بووبێ ئەسەر
پرانیا سیاسەتمەدار و وەلاتپارێزێن کورد ھێژ ژی عەڤدللا ناسنەکرنە و کەسێن ل ئۆرتێ ژی مانە، ھێڤی دکن کو دێ رۆژەکێ عەڤدللا کوردستانێ ئازاد بکە. لێ نایێ بیرا وان کو وی نەگۆتیە ئەز دێ کوردستانێ ئازاد بکم. تم گۆتیە کو ئەزێ کوردستانێ “خەلاس” بکم. ئازادکرن و خەلاسکرن دو تشتێن دژبەرێ ھەڤن. واتە ل گۆر بکارئانینا وان، واتەیا وان ژی تێ گوھەراندن.
لێ ھەزار مخابن رۆژا کو عەڤدللا گۆتبوو “ئەز دێ کوردستانێ خەلەس بکم”. پرانیێ فێم نەکربوون کو ئەو نە ئازادی ئانگۆ ب تەمامی خەلاسکرنا کوردان بوو. ھەتا نھا ژی پرانیا کوردان وێ بێژەیا وی وەکە ئەو دێ ژ وان رە کوردستانێ ئازاد بکە، فێم کرنە. لۆما ژی مال و ملکێن خوە، جەوھەر، زێر و پەرەیێن خوە، زارۆک و جوانێن خوە پێشکێشی پەکەکێ کربوون دا کو رۆژەکێ بکاربن ئازادیێ ببینن و ل سەر ئەردا خوە وەکە مرۆڤان بژین.
لێ نایێ بیرا پرانیا کوردان کو پشتی وێ گۆتنا خوە عەڤدللا دیسا گۆتبوو: “ھەتا کو ئەز و پەکەکە ھەبن دێ بارزانی (واتە کورد) نکاربە دەولەتا کوردی ئاڤا بکە”. لێ ھەزار مخابن کو پرانیا پارتی و رێخستنێن مە ژ رۆژا رۆژ ئەڤ فێم نەکرن، لۆما پرانیێ خوە ل بەر ئەربانێ پەکەکێ کلدکرن ئانگۆ گۆڤاندا تونەبوونا خوە دگەراندن. ژ بەر ڤێ نەفێمکرنێ پرانی وەختێ خوە ب گۆتنێن پووچ و ب نەرینێن ترسۆنەکی ھەتا رۆژا ئیرۆ دەرباس کرن.
ژ بەر وێ ترسۆنەکیێ، نەفێمکرن و بێ ھەلوەستیا کوردێن وەلاتپارێز، پارتی و رێخستنێن کوردستانی، نکارن و ناخوازن د بن کۆنەکی نەتەوەیی دە تەمسیلەکا کوردی ئاڤا بکن. حەیفە!!! رۆژ ب رۆژ ھێژاییێن کوردان ل بەر چاڤێن مە وەندا دبن. کورد و ھزرا نەتەوەیی دحەلە. ھێژ ژی پارتی و رێخستنێن ژ خوە رە دبێژن ئەم کوردستانی نە، ڤێ رەوشێ نابینن. یا راستی دبینن لێ وەھا ژ وان رە خوەشتر تێ.
مە گەلەک جاران گۆتیە و دبێژین: پرۆژەیا نھا کو ل گۆر داخوازا دەولەتێ و ل سەر دەستێ پەکەکێ تێ مەشاندن، ژ بنی دە، ژ ھۆلێ راکرن و تونەبوونا کوردانە.
سەدەما ڤێ ژی، شەری چەکداری یێ کو نە د بەرژەوەندیا کوردان دە بوو کو زێدەیی چل سالان ئاژۆت. ب سایا وی شەرێ پەکەکێ ل گۆر بەرژەوەندیا داگیرکەران، کورد تەسلیم گرتن. زۆر و تەعدا ل وان کر. چاڤترساندی کرن. عۆرف و عادەتێن کوردان ژ ناڤا وان راکرن. زمانێ وان ژ دەڤێ وان دەرخست یێ ترکان خستە دەڤێ کوردان. ژ بەر کو وان زانیبوون ھەگەر ملەتەک ل سەر کۆکا خوە مەزن نەبە، عادەتێن وی یێن نەتەوەیی دێ تێک چن، ئەو ملەت، ئەو خەلک ژی دبە وەکە پەزی. شڤان ژی بەرێ پەزێ خوە بدە کو وێ کەری ژی ل دو وی ھەرە.
ژ بەر کو پەز تەنھا دزانە کو دەما شڤان ل بلوورێ بخوە یان دێ وان بتە سەر ئاڤێ یان ژی سەر چەروانی کو زکێ خوە داگرن. نھا رەوشا باکورێ کوردستانێ ژی وەھا بوویە. ب سایا وی شەرێ دوور و درێژ عەڤدللا کرنە شڤان و ئەو ژی چاوا دخوازە بەرێ چڤاتێ ددە ور.
