زێدەتر د پارلەمەنتۆیێ دە ب دەست بخن، پارتیێن ئیسلامی یێن باشوور کو یان گرێدایی مسرێ، ئیران یان ترکیەیێ نە و ژ ئالیێ وان ڤە تێن پشتەڤانیکرن خوە ژ ت دەرەوەکی نادن پاش، ژ دەرەوێن ب ناڤێ خوەدێ و پێغەمبەران بگەرە هەیا دگەهە دەرەوێن ب ناڤێ پێشمەرگە، ب ت ئاوا شەرم ناکن و وەکە کەسەکی کو ت باوەری ب رۆژا داوییێ نەبە، باوەری ب وێ یەکێ نەبە کو دەرەو گونەهەکە مەزنە، ب تایبەتی گەر ژ بۆی ڤێ یەکێ بە کو تشتەکی ب دەست بخن، دەرەوا تێ سەر زمانێ وان دکن.
ئەم دو میناکان ل سەر دەرەوێن ڤان پارتیێن ئیسلاما سیاسی ببێژن؛
دەما باژارێ دهۆکێ د مەها ئادارا ئیسال دە راستی لەهیان هاتی و هەژمارەکە زێدە یا مالباتێن راستی زراری هاتین، هەر کەسێ دیت، کورێ سەرۆک بارزانی، فەرماندە مەنسوور بارزانی هەر زوو کەت تەڤگەرێ و ئالیکاریا زرارمەندان کر، خەلک د شەڤا یەکەم دە د هۆتەلێن هەری باش یێن دۆهۆکێ ب جی کرن، پەرە و پێتر ژ 118 یەکەیێن ئاکنجیبوونێ ب سەر زەرەرمەندان پارڤە کرن، ب هەژمارەک پێشمەرگەیان رە تەڤ کۆچە و کۆلانێن دۆهۆکێ ژ پاشمائیێن لەهیێ پاکژ کرن و ب قاسی کو ژ دەست وی دهات ئالیکاری کر، لێ بەلێ نها پارتیێن ئیسلامی چ دبێژن؟
یەک ژ نامزەتێن کۆمەلا دادگاری کو پارتیەکە ئیسلامیا سیاسیە د ڤێ دەربارێ دە دبێژە، دەما دهۆک راستی لەهیێ هاتی، ئەڤ کادرۆ و سازیێن مە یێن خوێرخازی بوون د هەورا خەلکێ دهۆکێ چووین، ئەو نە دەستهەلات بوو، ئەو ئەم بوون، هەلبەت دەما دەنگێ خوە بلند دکە ڤێ یەکێ باس دکە ئەو ب خوە ژی باوەر ژ خوە ناکە، ژ بەر کو هەر کەسی ب چاڤێ سەرێ خوە ل سەر شاشەیێن تیڤیان دیت کا کی بوو ئالیکاری کری.
دبێژن ئەم ڤی ولاتی ب خوینا خوە دپاریزن، لێ بەلێ دەما خەتەری کەتی سەر باشوور و داعشێ ئێریش کری، ت یەک ژ وان نەچوو چەپەرێن پێشمەرگا دە و بەرگریێ ژ ڤێ ئاخێ بکە، نە ب تەنێ چەک نەهلگرت بەلکو ب ت ئاوا ئالیکاریا پێشمەرگەیان نەکر، ل دژی داعشێ داخویانیەکە ب تەنێ ژی نەدا، نەگۆت ئەڤ زالمن، ئەڤ کافرن، ژ بەر کو ب هێڤی بوون باشوور بکەڤە دەستێ داعشێ هەیاکو داعش وان وەکە ئەمیرێن خوە یێن باوەر پێ کری ل جیەکێ دانە و بکارن فکرێن خوەدیێن خوە ئانکو “ئیران ترکیێ و ئیخوان ئەلموسلمین” ل ور جیبجی بکن.
ل باشوورێ کوردستانێ پارتیێن ئیسلاما سیاسی، بەحسا ئومەتێ دکن، بەحسا وەکھەڤی و براتیێ دکن، بەحسا دادوەری و عەدالەتێ دکن. ب دەنگەک بلند دبێژن “ئەم مسلمان برایێ ھەڤن” ب ناڤێ مسلمانەتیێ پشتگیرییا مسلمانا ل فلستینێ و دەڤەرێن دن یێن جیھانێ دکن، لێ بەلێ دەما ترکیە و ئیران ئێریشی سەر باشوور دکن، بێ دەنگ دمینن و وان شەرمەزار ناکن، ژ بەر کو ل جەم وان، ئاخ و وەلات نە پیرۆزن.
کادرۆیێن ڤان پارتیێن ئیسلاما سیاسی دەردکەڤن مەدیایێ و ب دەنگەک بلند دقیرن، ل ڤڕ دیمۆکراسی تونەیە، ئەڤ دەستهلاتەکە دیکتاتۆرە، عەدالەت تونە، لێ فێم ناکن هەر قیرینا ڤان ئاخڤتنان ب خوە نیشانەیا هەبوونا دەمۆکراسیێ یە، گەر دیمۆکراسی و ئازادیا رادەربرینێ ل باشوور تونەبوویا، نە ئەو دکارین پارتیەکێ چێکن و نەژی دکارین د مەدیایێ دە ب ڤی ئاوا باخڤن.
ب کورتاسی ئەم ببێژن، گەر گەلێ باشوور دخوازە د ژیانەکە خوەش دە بژی و باشوور مینا غەززەیێ نەیێ وێرانکرن، مینا سالا 2012ان دەما ئیخوان مووسلمین بوویە دەستهلاتدار ل مسرێ ئازادیێن کەسۆکی نەیێن زنجیرکرن، مینا سوودانی شەرەکە ناڤخوە یێ ئۆلی چێنەبە، ئەزموونا ئیسلاما سیاسی یا ل توونس و جەزائیرێ تەجرووبە نەکن، ناسنامەیا خوە یا نەتەوی وەندا نەکن و بەر ب عەرەببونێ ڤە نەچن، دڤێ دەنگ ب ڤان پارتیێن ئیسلامی نەدن.
بەلێ، پڕانیا کوردان موسلمانن، موسلمانتیەک پاکژ ژ باڤ و باپیرێن خوە وەرگرتیە و فەرزێن خوە یێن ئۆلی ب تەمامی جیبجی دکن، کورد نە هەوجەیی ت پارتیەکە ئیسلامی یا سیاسینە کو وان فێری ئۆلا ئیسلامێ و وەلاتپاریزیێ بکە.
