“دەولەت دبێژیتە پەکەکێ ئەز چ مامەلێ لگەل تە ناکم. دڤێت تو بێ شەرت و مەرج تەسلیم ببی”
دامەزرینەر، سەرۆک و رێبەرێ پەکەکێ، کو موریدێن وی “ب دل، ب خوین، بجان و بمال” ژێ رە بوون کۆلە، بێ کو رۆژەک لسەر ڤێ رێخستنا ب قرێژ راوەستن.
عەبدوللاھ ئۆجالان، بێ کو ژ بۆنا موریدێن خوە شەرت و مەرجەکی ژی بخوازە، ب رێیا تەڤگەرا خوە یا لەگال “ل گۆری یاسایێ است و دروست” بانگەک ژ پەکەکێ رە دەرخست:
“چاوا کو ھەر جڤاک و پارتیەک ھەمدەم کو ھەبوونا وێ ب دارێ زۆرێ نەھاتیە بداویکرن، ھوون ژی ب دلداری کۆنگرەیا خوە بجڤینن و بریاران بستینن؛ دڤێت ھەموو کۆم چەکێن خوە دەینن و پەکەکە خوە هلوەشینە.”
ھەلبەت عەبدوللاھ ئۆجالان لگەل رایەدارێن کوور یێن دەولەتا ترک، ئەڤ رێخستن ئاڤا کرنە و ب ستراتەژییەکا ب قرێژ ئەڤ 40 سالن خستنە پاخلا ملەتێ کورد و کوردستانێ.
دیسا دەولەتا ترک لگەل ئۆجالان داویێ ل ڤێ ستراتەژییا چەکبکارئانینێ تینە. دەستپێکێ بریارا وان بوو. ئیرۆ ژی بریارا وانە. کوردێن کو ب ڤان رە تێکلدار بوون و بەدەل دان، دۆھ بریارا وان بوو ئیرۆ ژی بریارا وانە. لێ ئەڤ کوردێن کو بەدێل دان، دڤێت ل ھەنبەر ملەتێ خوە و وەلاتێ خوە دروست بن!
سەرۆک و رێبەرێ وان، ژ وان رە ڤەکری دبێژە:
“نەتەوە دەولەتێن جودا، فەدەراسیۆن، خوەسەریا ئیداری و چارەسەریێن کولتورالیست کو ئەنجاما پێویستا نەتەوەپەرەستیا توندن، نکارن ژ سۆسیۆلۆژیا جڤاکا دیرۆکی رە ببن بەرسڤ.”
یان ب زمانەکی فێھمکری دبێژە؛ ژ کوردان رە دەولەت نە لازمە، فەدەراسیۆن نە لازمە، حوکمێ چاندی و مافێن چاندی ژی نە لازمن. خوەستنا ڤان ستاتوویێن سییاسی نەتەوەپەستییە.
باشە، وە ب چ باوەرکر و ھوون دەرکەتن سەرێ چییایێن کوردستانێ و وە چەک ھلگرت؟ ئارمانجا وە چ بوو؟
ژ بۆنا چ ب سالان ھوون د زیندانێن ترکان دە راسەری زلمێ ھاتن و 10 سالان، 15 سالان، 20 سالان، 30 سالان ئەو ژییانا وە د گرتینگەھێن ترکان دە دەرباس بوو و ھوون مرن؟
ژ بۆنا کورد و کوردستانێ بوو، یان ژ بۆنا “سەرۆک ئاپۆ، رێبەر ئاپۆ” بوو؟
ئیرۆی ئۆجالان نە تەنێ ل سەر ناڤێ پەکەکێ، ل سەر ناڤێ ملەتێ کورد دبێژە؛ “دەولەت، فەدەراسیۆن، ئۆتۆنۆمی و مافێن چاندی” ژی دناڤ دە تشتەکی ژ بۆ کوردان ناخوازم. خوەستنا ڤان ستاتوویان نەتەوەپەرەستییە. ھوون ب چەپکان بەژنا خوە ل بەر دتەوینن.
ئەوقاس ئەرزان بوو مرنا وە، خوینا وە، شەرڤانییا وە، بەرخوەدانا وە؟
ھەموو پارتی، شەخسییەت، بەشەک مەزن ژ زانا و رەوشەنبیرێن کورد، ل ھێڤییا گۆتنێن ئۆجالانن کو سێحربازییەک ژێ دەرکەڤە. یێن کو ب ناڤێ مەزن فالا ڤەدگرن و خوەلییێ ل سەرێ خوە دکن، یێن کو ل بەندا ئەنجاما فالا نە!
ئەڤ یەک ب یەک ئیسپات دکە کو د 40 سالان دە ڤێ پارادیگمایا دەولەتا ترک، کو ب دەستێ ئۆجالان و پەکەکێ خست پاخلا کورد و کوردستانێ، نە تەنێ ژ ھێلا مال، ملک و جان دە، ژ ھێلا رامانێ و ھشمەندییا ملی دە ژی مال ل کوردان خەرابکرییە. ئەگەر ئۆجالان و دەولەتا ترک قەناعەت ب ڤێ نەئانیبا، ل ناڤ چاڤێ کوردان نەدنێری و ژ وان رە نەدگۆت “ھوون نە هەژی تشتەکی نە”! ئۆجالان و دەولەتا ترکان ھێز و وێرەکتییا خوە ژ ڤر دگرە.
