یێن کو ل دژی توندیا ل سەر ژنان دەردکەڤن، دڤێت پێشی ل لەیلا موحەممەدی یا کو پەکەکێ ل بەر چاڤێن زارۆکێ وێ یێ شیرمژ کوشتی، دەرکەڤن
د شەڤا 6-7ێ مژدارێ ل ناڤچەیا فەیدییێ یا سەر ب دھۆکێ ڤە، ژنەکا جوان یا 30 سالی ب ناڤێ لەیلا موحەممەدی ھات کوشتن. کوژەری بێ دلۆڤانی، ژ دووراھیا مەترەکێ، ل بەر دەرگووشا زارۆکێ وێ یێ 50 رۆژی ئەو ژن گولـلەباران کر.
لەیلا نە ژ ئالیێ مێرێ خوە ڤە ھات کوشتن.
لەیلا نە ژ ئالیێ برایێ خوە ڤە ھات کوشتن.
لەیلا نە ب بریارا عەشیرێ ھات کوشتن.
لەیلا نە ب کوشتنا نامووسێ ھات کوشتن.
لەیلا ژ ئالیێ کێ ڤە ھات کوشتن؟ ژ ئالیێ پەکەکێ ڤە ھات کوشتن، کو ب پەسنداری دبێژە ئایدۆلۆژیا خوە ل سەر “ئازادیا ژنان” ئاڤا کریە، ئیدیعا دکە کو ب ناڤێ ژنۆلۆژیێ زانستەکێ ژنان ئافراندیە و دبێژە دێ ھەموو ژنێن جیھانێ بپارێزە، لێ پەکەکێ ئەو ژنا ب ناڤێ لەیلا ل بەر چاڤێ زارۆکا وێ کوشت.
کوشتنا لەیلایێ جینایەتا پەکەکێ یە ل سەر ژنێ
دەما لەیلا ھات کوشتن، 18 رۆژ مابوون بۆ رۆژا تێکۆشینا ل دژی توندیا ل سەر ژنان.
پشتی کوشتنا لەیلایێ، رێخستنا پەکەکێ یا ل سلێمانیێ RJAK ب پێشەنگیا مەجلسا ژنان کامپانیایا “تێکۆشینا ل دژی کوشتنا ژنان” راگەهاند.
پشتی کوشتنا لەیلایێ، کامپا پەکەکێ یا مەخموورێ چالاکیا “تێکۆشینا ل دژی توندیا ژنان” ل دار خست.
رێخستنێن پەکەکێ یێن ئەورۆپا، رێخستنێن ترکیێ، سازیێن رۆژئاڤا ھەموو ل دژی توندیا ل سەر ژنان دەرکەتن. لێ چ کەسان قالا کوشتنا ھەڤالا خوە یا بەرێ لەیلا موحەممەدی نەکر کو ژ ئالیێ رێخستنا وان یا پیرۆز ڤە ل بەر چاڤێن وان ھات قەتلکرن.
ھەموو ئەڤ سازی و دەزگەھ دوروو نە. چ یەک ژ وان ب راستی نە خوەدی ھێزن کو ل ژنان خوەدی دەرکەڤن و نە ژی خوەدی وژدانن. دو ئەرکێن بنگەھین یێن تەڤگەرێن ژنان یێن گرێدایی پەکەکێ ھەنە.
ل کوردستانێ پەکەکە، ب بکارئانینا پرسگرێکا ژنان وەک بوویەرەکا پۆپولەر و ڤەشارتی یا مەگەزینی و ب دانینا پرسگرێکا ژنان ل پێش پرسگرێکا کورد و کوردستانێ، کوردان ژ ئارمانجێن وان یێن نەتەوەیی دوور دخن.
2. ھەموو سیاسەتا پاشڤەروو، خەراب و دژواریا پەکەکێ و عەڤدللا ئۆجالان ڤەشارتن. پەکەکێ و تووندرەوییا پەکەکێ وەک پیرۆز نیشان دان.
