ھەڤسەرۆکێ کۆنسەیا رێڤەبەرا کەجەکێ و یەک ژ رێڤەبەرێن پەکەکێ جەمیل بایک د تەلەڤزیۆنا پەکەکێ یا ل بەلچیکایێ وەشانێ دکە، ستێرک تیڤێ دە ھەڤپەیڤینەک بەلاڤکر. د ھەڤپەیڤینا 8 مژدارێ دە جەمیل بایک ل سەر مژارێن سەرەکە یێن رۆژەڤا وەک گۆتووبێژێن چارەسەریێ ل ترکیەیێ نرخاندن کرن.
شیرۆڤەیا جەمیل بایکا ل سەر پێڤاژۆیا نوو: رێبەر ئاپۆ دکارە ھەموو پرسگرێکێن رۆژھلاتا ناڤین چارەسەر بکە
بایک د ئاخافتنا خوە دە دەربارێ گۆتنێن باخچەلی یێن داوی “بلا ئۆجالان وەرە مەجلسێ باخڤە، بلا ژ مافێ ھێڤیێ سوود وەرگرە” و دەربارێ ھەڤدیتنێن پەکەکێ-ئاکەپێ-ئیمرالیێ دە چ ئاگاھی نەدان. بایک تەنێ گۆت “ئەم ل پشت رێبەرتیا خوە نە، موخاتەبێ پرسگرێکێ سەرۆک ئاپۆیە” و ژ سیاسەتا گشتی یا پەکەکێ وێدەتر چ شیرۆڤە نەکرن. بایک د ئاخافتنا خوە دە گۆت “سەرۆک ئاپۆ نە تەنێ پرسگرێکێن کوردان، دکارە پرسگرێکێن ترکیێ، رۆژھلاتا ناڤین و جیھانێ ژی چارەسەر بکە.”
تێ زانین کو د مەھێن داوی دە ناڤبەرا دەولەتا ترک-ئیمرالی-پەکەکێ دە ھەڤدیتن زێدە بوونە و ھەم رێخستنا پەکەکێ یا ئەورۆپایێ ھەم ژی ناڤەندا قەندیلێ بەشەک ژ ڤان ھەڤدیتنانن. لێ بەلێ بایک قەت بەحسا ڤان ھەڤدیتنان نەکر. ھات دیتن کو جەمیل بایک دخوازە وسا نیشان بدە کو ئەو نە بەشەک ژ وان ھەڤدیتنانە کو ل بەر چاڤێ رایا گشتی نە. لێ جەمیل بایک د ئاخافتنا خوە دە وەک ھەر تم پتر حکوومەتا ھەولێرێ، پەدەکە و تەڤگەرا بارزانی ئارمانج کر. جەمیل بایک ئیرادەیا گەلێ کورد کو د ھلبژارتنان دە دەرکەت پاشگوھ کر و شیرۆڤەیێن بێرێزی ل ھەمبەری ئیرادەیا دەنگدەران کر. ھەر وھا بایک قەت بەحسا تێکچوونا یەنەکێ و سەرۆکێ وێ بافل تالەبانی د ھلبژارتنان دە نەکر کو پەکەکێ د دەما ھلبژارتنان دە پشتگری دابوونێ.
د ھلبژارتنێن 20 جۆتمەھێ یێن ھەرێما کوردستانێ دە پەدەکە بوو پارتیا یەکەم و ل باژارێن ھەری مەزنێن ھەرێما کوردستانێ وەک ھەولێر-دوھۆکێ پرانیا دەنگان ب دەست خستن. لێ بەلێ جەمیل بایک گۆت “بارزانیان ب پشتگریا دەولەتا ترک ھلبژارتن قەزەنج کرن”. گۆتنا کو پەدەکەیا کو د ھلبژارتنێن کوردستانێ دە زێدەتری 810 ھەزار دەنگ وەرگرتن “ب پشتگریا دەولەتا ترک قەزەنج کرن” واتەیا بێرێزییەکە مەزنە ل ھەمبەری ئیرادەیا گەلێ باشوورێ کوردستانێ. بایک ھەروھا ھەول دا کو ئەنجامێن ھلبژارتنان ب گۆتنا “گەل ژ بەر کو ژ سیاسەتا پەدەکێ نەرازییە دەنگ نەدا” ساختە بکە، هەرچەند کو پەدەکێ نێزیکی 200 ھەزار دەنگان زێدە کرن ژی.
