د 10ێ ئادارا 2025 دە، د ناڤبەرا مەزلووم عەبدی و سەرۆککۆمارێ دیفاکتۆیێ سوورییەیێ دە رێکەفتنەک ھات ئیمزاکرن. د دەستپێکا رێکەفتنێ دە، ل سەر سەبەبێن ئیمزاکرنا “رێکەفتنێ” دە دھات گۆتن کو:
“ل سەر بنگەھا ھەڤدیتنا ناڤبەرا برێز سەرۆککۆمار ئەحمەد شەرع و برێز مەزلووم عەبدی، 10 ئادارا 2025 رۆژا دوشەمبێ، ل سەر ڤان خالێن ژێرین رێکەفتن چێبوو.”
د ماددەیا 1ێ دە ئەساسگرتنا پەیمانێ ئەوە کو ھەرکەس، تایبەت ژی کورد د ئاڤاکرنا سوورییێ دە ئەکتف جیھ بگرن. ئەڤ تێ چ واتەیێ؟ تێ واتەیا کو دێ کورد بنە حەمال ژ بۆ ئاڤاکرنا دەولەتا سووریا نوو. ل شوونا کورد ناڤمالا خوە ئاڤابکن، ل دویف ئاڤاکرنا مالا دژمنی دە نە! گەلۆ زارۆکێن کوردان، ژ بۆنا ببن کارمەندێن دەولەتا عەرەبان و ڤێ دەولەتێ ژ نووڤە ئاڤابکن، ئەوقاس جانگۆری دان؟
د مادەیا 2یێ دە گۆتنا “ماف” بێ کو بێتە شرۆڤەکرن، کا ب چ رامان دهێت، گۆتنەک بنگەھ ڤالایە. مافێ چ؟ مافێ وەک ھەموەلاتییەکی سوورییەیێ کو بژیت مافێ وی ھەیە، یان وەک کوردەکی، ل سەر ئاخا باشوورێ رۆژئاڤایێ کوردستانێ خوەدی دەستھلاتدار، کو بژیت مافێ وی ھەیە؟ مافێ وی کو ئارتێشا خوە، پارلەمەنتۆیا خوە، ئاساییشا خوە، قانوونێن خوە ئاڤا بکە و وەک ھەرێمەک خوەدی دەستھلاتدار (فەدەراسیۆن، ئۆتۆنۆمی) کو خوە برێڤە ببە ھەیە؟ ب تەنا سەرێ خوە گۆتنا “ماف” چ واتەیا وێ و گارانتییا وێ نینە.
د مادەیا 3یێ دە ژی بەحسا ئاگربەستێ دکە؛ دێ ل سەر ئاخا سوورییێ ئاگربەست چاوا هێت ئاڤاکرن؟ ب ھەزاران ئیسلامیستێن قاتل، دەستدرێژکار، یێن خوەپەرەست، ئۆزبەک، چیچانی، ترکێن بەربەری ل شامێ کۆم بوونە، بوونە دەستھلاتدار و سوورییە دیفاکتۆ گرتنە دەستێ خوە و لگەل وان “پەیمانا ئاگربەستێ” دهێت ئاڤاکرن! گارانتییا ڤێ چیە؟ ل سەر ئاخا سوورییەیێ ب دەستێ رەژیمێ و ب دەستێ ڤان ھێزێن توندرەو توڤێ دژمناتییێ ھاتییە چاندن. ھەموو پێکھاتەیێن ئۆلی و نەتەوی، مەزھەبی کرنە دژمنێن ھەڤ. بێ کو ھەر پێکھاتە ل سەر ئاخا ھەرێما خوە، خوەبخوە برێڤە ببە، دێ چاوا د بن دەستھلاتدارییەک ناڤەندی دە لھەڤ بێن؟ پێکھاتەیێن سوورییێ یێن ل ھەنبەر ھەڤ ھاتنە بکارئانین و ب دویف ھەیفا خوە دە نە. ھەرکەس ب چاڤەکی “گروبەک توندووتووژییێ” ل وان دنێرە و ل سەر ناڤێ کوردان مەزلووم عەبدی دچە لگەل ڤان پەیمانێ ئیمزە دکە. ئەڤە نە داخوازا ملەتەکی، داخوازا ھندەک ھێزانن، کو نە دلخوازێ کوردانن.
ئەڤ دەمەک درێژە ترکییە، ب رێیا ھێزێن خوەیێن پارامیلیتەر، ل سەر ئاخا سوورییەیێ خەباتەک بێ راوەستیان دمەشینە. ھندەک رۆژئاڤایێ کوردستانێ خستییە بن گەفا شەری و هندەک ژی ب ئالیکارییا عەبدوللاھ ئۆجالان، ب رێیا تەلەفۆنێ و ب نامەیان باندۆرەک مەزن ل سەر مەزلووم عەڤدی چێکربوو. مەزلووم عەڤدی ئەڤ کریار و پرس ژ ملەتێ خوە و ژ ھەڤالێن خوە ڤەشارت. نەئانی زمان، کو عەبدوللاھ ئۆجالان ژ بۆنا ترکان چ ژ وی دخوازە!
