سەرۆککۆمارێ ترکیەیێ ئامادەبوونا خوە ژ بۆ پێشوازیکرنا ل شاندا دەم پارتیێ یا ئیمرالیێ دیار کر و گۆت: «ئه‌ز ئامادەیە پێشوازیا وان بکە». ل بەرانبەری ڤان گۆتنان، دەم پارتی ئیرۆ یان سبە داخوازنامەیێ ژ بۆ دیتنا سەرۆککۆمارێ ترکیەیێ پێشکێش دکە.
دەم پارتیێ دەست ب گەرا دویێ یا سەردانا پارت و ئالیێن سیاسی کریە، ژ بۆ کو یەکدەنگیەکە تەمام پێخەمەتی سەرکەفتنا قۆناغا نوو یا چارەسەریا دۆزا کوردان ل ترکیەیێ هەبە. چاڤەرێ تێ کرن کو شاندا ناڤبری ل رۆژا 17ێ ڤێ مەهێ ب پارتیا داد و پێشخستنێ یا ترکیەیێ (ئاک پارتی) و تەڤگەرا نەتەوەیی (مه‌هه‌پێ) رە بجڤە.
ئەردۆگان راگەهاند، «ئەم ژ بۆ ترکیەیەکە بێ تەرۆر کار دکن، هەروەسا ئەم ئارێشەیەکە 40 سالی ژی چارە دکن. شاشفێمکرنا ڤێ پرۆسەیێ و پەیداکرنا دەرزان ل ناڤ وێ خزمەتکرنا ئەمپەریالیزمێیە».
ناڤبری تەکەز ژی کر، «هەر کەسەکێ ب گۆتنا ئەمپەریالیزمێ بزاڤێ ژ بۆ تێکدانا ڤێ براتیێ بکە، دێ خوە ل بەرانبەری مە و 85 ملیۆن وەلاتیان ببینە، ژ بەر کو مە د دەما 22 سالان دە گەلەک جاران ئەڤ بزاڤ دیتنە».
سەرۆککۆمارێ ترکیەیێ هەروەسا گۆت، «ئێدی ئەو نکارن زرارێ بگەهینن براتیا ناڤبەرا مە، جارەکە دن نکارن ڤی مللەتی د ناڤ ئەجێندایا خوە دە ئاسێ بکن».
ئەردۆگان رۆن ژی کر، «سەرۆکێ کۆما مە نها هەلسەنگاندنێ ب وێ شاندێ رە دکە. ئەگەر شاندا ئیمرالیێ داخوازێ ژ بۆ جڤینا ب من رە پێشکێش بکە، ئەز دێ بەرسڤا داخوازا وان بدم».
تونجەر باکرهان پشتی ڤێ پەیامێ راگەهاند کو، ئیرۆ یان سبە داخوازنامە تێ پێشکێشکرن، ژ بۆ کو شاندا دەم پارتیێ ب سەرۆککۆمار ئەردۆگان رە بجڤە. هەڤدیتن و جڤین ئیرۆ ژی بەردەوام بوون، بریارە کو دەم پارتی ل رۆژا 17ێ ب ئاک پارتی و مه‌هه‌پێ رە بجڤە.
