بەرپرسەکێ پایەبلندێ سەردەما ئەسەد ھات گرتن
وەزارەتا ناڤخوە یا سووریەیێ گرتنا ئەمید ھەمزە محەمەد یاسین راگھاند، کو ئەفسەرەکێ پایەبلندێ ھێزا ئاسمانی بوو و ب تاوانێن شەری ل چەند پارێزگەھێن سووریەیێ د دەما رەژیما ئەسەد دە تۆمەتبارە.
ل گۆری بەیاننامەیەکا وەزارەتا ناڤخوە یا سووریەیێ، یەکینەیێن ئەولەھیا ناڤخوە ل پارێزگەھا حەمایێ، ب ھەڤکاریا یەکینەیێن بەرھنگاربوونا تەرۆرێ، ئۆپەراسیۆنەکا ئەولەھیێ یا بەرفرەھ پێک ئانی کو بوو سەدەما گرتنا ھەمزە محەمەد یاسین.
عەمید ھەمزە محەمەد یاسین ل گۆری فەرمانا گرتنێ، کو ژ ئالیێ دۆزگەرێ گشتی ڤە ھاتیە دەرخستن، ب تۆھمەتا “ئەنجامدانا تاوانێن شەری و بنپێکرنێن مەزن ل بەرانبەری سڤیلان” داخوازکری بوو.
سەرۆکێ ئەولەھیا ناڤخوەیی یا پارێزگەھا حەمایێ ئەمید ملحەم شەنتووت راگھاند: “ڤەکۆلانێن دەستپێکێ دیار کریە کو یاسین تەڤلی ئێریشێن ئاسمانی یێن ل سەر باژار و باژارکان و ئارمانجکرنا سڤیلان د خوەپێشاندانێن ل دژی ئەسەد دە بوویە.”
عەمید ملحەم شەنتووت ئاماژە ژی دا: “ئەو ھەروەسا ب تەڤلیبوونا د ئێریشێن ئاسمانی یێن ل سەر گوندێن ل رۆژھلاتێ ئیدلبێ و دەردۆرا حەمایێ دە ژی تۆمەتبارە، کو بوونە سەدەما کۆمکوژیێن ل دژی سڤیلێن بێگونەھ.”
سەرۆکێ ئەولەھیا ناڤخوەیی یا پارێزگەھا حەمایێ تەکەز ژی کر کو، ئەو تۆمەتبار ژ بۆ تەمامکرنا ڤەکۆلانان و ئامادەکرنا وی ژ بۆ دارزاندنێ ژ ئالیێن پەیوەندیدار رە ھاتیە شاندن.
ناڤبری ئەشکەرە ژی کر کو، ھێزێن ئەولەھیا ناڤخوەیی دێ ل سەر “شۆپاندنا کەسێن کو د دەما رەژیما بەرێ دە ل دژی گەلێ سووریەیێ تاوانێن شەری کرنە، یان ژییێن کو بزاڤێ دکن کو تەناھیا جڤاکێ و ئەولەھیا دەولەتێ تێک بدن” بەردەوام بن.
