به‌سه‌ عه‌بێ !

سمکۆ عەبدولعەزیزی

 د یەک ژ باژارێن کوردستانێ دە ژنەکا جوان هەبوو، ڤێ ژنێ کارێ نیگارکێشیێ دکر، ئەو وسا دفکری کو ب ڤی کاری دێ بکاربە خزمەتەکی پێشکێشی وەلاتێ خوە بکە، ئەو بووبوو ئەڤیندارا کەسەکی ب ناڤێ عەبێ، عەبێ مرۆڤەکی خەیال پەرەست و سێحرباز بوو، ب رێیا زمانخوەشیێ و ڤەگێرانا هزرێن هزرمەندان یێن گرێدایی گرنگیا رزگاربوونا ئاخێ و ئازادیا کوردان، کەڤنەشۆپیا جڤاکا کوردی و سۆسیالیزما راستەقینە کاریبوو خوە بخە ناخێ وێ ژنێ دە. ب ڤی ئاوا ژن بووبوو ئەڤیندارا عەبێ و دەمەکی ڤێ ئەڤینداریێ دەوام کر.

دەما عەبێ پشتراست بوی ژن کەتیە عەشقا وی دە، وێ دەمێ عەبێ دەست ب قۆناغا دویەمین یا پلانا خوە ل سەر وێ ژنێ کر، عەبێ چەندین بریارێن خوە وەکە “نابە ڤێ ڤەخوارنێ ڤەخۆی، نابە ڤان جل و بەرگان ل خوە بکی و هتد…” ل سەر وێ ژنێ سەپاندن.

ب دەرباسبوونا دەمی و ب ڤان بریار و کریارێن عەبێ ژنێ هست ب وێ یەکێ کر کو هێدی هێدی ئەو کەساتیا خوە ژ دەست ددە، و کەساتیا وێ د ناڤا کەساتیا عەبێ دە تێ حەلاندن.

 شەڤەک ژ شەڤان دەما رەشەبایەک بهێز دهات، ئەو ژن ل هەمبەر نەینکێ راوەستابوو و ل سەروچاڤێن خوە دنێری، نەینک نەیا پاقژ بوو، پارچەیەک قوماشی هلگرت هەیا کو بکاربە نەینکێ پاقژ بکە، دەملدەست نەینک د دەستێ وێ دە دشکیت و پرت پرت دبیت، دەما د وێ نەینکا شکەستی دە ل سەروچاڤێن خوە نیری، ل شوونا سەروچاڤێن خوە ببینە وێ ژنێ خوە ب زنجیرێن نەدیار زنجیرکری دیت و چەندین کەڤالێن رەش یێن بێی ژیان کەتن بەر چاڤێن وێ.

ب دیتنا وان کەڤالان گهیشت وێ باوەریێ کو؛ ڤیان نە خوەدیێ بوونە، بەلکو ڤیان واتەیا وێ ئەوە کو مرۆڤ ئازاد بت نە کو کۆلەیێ کەسێ بەرامبەری خوە بت.

پشتی کو ئەڤ ژنە گهشتیە ڤێ هزرێ بریار دا تێکلیا خوە لگەل عەبێ قوت بکە، ئەڤ قوت بوون ب وێ واتەیێ کو ئێدی ژ عەبێ حەز ناکە نایێ، بەلکو ئەڤ قوتبوونە تێ وێ واتەیێ کو بەری هەر کەسەکی وێ ڤیان ژ بۆی خوە هەبە پشترا بۆ کەسەک دن. پشترە ڤێ ژنێ بریار دا کەڤالەک نوو چێبکە، لێ کەڤالەک نوو کو بێ سینۆر بە، مینا سیمۆن دی بفوارا فرەنسی دبێژە، “دەما تە ڤیان کر نایێ وێ واتەیێ کو تو دەستان ژ خوە بەردی”.

چما ئەز ڤێ چیرۆکێ باس دکم؟ من ئەڤ چیرۆک لۆما باس کر ژ بەر کو د بیرەوەرییا 8ێ ئادارێ دە، عەڤدللا ئۆجالان بانگی ژنان ب گشتی و ژنێن کورد ب تایبەتی دکە و هەول ددە تێزا خوە ب گۆتنێن فیلسۆفا فرەنسی “سیمون دی بفوار” ئیسپات بکە.

ئەز وسا دفکرم کو ئۆجالان شاش ئەڤ فیلسۆفە فێم کریە، ژ بەر کو ئەڤ فیلسۆف نەرینا خوە وسا بەرچاڤ دکە کو نابە مرۆڤ د ئەنجاما ڤیانێ دە هەیا داویا ژیانا خوە ببە کۆلەیێ حەزکریێ خوە، ب تایبەت دەما حەزکریێ مرۆڤ ببە دکتاتۆر ل سەر حەزکریا خوە، ئەڤ فیلسۆف دبێژە، دەما حەزکریێ تە هەول ددە کەساتیا تە هلوەشینە تە ب خوە هلدوەشینە و تە د ناڤا کەساتیا خوە دە سینۆردار دکە، لۆما د وێ دەمێ دە پێویست دکە ئەو تێکلی وەرە قوت کرن.

ب هەزاران ژن و کەچێن کورد هەبوونە کو دەست ژ هەموو خوەشی و پێویستیێن ژیانا خوە بەردابوون و کەتبوون بن باندۆرا هزرا ئۆجالان و ئەو مینا پێغەمبەرەکی مێزە دکر، ئەڤ ژن گهیشتبوون وێ باوەریێ کو ئۆجالان دێ کوردستانا مەزن رزگار کت و دێ دەولەتا کوردی دامەزرینت و مرۆڤێ کورد سەربەخۆ و ئازاد بکە و ژن دێ بتە کارەکتەرەک سەرەکی د برێڤەبرنا وەلاتی دە، لێ بەلێ ئیرۆ، عەڤدللا ئۆجالان دبێژە، نە مە دەولەتا کوردی و نە خوەسەری و نەژی فەدەراسیۆنەک کوردی دڤێت و هزرا نەتەوی پاشڤەروویی یە. د ڤی دەمی دە پیویست دکە ژنێن کورد و ب تایبەت یێن نها د ناڤا پەکەکێ دە ببێژن پارتیا خوە و ئۆجالان، حەتا ڤێرە و ئێدی بەسە.