د دنیایێ دە ملەتەک تنەیە کو پشتی مالخەرابییا 40 سالان، یەک دەرکەڤە و ژ ملەتەکی 60 ملییۆنی رە، کو لسەر ئاخا خوە کۆلە و ژ بۆنا ئازادییا خوە، ب ملییۆنان جانگۆری دانە رە بێژە؛ “ھوون نە هەژی تشتەکی نە، تەنێ کۆلەتی پارا وە، قەدەرا وەیە” و ئەو موریدێن وی ژی ب کلیلییان و ب چەپکان ڤان گۆتنێن وی پێشەوازی بکن. مالخەرابییا مەزن ئەڤ ب خوەیە. رەوشەنبیر، سییاسەتمەدار و ئاقلمەندێن ڤی ملمەتی ژی ھین ل بەندێ نە، کا دێ ئۆجالان چ ژ بۆ کوردان بخوازە!
بێ شەرم ھندەک دەردکەڤن و دبێژن:
“ئەگەر ئەم ڤەگەرن 500 سال یان ھەتا 1000 سالان بەرێ، ئەم دبینن کو کورد و ترک ھەر ب ھەڤ رە بوونە. ژ بەر ڤێ ئەم دبێژن کورد ژی یەک ژ دامەزرێنەرێن ڤێ دەولەتێ نە و کورد ژی خوەدیێ ڤێ دەولەتێ نە و خوەدیێ ڤی وەلاتی نە.”
ھەی مالخەرابنۆ، ما کەنگی کورد و ترکان براتییا 1000 سالی لدار خستییە؟
ھوون دیرۆکێ ژی سەر و بن دکن!
تێکلییێن کوردان لگەل دەولەتا عۆسمانی، چ پەیوەندی ب ترکان نینە. ترکێن کو ب دامەزراندنا دەولەتا ترکییەیێ رە د تاقیگەهێن دەولەتا ترکییێ دە ب میتۆدێن بشافتنێ ھاتنە بەرهەمانین و بوونە ترک، چ پەیوەندی ب عۆسمانییان ڤە نینە. یەکی ترک د ناڤ ئیمپەراتۆرییا عۆسمانییان دە نەبوویە دەرگەڤانێ عۆسمانییان ژی. ئەڤ دیرۆک ژ وان رە ما و ژ خوە رە کرن بنگەھا ملەتبوونێ. دیرۆکا ترکان 101 سالن. وان 899 سالان ژی باڤێن زبالێ!
دیرۆکا مە و ترکان یا 101 سالی ژی ل ئۆرتێیە. ب ئینکار، بشافتنێ، ب جینۆساید و کۆمکوژییان، ب زیندان و زلمێ ل ئۆرتێیە. ژ بۆنا کو ھوون ڤێ ڤەشێرن، بەحسا نەبی نووح نەکن ژ بۆ کوردان. بەعسا کرنێن ترکان و دەولەتا ترکان بکن!
عەبدوللاھ ئۆجالان، چیرۆک و دەرەوێن دەولەتا ترکان ژ وەرە دبێژە، لێ ھوون تشتەکی دن فێھم دکن:
“دو سەد سالێن داوی یێن مۆدەرنیتەیا کاپیتالیست، شکاندنا ڤێ تفاقێ ژ خوە رە کریە ئارمانج. ھێزێن کو باندۆر ل وان بوویە، لگەل بنگەھێن خوەیێن چینی، خزمەتا ڤێ یەکێ ئەساس گرتنە.”
عەبدوللاھ ئۆجالان، ژ وەرە زەلال دبێژە؛ یێن کو دخوازن وە ژ “براتییا ترکان” ڤەقەتینن، ھێزێن داگیرکەرن. ئەو بەرخوەدانێن کوردان یێن سەدسالی ھەموو ھاتن لیستکا ئەمپەریالیستان. ھێزێن ئەمپەریالیستان بەرژەوەندییێن خوە ئەساس گرتنە. نەیێن لیستکا وان و بنگەھا ترکیەییبوونێ، رێیا ترکبوونێ ژ خوە رە ھلبژێرن و دەمجی دەولەتا ترکان ببن.
“رێزگرتنا ناسنامەیان، ئازادیا رامانێ، رێخستنبوونا دەمۆکراتیک، ئاڤاکرنا جڤاکی-ئابۆری و سیاسییا ھەموو پێکھاتەیان، تەنێ ب ھەبوونا جڤاک و قادا سیاسییا دەمۆکراتیک ممکنە.”
چ دبێژە؟
دبێژە، ھوون کۆلە بمینن، دۆزا دەولەت، فەدەراسیۆن، ئۆتۆنۆمی و مافێ چاندی نەکن، لێ ھوون ژ ھێلا رامانێ دە ئازادن! ب شەرتێ کو ھوون دۆزا جوودابوونێ و ئاڤاکرنا دەولەتێ نەکن. د بن سییا دەولەتا ترکان دە، ب “ئاڤاکرنا جڤاکی-ئابۆری و سیاسی”، وەک کۆلەیێن ترکان بژین. وێ تەڤگەرا “پارادیگمایا نوو” ڤی دەرییێ “ترکبوونێ” ژ وە کوردان رە ڤەکە.
پیلان و پرۆژەیا پارادیگمایا دەولەتا ترکان و ئۆجالان ئەڤە و بەشەک مەزن ژ موریدێن ئۆجالان و بەشەک ژ کوردان ل ھێڤییێ نە کو رێیا سییاسەتێ ژ وان رە ڤەبە!
ژ بن شەوقا ئۆجالان کەڤۆکەک سپی بفرە!
خوەدێ ئاقلی بدە مە!