جەمیل بایک دا دییارکرن کو ئەو ناخوازن ل کوردستانێ حکوومەت بێ ئاڤاکرن
تێ زانین کو پەکەکەیا کو د سالێن داوی دە ئێریش، کۆمپلۆ و چالاکییێن جووربەجور پێک ئانین، ژ بۆ کو بێ یستیقراریێ ل ھەرێما کوردستانێ چێکن، دێ د سەردەما نوو دە ژی لگەل ھەڤکارێ خوە یەنەکێ ھەول بدن ئاژاوەگێریێ ل باشوور چێکن ژ بۆ رێگریکرنا ل ئاڤاکرنا حکوومەتێ. جەمیل بایک د ئاخافتنا خوە یا 8 مژدارێ دە ئەڤ پلان ژی ئەشکەرە کر. بایک گۆت دڤێت سێ شەرت بێن پێشخستن ژ بۆ ئاڤاکرنا حکوومەتێ ل کوردستانێ. ل گۆری وی “د حکوومەتا کو بێ ئاڤاکرن دە پێشی دڤێت ھەڤکاریا لگەل دژمنا و خیانەت بهێت رەدکرن، ل دژی داگیرکەریا ترکیێ بێ سەکناندن و بێ خوەستن کو دەولەتا ترک دەرکەڤە، سێیەمین ژی د کریزا رۆژھلاتا ناڤین دە ژ بۆ یەکیتیا کوردان بێ خەبتین.”
دەما مرۆڤ ب گشتی ل ئاخافتنا جەمیل بایک دنێرە راست خویا دکە، لێ ژ بەر ھەلوەستا پەکەکێ دیارە کو گۆتنێن وی تەنێ ژ بۆ ڤەشارتنا سیاسەتا کو ئەو ب خوە دمەشینە ھاتنە گۆتن. جەمیل بایک بەحسا ھەلوەست نیشاندانا ل دژی دژمن و رەدکرنا خیانەتێ دکە لێ جەمیل بخوە ” ڤێ گۆتنێ د ھەمبێزا دەولەتا ئیرانێ، حەشدا شەعبی و رەژیما شیعەیا ئیراقێ دە دبێژە”. پەکەکەیا کو ب خوە ھەتا قرکێ ھەڤکاریا ئیران و شیعەیان دکە و ب وان ڤە گرێدایی ئێریشی ھەولێرێ دکە، خیانەتێ ل دەستکەفتیێن گەلێ باشوورێ کوردستانێ دکە. یا کو رێ ل بەر داگیرکەریا دەولەتا ترک ڤەکر ژی پەکەکە ب خوەیە، یێن کو گۆتی بلا شنگال ب ئیراقێ ڤە بێ گرێدان و ئالا ئیراقێ ل شنگالێ بێ ھلدان ژی ھەر پەکەکەیە.
جەمیل بایک دبێژە “شەرتێ ئاڤاکرنا حکوومەتا کوردستانێ ئاڤاکرنا یەکیتیا کوردانە” لێ ئاستەنگیا ھەری مەزن ل بەر یەکیتیا کوردان و کرێگرتییێ ھەری مەزنێ کو داگیرکەر ل دژی کوردان ب کار تینن پەکەکە ب خوەیە. پەکەکێ لگەل دەرکەتنا خوە گولەیا خوەیا یەکەم ل کوردان رەشاند و ل باکورێ کوردستانێ تەڤگەرێن کوردستانی ھەموو تونە کرن و ل سەر دەستکەفتێن وان روونشت. ل ھەرێما رۆژھلات دژمنێ ھەموو پارتیێن کوردییە. ل باشوورێ کوردستانێ ھەڤرێیێ ئیراقێ و ئیرانێ یە. رۆژئاڤا جھێ ھەری بەربچاڤە کو فاشیزما پەکەکێ لێ دھێتە مەشاندن. پەکەکە رۆژئاڤا ئیستیسمار دکە و ژ بۆ تەنێ ئەو سەروەر بە ھەموو پارتیێن کوردی رەد دکە، ئۆفیسێن وان دشەوتینە، مرۆڤێن وان درەڤینە و دکوژە.
ھەر چەند گۆتنێن جەمیل بایک مەعقوول دیار دکن، لێ ژ بەر کو جەمیل بایک و پارتیا وی د ناڤ خیانەتەکا مەزن دە نە وان گۆتنان چ واتەیەک نینە. ئاخافتنا جەمیل بایک نیشانەیەک گرینگە کو پەکەکە دێ د ئاژاوەیا رۆژھلاتا ناڤین دە ئالۆزی و دژبەرییێ د ناڤ کوردان دە بەلاڤ بکە، رێگرییێ ل یەکیتیا کوردان بکە، تێکلیێن خوەیێن قرێژ لگەل داگیرکەران ژ بۆ بەرژەوەندیێن پارتییا خوە کوورتر و بەرفرەھتر بکە.
