ھەلبەت جەرباندنێن باش، ژ بۆنا پێشەرۆژا ملەتێ مە پر گرینگن. ئەڤ گرینگی، ئەوە کو ئەم ل کارێن خوەیێن باش و سەرکەڤتی خوەدی دەرکەڤن و ژ خەلەتییێن خوە ژی دەرسان وەربگرن و دەرخن ئاستەک زانستییێ. ملەتەک ھشمەندییا وی یا ملی ب ڤان مەتۆدان تێت ھۆناندن. دڤێت ئەڤ ھشمەندی دەرکەڤە ئاستەک بلند، کو ژ دیرۆکا خوە دەرسان وەربگرە. مخابن کورد، د ڤی واریدە سەرکێشییا ملەتێ کورد پر خەلەیان دکە و ژێ دەرسان دەرناخە ئاستا زانستی.
دڤێت سەرکردە، سەرکێش و پارتییێن کوردان خوە ژ “ل گۆر دژمن دیزاینکرنێ” رزگار بکن. دەما کو ئەم ل گۆر ھەولدان و خوەستەک و ستراتەژییێن دژمنێن خوە، خوە دیزاین بکن، ئەم نکارن سییاسەتەک کوردەواری ئاڤا بکن.
دەما کو دژمنێن مە ژ تاقەتێ دکەڤن، ل شوونا ئەم ڤێ دەرفەتێ ژ بۆنا خوە بکار بینن، ئەم دچنە ھەوارا دژمنێ خوە و دەستپێکێ “ئاڤاکرنا ناڤ مالا دژمنی” ژ بۆی خوە وەک ئەرک دبینن. پشتی کو دژمن ژ ئالۆزی و قەیرانان رزگار دبە، خوە ب سەرھەڤدە تینە، دیسا دەست ب بەربەرییەتا خوە دکە.
ئەمەریکا و بەشەک ژ ھێزێن ھەڤپەیمانان، پشتی شەرێ خەلیجێ ب 10 سالان، د 2003 دە دەستوەردانی ئیراقێ کرن و رەژیما بەعس ھلوەشاندن. ل ئیراقێ پیچەکێ دەولەت و پیچەکی ژی ئارتێش تێک چوو و ھلوەشییا. سیستەما دیکتاتۆر و بەربەری تێکچوو. ئەڤە بوویەرەکا گرینگ بوو و ل پشت خوە دەولەتەک ھلوەشییایی ھشت. ژ 1991، ھەتا 2003 کوردان، ل سەر بەشەک ژ ئاخا باشوورێ کوردستانێ ئازادییەک دیفاکتۆ بدەست خست. پارلەمەنتۆیا خوە ئاڤاکرن. د دەما ھلوەشینا رەژیما ئیراقێ دە رەوشا کوردان ژ رەوشا ئیراقێ باشتر بوو و گەلەک دەرفەتێن سەرخوەبوونێ یێن ھوندوری ھەبوون.
کوردان بەرێ خوە دان بەغدایێ و ئەو دەرفەتێن د دەستێن وان دە ژ بۆنا ئاڤاکرنا ئیراقێ بکار ئانین. د ئاڤاکرنا دەستوورا نوویا ئیراقێ دە، ل شوونا کورد ڤێ دەرفەتا سەرخوەبوونێ د ئاستەک بلند دە، ژ بۆنا خوە بکار بینن؛ خوەدی لێدەرکەتنا ئیراقێ، ئاڤاکرنا ئیراقێ و خورتکرنا ئیراقێ ھلبژارتن. د قەناعەتا وان دە “ئیراقەک خورت، کوردستانەک خورتە.”(!)
لێ راستییا عەرەبان نە ئەڤە بوو. ئیراقەک خورت دھات واتەیا کوردستانەکا زەعیف. د ئاڤا کرنا ئیراقێ دە بوون سەرکێش. پشتی کو دەرفەت کەت دەستێ عەرەبان، دەست درێژی ل سەر دەستکەفتنێن ملەتێ کورد کرن و خوەستن ب تەھدیدا برچیبوونێ ملەتێ کورد تەربییە بکن! ژ بەر کو کوردان د دەستوورا نوو یا ئیراقێ دە مادەیەک، “کو ئیراق دەستدرێژیێ ل سەر مافێ کوردان بکە و دەستوورێ بنپێ بکە، مافێ کوردان کو ژ ئیراقێ جوودا ببن و دەولەتا خوە ئاڤابکن” بجیھ نەکربوون، ڤێ یەکێ دەست و لنگێ کوردان گرێ ددا. د رەفەراندووما 2017 دە، ئەڤ تونەیی وەک ئاستەنگ دەرکەت بەر کوردان.
