سمکۆ عەبدولعەزیزی

 جارنا د شۆرەشان دە کارێن هەڤدژ تێن کرن، یەک ژ وان هەڤدژییان ژی ئەڤە کو شۆرەشێن رزگاریخوازی دبن ئاموورێن تەپەسەرکرنێ ژ بۆی کەسێن بەشدار د شۆرەشی دە.

گۆتنا “شۆرەش زارۆکێن خوە دخوە” د شۆرەشا فەرەنسی دە پیدا بووبوو، دەما سەرکردەیێن خوە ب سەردەستییا تەرۆرێ سووچبار کرین. لێ بەلێ هەمان گۆتنا کلاسیک د ڤێ سەردەمێ دە ژی د شۆرەشا پەکەکێ یا ب سەرۆکاتیا عەڤدللا ئۆجالان دە ژی پەیدا بوویە.

 یەکەم جار پەکەکێ خوە ب بزاڤەکە شۆرەشگەری یا نەتەوی ددا ناساندن، لێ هەر د زوو دە خوە گوهەرت و ژ بزاڤەکە شۆرەشگەری یا نەتەوی خوە ژ بۆی بزاڤەکە تەسفیەکارا ناڤخوەیی گوهەرت، ئەڤ تەسفیەکرن وان ئەندامان ب خوە ڤە دگرە یێن کو دژاتیا گۆتارا عەڤدللا دکن و نەرینێن وی رەخنە دکن، ئەڤ ئەندامێن پەکەکێ ب سووچا ئیخانەتێ ب رەنگێن جودا جودا تێن تەسفیەکرن.

دەما ڤێ پارتیێ د داوییا سالێن 1970 دە خوە وەکە بزاڤەکە شۆرەشگێری یا نەتەی دای ناساندن و داخوازا ئازادییا کوردستانا مەزن کری، هەژمارەکە هەری زێدە یا کەچ و خورتێن کورد تەڤلی رەفێن ڤێ پارتیێ بوون، ڤان کەچ و خورتان باوەریەکە مەزن ژێ رە دروست بووبوو کو ب رێیا ڤێ پارتیێ ئەوێ بکاربن گەلێ کورد ژ بندەستیا داگیرکەران رزگار بکن و دێ دەولەتا کوردستانا مەزن ئاڤا کن، ژ بەر کو د وێ دەمێ دە ب ئاوایەکی توند ئینکارا شووناسا کوردان دهات کرن.

هەر کو دچوو پەکەکە مەزنتر دبوو و گەلێ کورد ب تایبەت ل باکورێ کوردستانێ ل دەردۆرا ڤێ پارتیێ کۆم دبوو، دەما پەکەکێ جیهێ لنگێن خوە د ناڤا گەلێ کورد دە کری، د لۆتکەیا بهێزبوونا وێ دە گوهەرینەکە ستراتەژی د ناڤا ڤێ پارتیێ دە روودا.

ئەڤ گوهەرتنا ستراتەژی ب تایبەتی ل با سەرۆکێ ڤێ پارتیێ دروست بوو، د ڤێ گوهەرتنا ستراتەژی دە عەڤدللا ئۆجالان کەتە د ناڤا خەفکا دەستهلاتا خوەحەزیێ “ئەز ئەزی”ێ دە، وێنەیەک د مژیکێ عەڤدللا ئۆجالان دە دروست بوو کو گهشت وێ باوەریێ ئەو سەرۆکێ یەکانەیە و ت جاران شاشتیێ ناکە، شووناسا گەلێ کورد ب شووناسا وی ڤیە هات گرێدان.

ئێدی رەخنە کرنا ئۆجالان وەکە رەخنەکرنا گەلێ کورد دهات حەسباندن، هەر کەسێ ئۆجالان رەخنە کربا وەکە خایین دهات ب ناڤکرن. ئۆجالان ژ کەسەکی شۆرەشگەر ژ بۆی کەسەکی دەروون نەخوەش هات گوهەرتن، ژ بەر ڤێ نەخوەشییا خوە ئۆجالان ژ نوو دە شۆرەش پێناسەکر، ل شوونا شۆرەش بکەڤە د خزمەتا گەلێ کورد دە کەت د خزمەتا سەرۆکێ پەکەکێ دە، ئێدی ناڤێ کوردستانێ تونەبوو، ل هەر دەر و هەر جهی ب تەنێ ناڤێ ئۆجالان هەبوو.

ژ نوو ڤە پێناسەکرنا شۆرەشێ ژ بۆی وێ یەکێ بوو کو کورد ل دەردۆرا عەڤدللا ئۆجالان کۆم ببن، ئۆجالان بوو ناڤەندا شۆرەشێ، وێنە و گۆتنێن ئۆجالان بوونە پیرۆزی د ناڤا پەکەکێ دە، دلسۆزییا کوردان ژ بۆی کوردستانێ ب دلسۆزییا وان ب ئۆجالان ڤە هات گرێدان، دلسۆزییا ژ بۆی ئۆجالان بوو پیڤەرێ سەرەکە یێ ئەندامبوونا د شۆرەشێ دە، ب ئاوایەکی کو ت کەسی ماف نینە دژبەرییا هزرا ئۆجالان بکە، هەر کەسێ بەرەڤاژی هزر و بووچوونێن ئۆجالان هزر کربا وەکە خایین دهات بەرچاڤکرن.

ئەڤ نەخوەشییا خوەحەزییا ئۆجالان بوو سەدەم کو گومانا عەڤدللا ئۆجالان نە ب تەنێ ل سەر ئەندامێن پەکەکێ بەلکو ل سەر ئەندامێن سەرکردایەتیا پەکەکێ ژی دروست ببە.

د ئەنجاما ڤێ گومانێ دە، ئۆجالان شێوازێ رێڤەبرنا پەکەکێ گوهەرت، ئێدی پەکەکە ب ئاوایەکی کۆم نەدهات برێڤەبرن بەلکو هەر تشت د بن کۆنترۆلا ئۆجالان دە دەرباس دبوو، ئێدی ئۆجالان ل سەر هەر تشتەکی بوو. ئۆجالان ئێدی دو دل نەدبوو کو هەر کەسێ ژ خەتا وی دوور بکەڤە وەرە ژناڤبرن، ژ بەر ڤێ یەکێ ژی هەژمارەکە هەری زێدە یا ئەندام و سەرکردەیێن پەکەکێ ب بریارا ئۆجالان هاتن کوشتن و ژناڤبرن.