دوژمن ئەو هێرشەی بە مەبەستی دەستبەسەرداگرتنی پیشخابوور ئەنجامدا بەڵام بەرگریی قارەمانانەی پێشمەرگەکانی کوردستان پیلانەکانی دوژمنی کردە بڵقی سەر ئاو.
ئەمڕۆ چوار ساڵ بەسەر حەماسە خولقاندن و مێرخاسیی هێزەکانی پێشمەرگەی کوردستان لە دەڤەری سحێلای باشووری کوردستان تیپەڕ بوو. هێزی پێشمەرگەی كوردستان لەو داستانەدا بەرگرییەكی سەختی دژی چاوتێبڕانی ئەزموونی هەرێمی باشووری كوردستان كرد و دوژمنی ناچار کرد پاشەکشە بکات.
ئەمڕۆ 26/10/2021 چوار ساڵ بەسەر ساڵوەگەڕی تۆماركردنی داستانی سحێلادا تێدەپەڕێ، كە لەو رۆژەدا هێزی پێشمەرگەی كوردستان بە درێژایی رۆژ وەڵام و بەرپەرچی سەختی هێرشە یەك لە دوای یەكەكانی میلیشیا عێراقییەكان و هێزەكانی دیكەی عێراقی دایەوە، كە بە پاڵپشتیی و ڕێنوێنیی شارەزایی ئەفسەر و پلەدارانی وڵاتێكی دیكە بە نیازی لەباربردنی ئەزموونی هەرێمی كوردستان هێرشەكانیان بۆ ئەو دەڤەرەی هەرێمی كوردستان دەست پێ كردبوو.
لەو حەماسەدا، دەیان ئۆتۆمبێل و زرێپۆش و تانك و ئامێری سەربازیی دوژمن تێك شكێنران و ژمارەیەكی زۆریش لە میلیشیا و هێزە هێرشبەرە هاوشانەكانیان كوژران و بە ناچاری پاشەكشەیان پێ كرا و نەبەردی و خۆڕاگریی كەم وێنەی پێشمەرگە، خەیاڵی هێرشی دیكە و پێشڕەویی دوژمنی بەرەو هەرێمی كوردستان لە چاڵ نا.
ئەو داستانە مەزنە، بە خوێنی پیرۆزی ژمارەیەک لە پێشمەرگە و فەرماندەکانی هێزی پێشمەرگەی کوردستان تۆمار كرا.
دوژمن ئەو هێرشەی بە مەبەستی دەستبەسەرداگرتنی پیشخابوور و کۆنترۆڵ کردنی چەند ناوچەیەکی دیکەژێر کۆنترۆڵی هێزەکانی پێشمەرگەی کوردستان ئەنجامدا بەڵام بەرگریی قارەمانانەی پێشمەرگەکانی کوردستان پیلانەکانی دوژمنی کردە بڵقی سەر ئاو.