د 2014 دە داعش ئێریش ئانی سەر کوردستانێ. شنگال، مووسل و دەشتا نەینەوا کەت دەستێ داعشێ و ھەتا کەرکووکێ داگیر کرن. ئارتێشا ئیراقێ شەر نەکر و تێک چوو. چەکێن خوە رادەستی داعشێ کرن و ب ئەمرێ سەرۆکوەزیرێ وێ دەمێ نووری ئەل-مالکی بپاش دە کشییا و شکەست. دیسا پێشمەرگێن کوردستانێ، ئەڤ ھەرێم ھەموو رزگار کر و ب ھەزاران جانگۆری دا. د بپاشدە کشاندنا ئارتێشا ئیراقێ دە ئارمانجەک ھەبوو، کو بجارەکێ دە کوردستان تێکەڤە دەستێ داعشێ و کورد دەستکەڤتنێن خوە وەندا بکن. ئەڤ پیلانەک دژمنانە بوو. لێ پێشمەرگێن کوردستانێ ب پشتەڤانییا ئەمەریکا و ھێزێن ھەڤپەیمانان پێشی لێ گرتن و ئەڤ دەرفەت نەدان داعشێ.
ئیراقێ، د 2017 دە جارەک دن ئەو دەولەتا ھلوەشییایی کو ب دەستێ کوردان ھات ئاڤاکرن، دەستوورا ئیراقێ یا فەدەرال بنپێ کر و میتۆدێن لەشکەری ل ھەنبەر کوردان بکار ئانین. د شەرێ ل ھەنبەر داعش دە ئەو ھەرێمێن ل گۆر مادەیا 140 کو ل ھێڤییا رەفەراندوومێ بوون، کو ب خوینا ھەزاران جانگۆرییا ھاتبوو رزگار کرن، جارەک دن ژ لایێ ئیراقێ ڤە ھاتن داگیرکرن. ئەڤ ھەرێمە ژ %40 ئاخا کوردستانێڤیە و دڤیابوو د 2007 دە رەفەراندووم لێ بھاتا چێکرن. مخابن ئەڤ رەفەراندووم نەھات چێکرن و رۆژ ب رۆژ ئیراقێ، ب کریارێن خوە دەمۆگرافییا ڤان ھەرێمان دگوھەرە.
بودجەیا کوردستانێ، مووچەیێ کارمەندێن کوردستانێ، پارا بچەک کرنا پێشمەرگان، وەک چەک ل ھەنبەر کوردستانێ تێت بکارئانین.
ئیرۆ دەرفەتەک نوو و پێڤاژۆکەک نوو ل باشوورێ رۆژئاڤایێ کوردستانێ ژی دەرکەتییە بەر کوردان. پشتی 13 سالان شەرێ ناڤخوەیی یێ سوورییەیێ، رەژیما بەعس یا سوورییەیێ ھلوەشییا. ئەڤ 13 سالە ھەرێمەک دیفاکتۆ د دەستێ کوردان دە ھەیە. ب ھاتنا داعشێ ئەمەریکا و ھێزێن ھەڤپەیمانان ژی ل ھەرێمێ بجیھ بوون. ھێزەکا لەشکەری یا خورت ژی د دەستێ کوردان دە ھەیە. ئەڤ ھێزا لەشکەری، دەھقات ژ ھێزا سوورییەیێ خورتترە. مخابن عەینی شاشیێن کو ل ئیراقێ ھاتن کرن، کورد دخوازن ل سوورییەیێ ژی دوبارە بکن.
ئەو کوردێن کو ئەڤ ھێز ددەستێن وان دەیە، دخوازن “ئالا سوورییەیێ ھلگرن و ھەرن شامێ”(!) ئەڤە خەتەرییەک مەزنە. ل شوونا ڤێ دەرفەتێ ژ بۆنا خوە بکاربینن، دخوازن بخن خزمەتا شامێ، ئەڤە مالخرابییە.
ئاڤاکرنا دەولەتا سوورییەیێ نە ئەرکێ کوردانە. بەری ھەرتشتی دڤێت کورد، ناڤمالا خوە ئاڤابکن. ب ھەڤ رە بخەبتن و دان و ستەندنێن، ھند ژ بۆنا باشوورێ رۆژئاڤایێ کوردستانێ و ھند ژی ژ بۆنا سوورییەک چاوا یەکدەست بن.
