ل ناڤچەیا کاھرامانکازانا ئەنقەرەیێ یا ترکیەیێ دەنگێ تەقین و چەکان ھات بھیستن.
وەزیرێ کارێن ناڤخوەیی یێ ترکیەیێ عەلی یەرلیکایا راگھاند کو ل دژی شیرکەتا ئانۆنیما پیشەسازیا ھەواگەری و فەزایێ یا ترکیێ (توساش) ئێریشا چەکداری ھاتیە کرن و کوشتی و بریندار ھەنە.
یەرلیکایا ل سەر ھەسابا خوە یا مەدیایا جڤاکی داخویانیەک دا و راگهاند: “ل دژی تەسیسێن شیرکەتا ئانۆنیما پیشەسازیا ھەواگەری و فەزایێ یا ترکیێ ل کاھرامانکازانا ئەنقەرەیێ (توساش) ئێریشا چەکداری ھات کرن. پشتی ئێریشێ مخابن کوشتی و بریندارێن مە ھەنە. “
ژ ئالیێ خوە ڤە د مەدیا ترکیەیێ دە تێ ئیدیعا کرن، ئەڤ ئێریشەک “تەرۆرستیە” و دەستنیشان دکن کو ئێریشکار چەکدارێن پەکەکێ نە.
هەر وەها تێ گۆتن، کەسێن ئێریشکار ژنەک و دو مێر بوون کو ب ئۆتۆمۆبلەکی دچن بەر ئاڤاھیا ناڤەندا پیشەسازیا فەزایێ یا ترکیەیێ. ل وێ دەرێ چەکدارا ژن خوە ب بۆمبەیێ دتەقینە و ھەردو چەکدارێن دن دکەڤن ناڤا ئاڤاھیێ، دبە ھندەک کارمەند دیل ھاتبن گرتن و ھێژان ھەردو چەکدار د ناڤا ئاڤاھیێ دە نە.
