د یاداشتنامەیا سەرۆکكۆماریێ دە، سەدەما درێژکرنێ وەک “گەف و مەترسیێن تەرۆریستی یێن ل سەر سینۆرێن باشوورێ ترکیەیێ و بەردەوامیا بێئارامیێ ل هەرێمێ” هاتە دەستنیشانکرن و هات ئیدیعاکرن کو ئەڤ رەوش “مەترسیێ ل سەر ئەولەهیا نەتەوەیی یا ترکیەیێ” چێدکە.
هەروه‌ها د بەلگەیێ دە پابەندیا ترکیەیێ ب “پاراستنا یەکپارچەییا ئاخا ئیراقێ، یەکیتیا نەتەوەیی و ئارامیا وی وەلاتی” هاتە دوبارەکرن. دەربارێ سووریەیێ دە ژی هات گۆتن کو ژ بۆ “پشتگریکرنا هەولێن ناڤنەتەوەیی و چارەسەرکرنا کریزێ، دڤێ تەدبیرێن پێویست ل دژی هەموو گەفان بێن وەرگرتن.”
ل گۆری ئاژانسا ئانادۆلویێ یا فەرمی یا ترکیەیێ، ئارمانجا ڤێ پێنگاڤێ “رێگرتنا ل ئێریشێن موحتەمەل یێن رێخستنێن تەرۆریستی”یێن ژ ئیراق و سووریەیێ یە.
ئەڤ نێزی چاریەک سەدسالێ یە کو ترکیە ب هنجەتا رووبرووبوونا گەریلایێن پارتیا کارکەرێن کوردستانێ (په‌كه‌كێ) ب دەهان بارەگەهێن لەشکەری ل ناڤ ئاخا هەرێما کوردستانێ و دەڤەرێن دن یێن ئیراقێ ئاڤا کرنە. ئۆپەراسیۆنێن ئارتێشا ترک ل دژی په‌كه‌كێ ل ناڤ ئاخا ئراق و سووریەیێ ب ئاوایەکی بەردەوام ددۆمن.
