چاڤکانیەکێ ژ حکوومەتا ئیراقێ راگەھاندیە، “پەیامەکا نەراستەراست گەھشتیە حکوومەتا ئیراقێ کو تەکەز کریە مافێن دارایی یێن سەرکردەیێن کۆمێن چەکدار خەرج نەکە.”
چاڤکانیەکێ ژ حکوومەتا ئیراقێ ژ بۆ مەدیایێن ناڤخوەیی راگەھاندیە، “ئامەریکایێ پەیامەک ب رێیا ناڤبەینکاران دایە ئالیێن حکوومەتێ کو، وان مافێن دارایی یێن گرێدایی سەرەدەریا پرۆژەیێن وەبەرھێنانێ و پرۆژەیێن دن ژ بۆ وان کەسان خەرج نەکن کو بەرپرسیاریتی د حەشدا شەعبی دە ھەیە.”
وێ چاڤکانیا ئاماژە ژی دایە، “ممکنە ئەو پەیام ببە سەدەما دەرخستنا بریارێ ژ ئالیێ وەزارەتا گەنجینەیێ یا ئامەریکایێ ڤە کو سزایی ل سەر وان سەرکردەیان بسەپینە، ژ بلی وان دەزگەھ و پرۆژەیان یێن کو ئەو سەرپەرشتیا وان دکن.”
حەشدا شەعبی ل سالا 2014 ھاتیە دامەزراندن و ژ ھەژمارەکا کۆمێن شیعەیان پێک ھاتیە، ئامەریکایێ ژ بەر تۆمەتێن بنپێکرنا مافێن مرۆڤان و تەڤلیبوونا د چالاکیێن ل دژی ئامەریکایێ دە سزا ل سەر ھەژمارەکا سەرکردەیێن حەشدا شەعبی سەپاندیە.
بەرپرسەکی بانکا ناڤەندی یا ئیراقێ ژی کو داخواز کر ناڤێ وی نەیێ ئەشکەرەکرن ژ ئالیێ خوە ڤە ھەر ژ بۆ وێ چاڤکانیێ گۆت، “بانکا ناڤەندی یا ئیراقێ ژ دانا مووچەیان یان تەرخانکرنا پارە ژ بۆ ھێزێن حەشدا شەعبی بەرپرس نینە، لەوما ھەر ھایدارکرنەکا ل سەر ڤێ دۆزێ ھەبە راستەراست ناگەھە دەستێ مە.”