خەلکێ بەدەلێن مەزن دانە و ب سالان ژ خوە رە تەنھا شڤانەک دیتنە کو دەما شڤان ل بلوورا خوە بدە. جڤاتا ژ دەنگێ بلوورا وی تو دەنگێن دن نەبھیستنە، بەرێ خوە ددن ڤر. نکارن بفکرن کو دێ ئەو دەنگ وان ب کو دە ببە.
جار جارنا دەنگ و مەقامێ وێ بلوورێ ب وان رە ھزرا نەتەوەیی خورت دکە و دفکرە کو ئەو مەقامێ ئازادی و سەرخوەبوونا وییە، ژ بۆنا ملەت ژی گۆڤەندەکێ بگرە دەستێن خوە یێن پاقژ دخە ناڤا وان دەستێن ب خوینا وان ھاتنە شوشتن. پشتی دەست ھاتن زەڤت کرن ئێدی نەما دکارە دەستێن خوە ژ ناڤا یێن دن دەرخە و خوە ژ گۆڤەندێ دوور بخە.
ژ بەر کیژان دەست بکەڤە ناڤا وان دەستێن ب خوینا کوردان ھاتنە شوشتنێ، ئێدی زەحمەتە کو خوە ژێ ئازاد بکی.
پارتی و رێخستنێن کوردستانی ژی ژ دوورڤە ل وێ گۆڤەندێ تەماشە دکرن و دکن. ددیتن و دبینن کو سەرگۆڤەند، گۆڤەندێ شاش دگەرینە، لێ دەنگێ خوە نەکربوون و ناکن. لۆما ژی سەرکێشێ گۆڤەندێ ئەو ب زانەتی وێ گۆڤەندێ شاش دگەرینە کو ملەت فێری گۆڤەندا شاش دکر. مەبەستا شاش گەراندنا گۆڤەند ئەو بوو کو ملەت ژ ھێژاییێن خوە ب دوور بکەڤن. ئیرۆ ئەم ڤێ دژین.
د رەوشێن وەھا دە کەس و کەسایەتی نەما دکارن گۆڤەندا راست و یا ملی ب خەلکێ خوە بدە فێم کرنێ کو گۆڤەندا ئەو دگەرینن شاش و چەوتە. تو نەما دکاری ب وان بدی زانین کو ئەڤ گۆڤەند نەیا تەیە.
وەکە ئەم دزانین کو ملەتەک ب عۆرف و عادەتێن خوە ھەیە. ب رەقس و گۆڤەندا خوە ھەیە، ب زمان و ھەبوونە خوە ھەیە. لێ ھەزار مخابن ئیرۆ ئەڤە ل باکورێ کوردستانێ نەمانە یان ژی پر ھندک مانە.
چارەسەری:
سەرگۆڤەندەکی ب ھزر، ب بیر و باوەریا نەتەوە داگرتی، وێرەک، جوان و خوین گەرم کو بکاربە ل گۆر مەقامێ کوردەواری سەرگۆڤەندێ بگەرینە، لازمە. رەنگ و دەنگێ گۆڤەندێ سەرکێشێ وێ دیار دکە. ژ بەر کو ئیرۆ پرانیا سەرگۆڤەندا کوردان ل باکور، نە سەرگۆڤەندن. ھندەکێن سەرگۆڤەندی ژی دگرن ئیرۆ کال و پیر بوونە. لۆما نکارن ببن سەرگۆڤەند. یێن دبن ژی گۆڤەندێ تێک دبن.
ژ بەر ڤێیە کو خەلک، ملەت پرانی کەتنە رەوشا تەنێ خوە کلکرنێ کو د گۆڤەندەکێ دە جھ دگرن. لێ سەر گۆڤەند گرینگە.یێن گۆڤەندێ خوەش و دەلال دگەرینن سەرگۆڤەندێن زیرەک و ژێھاتینە. لەورا ژی دڤێت ئەم ژ بۆنا تەڤگەرا باکورێ کوردستانێ سەرگۆڤەندەکی ب راستی بکاربە گۆڤەندا کوردی ل گۆر رەقس و مەقامێ وێ بدە لیستن پەیدە بکن.
د ناڤا مە کوردان دە کەس و کەسایەتیێن وەھا پرن. لێ مخابن ئەم خوەدی ل وان دەرناکەڤین. ب ھێز و قاوەتا خوە پشتگری نادن کو ئەو ببە سەرگۆڤەند دا کو گۆڤەندەکا راست و ل گۆر عادەتێن کوردان بگەرینە…