دبە کو جەماوەرێ تەڤگەرێن ژنێ یێن پەکەکێ ب راستی کوردستانی بن و بخوازن ل دژی نەحەقیێن کو ل ژنان تێن کرن دەرکەڤن. لێ رێڤەبریا وان ژ تایبەتمەندیێن کو ژیانا ژنێ خوەش دکن دوور کەتیە، بوویە نێر؛ ژ مێران زێدەتر بوویە سەنگەرێ شەرێ پیشەیی، مەقام و پۆستان. کادرۆیێن ژن یێن پەکەکێ بوونە سیبەرەکا بچووکا جەمیل بایک. پەکەکێ زوو دیت کو ژن، ب تایبەتی ژنێن کورد خوەدی ھێزا پێشەنگی و گوھەرینا جڤاکێ نە، ئەڤ ھێز دەستەسەر کر و کرە ئاموورەکا پرۆپاگاندایێ بۆ پارتییا خوە.
پەکەکە تەڤگەرەکە وسایە کو دژواری، زولم و زۆرداریا سیاسی، لەشکەری، جڤاکی و دەروونی یا کو ب خوە ل سەر ژنان دمەشینە ڤەدشێرە. ئەگەر ئەم وەک کورد ل دیرۆک و ئەڤرۆیا دژواری یا ل دژی ژنان بنێرن، بێ گوفتووگۆ دێ بێ دیتن کو چ تەڤگەرەکا سیاسی ب قاسی پەکەکێ دژمناتیا ژنان نەکریە. و چ تەڤگەرەکێ ب قاسی پەکەکێ تووندرەوییا خوە مەشرووع و پیرۆز نیشان نەدایە.
د ناڤ چ تەڤگەرەکا سیاسی دە ب قاسی ناڤا پەکەکێ ژن راستی نەحەقی و دژوارییێ نەھاتنە. چ تەڤگەرێن ژنان ژ بەر ڤەقەتییانا رێخستنی، ژنەکا ل بەر چاڤێ زارۆکێ وێ یێ شیرمێژ نەکوشتیە. چ تەڤگەرەکێ ژ بەر کو ژنێن کو نێزیکبوونا سەکسی یا رێبەرێ وێ رەد کرنە، ئەو وەک “سیخور” ئێعلان نەکرنە و نەکوشتنە.
د دیرۆکا پەکەکێ دە ژ سالێن 1980 ھەتا ئیرۆ ب سەدان کادرۆیێن ژن ژ ئالیێ پەکەکێ ڤە ھاتنە کوشتن. ژ لاما باکسی ھەتا سامیە ئاشکن، ژ فلیز یەرلکایا ھەتا بەتول جیجی ژنێن کو ھاتنە کوشتن نێزیکاتیا راستین یا پەکەکێ یا ل سەر ژنان نیشان ددن.
یێن کو ل قادان ژ بۆ ژنان درووشمان دقیرن، دڤێت پێشی ل مافێن ڤان ژنێن کو پەکەکێ کوشتین و دکوژە خوەدی دەرکەڤن.
ژ ژنێن کو ژ بەر تاوانا نامووسێ مالێن خوە تەرکاندنە زێدەتر ژنێن کو تەنێ ژ پارتییێ ڤەقەتییایی تێن کوشتن؛ ژنێن کو ب دەستێ دەستدرێژکەرێن سەر وان ھاتین کوشتن و ژنێن ژ بەر کو دەستدرێژیا ئۆجالان رەد کرنە ھاتنە کوشتن خوەدی ھەمان عەدالەتێ نە؛ ژنێن کو ب بریارا رێڤەبەریا رێخستنێ ھاتنە کوشتن قاسی ژنێن کو ب بریارا مەجلسا مالباتێ ھاتنە کوشتن، ھەمان تشتە. ئەو تەڤگەرا ژنان یا کو نکارە تەحەکم و زەختا پەکەکێ یا ل سەر ژنان رەد بکە، ئەو نە تەڤگەرەکە راست یا ژنانە.