ئارمانجا ترکییەیێ ئەوە کو رێگریێ ل دەستکەڤتێ کوردا یێ خوەدی دەستهلاتدارییێ بکە. خویایە د ڤردە ژی دەولەتا ترکان و عەبدوللاھ ئۆجالان سەرکەڤتی دەرکەتن.
د ماددەیا 4ێ دە، کوردان وەک کارمەند، د ئاڤاکرنا سوورییێ دە ئارمانج دکە. ئەڤ ژی تێ واتەیا کو کورد د ئاڤاکرنا سوورییەک نوو دە ببن پشتگر، ھەتا کو ئەڤ دەولەت بێت ئاڤاکرن! پشتی ئاڤاکرن و بھێزکرنا دەولەتا سوورییەیێ، چ بێت سەرێ وە نە گرینگە. ژ بەر کو د ڤێ داخوازێ دە سازییێن کوردان، کو کوردان بپارێزن نەھاتنە دییارکرن.
د ڤر دە بێ کو ستاتوویەکا دییارا کورد ل سەر ئاخا خوە خوە ب خوە، خوە برێڤە ببن، چ “ماف” نە گارانتی نە ژ بۆ کوردان. ئیدیعایێن کو ناڤ لێ نەیێن کرن و نە زەلال بن، ناڤەرۆک و بنگەھا وان نینە.
د مادەیا 5ێ دە ژی دییارە کو ژ بۆنا سوورییەیێ، سوورییەک نوو و فەدەرال نینە. سوورییەک ناڤەندی ھاتییە پرۆژەکرن. ژ بەر وێ ژی لگەل دەولەتا سوورییەیێ “گارانتیکرنا ڤەگەرا ھەموو کۆچبەرێن سووریەیی کو بچن گوند و باژارێن خوە” دپەژرینە. ئەگەر سووریایەکا فەدەرال هاتبا پرۆژەکرن، ڤەگەرا کۆچبەرێن کو، ژ بەر زۆر و زلمێ، ژ بەر شەری رەڤییانە، لگەل حکوومەتا سوورییەیێ نەدھات شیرۆڤەکرن و نەدگرتن ناڤ پەیمانێ. دا دەستهلاتدارییا ھەر ھەرێمەکێ کۆچبەرێن وێ پرۆگرام کن و ژ بۆنا وان داخویانیان دن. مادەم سوورییەک ناڤەندی کو چ پێکھاتە نە خوەدی ستاتووبن بێت ئاڤاکرن، چما ئەوقاس تێگەھێن بێواتە تێن لھەڤ کرن. زەلال بێژن “ل سەرانسەرێ سوورییەیێ دەولەتا سوورییێ دەستھلاتدارە” و قەدییا چوو.
د مادەیا 6 دە ژی پر ئەشکەرە تێت داخوازکرن کو ل ھەنبەر رەژیما ئەسەد، دڤێت ئەڤێن کو ئیرۆ شام دیفاکتۆ گرتنە دەستێ خوە، بێن پاراستن و بێن مەشرووعکرن. کوردان ژی دکن حەمال و شریکێ ڤی کارێ ب قرێژ. دیکتاتۆرەک چوو، لێ یەکی ژێ خەرابتر دیفاکتۆ شام گرتییە دەستێ خوە. مەزلووم عەڤدی دخوازە ببە شریکێ کارەساتێن وان! ئەڤ دەستھلاتدارییا دەستبخوین، دخوازە ب ھێزا کوردان و ب تێکلییێن کوردان خوە مەشرووع بکە.
مادەیا 7ێ ژی کوردان دگرە پشت خوە و دخوازە سوورییەک ناڤەندی ئاڤا بکە. یێن کو بخوازن ل سەر ئاخا سوورییەیێ ژ بۆی خوە ستاتوویان ئاڤا بکن و داخوازا “جوودابوون”ێ بکن، دێ ببن ئارمانج و داخوازێن وان هێن رەدکرن. ئاڤاکرنا 3 یان ژی 4 ھەرێمێن فەدەرال و خوەدی دەستھلاتداری یێن “جوودابوون” تێت قەبوولکرن. مەزلووم عەڤدی ژی ل سەر ناڤێ کوردێن رۆژئاڤایێ کوردستانێ ئەڤە کرییە رێکەفتن. ئەڤە رەدکرنا ستاتوویەک کورد و کوردستانی ب خوەیە.
مادەیا 8ێ ژی، ڤان ھەموو مادەیان ب یەک ئەمری، داخوازا ئاڤاکرنا کۆمیتەیان دکە و بێ شیرۆڤە ئەمرێ جێبەجێکرنا رێکەفتنێ دکە.
د ڤر دە ژی داخویانییەکا مەزلووم عەبدی کو پشتی پەیمانێ د رووپەلا خوە یا (X)ێ دە بەلاڤکرییە. دبێژە:
“ئەم پابەندین کو پاشەرۆژەکا چێتر ئاڤا بکین کو مافێن ھەموو سوورییان گارانتی بکە.”
ب کیژان ھێز و سازییان ھوون دێ “پاشەرۆژەکا چێتر” ئاڤا کن؟
ئەز ژی ژ مەزلووم عەڤدی دپرسم: تو مافێ کیژان سووریان ب کیژان سازی و دەستھلاتدارییان پەسەند دکی؟
تو دێ چاوا “ماف”ێ وان پارێزی؟
قەزدا تە ژ “ماف” چیە؟
