سیاسەتمەدار بولەنت ئارنچ راگهاند کو هەگەر عه‌بدوللا ئۆجالان وەرە مەجلیسێ دڤێ ئەفوویەکە گشتی بێ دەرخستن.
سەرۆکێ بەرێ یێ پارلامەنتۆیا ترکیەیێ و یەک ژ ئاکتۆرێن هەری گرینگێن پێڤاژۆیا چارەسەریێ یا سالێن 2013-2015ێ بولەنت ئارنچ ژ رۆژنامەگەر جانسو چاملبەلێ رە ئاخڤی.
بولەنت ئارنچ بەحسا هەولێن پێڤاژۆیا چارەسەریێ کر و گۆت: “دەما من گۆتنا باخچەلی یا عه‌بدوللا ئۆجالان دەرکەڤە، تەجرید رابە، بلا وەرە ل مەجلیسێ باخڤە بهیست، من دەستپێکێ باوەر نەدکر. من داویێ ژ شێورمەندێن خوە رە تەلەفۆن ڤەکر من گۆت ب راستی ئەڤ گۆتنێن باخچەلینە؟ ل کو دەرێ ئاخڤیە؟
ئەڤ تشت ژ وی نەدهات هێڤیکرن. هەر رۆژ دگۆت بلا ئەو وەرە گرتن، بلا ئەڤ وەرە گرتن، هەگەر یێن وان نەیێن ئەم دێ وان کەسان بگرن، ئەم دێ دالقینن، ئەم دێ ببرن ئەو کەسەکی وسا بوو کو د ئاتمۆسفەرەکە وسا دە بوو و هەر کەس مات مایی بوو.
ژ بەر وێ ئەز وسا فکرم کو دێ پێڤاژۆیەکە نوو دەست پێ بکە و ب وی ئاوایی پرسگرێکا ترکیەیێ یا قەدیما تەرۆرێ دێ ب داوی ببە من چاڤدێریا رەوشێ کر و شۆپاند. سەرۆککۆمارێ مە بالا خوە نەدا ڤان پرسگرێکان».
“ئۆجالان نکارە وەرە مەجلیسێ”
بولەنت ئارنچ ل سەر هاتنا بانگا دەڤلەت باخچەلی و هاتنا ئۆجالان یا ژ بۆ مەجلیسێ ژی وها گۆت:
«بلا ئەز جارەکە دن ژ وە رە ببێژم کو د رەوشا خوە یا نها دە نه‌مومكینه کو وەرە مەجلیسێ و ئاخافتنەکێ بکە.
نە ژ ئالیێ قانوونی ڤە و نه ژی ل گۆری کەڤنەشۆپیا پارلامەنتۆیێ ئەڤ نە مومكینه. ئەز یەک ژ وان کەسا مە کو 5 سالان من پرۆسەدوورا ناڤخوەیی یا مەجلیسێ ب جهـ ئانیە.
کەسەکی وەکی ئۆجالان چاوا دکارە ب دەستوورەکە تایبەت وەرە مەجلیسێ؟ دێ ب بێ دەستوورێ وەرە مەجلیسێ؟
ئۆجالان نها ب دەستوورێ تەنێ ژ بۆ جەنازەیێن مالباتا خوە و دەستێ وی کەلەبچەکری ل پشت وی ژی ب سەدان جەندرمە دکارە دەرکەڤە.
ئەم ببێژن ئۆجالان ئانین مەجلیسێ و د کۆما دەم پارتیێ دە ئاخڤی.
هەگەر چ تشت نەبە سەردۆزگەرێ کۆمارێ ژ بەر کو ئۆجالان دایە ئاخافتن دێ ل سەر وێ پارتیێ دۆزا گرتنێ ڤەکە.
هەگەر عەفوویەک گشتی هەبە، ئەم دکارن ببینن بێ کا چ دبە. بێی عەفوویەکێ نە مومكینه ئۆجالان وەرە مەجلیسێ».
