پەکەکە بە ئەندازەی داگیرکەرانی کوردستان، کچی کوردی کوشتووە

هەپەگە ناسنامەی 3 کچە گریلای دیکەی حیزبەکەی ئاشکرا کردووە کەوا لە ئەیلوولی ساڵی 2021دا لە باشووری کوردستان گیانیان لەدەستداوە.

پەکەکە دیسان ناسنامەی 3 کچی دیکەی کوردی ئاشکرا کرد کە یەکیان هێشتا منداڵە و ماوەی 2 ساڵ و 4 مانگ لەوەپێش  بە دەست جەندرمەکانی تورکی بەکوشتن داون و تازە هەواڵەکەیان بڵاو دەکاتەوە.

هەپەگە باڵی سەربازیی پەکەکە رۆژی سیشەممە 17/1/2023، ناسنامەی 3 کچە گریلای دیکەی حیزبەکەی ئاشکرا کردووە کەوا لە ئەیلوولی ساڵی 2021دا لە باشووری کوردستان کەوتوونەتە بەر هێرشی دەوڵەتی تورک و گیانیان لەدەستداوە.

پەکەکە پاش تێپەڕینی 2 ساڵ و 4 مانگ  تازە هەواڵی گیانلەدەستدانی ئەو 3 گریلایە بڵاو دەکاتەوە.

ناوی ئەو گریلایانە بەمشێوەیە راگەیاندراوە:

دیله‌ك ئۆزه‌ر خەڵکی مووش.

گولشا پۆلات خەڵکی سێرت.

رێزان یلدرم خەڵکی وان.

هەپەگە ئەو کچانەی کوردی وەکوو هەزاران کچ و کوڕی دیکەی منداڵ و لاوی کورد رەوانەی مەرگ کردووە و پاش تێپەڕبوونی زیاتر لە 2 ساڵ لە گیانلەدەستدانەکەیان تازە هەواڵەکەیان رادەگەیەنێت و دەڵێ ئێمە ئەو هەڤاڵانەی خۆمان لەدەستداوە.

پەکەکە رۆژانە وێنە و ناسنامەی کۆمەڵێک لە منداڵان و لاوانی کورد لە میدیاکانیدا بڵاو دەکاتەوە کەوا لە ساڵ و مانگەکانی رابردوودا لە بەرخۆدانێکی ساختە و لەپێناو دروشمی دژە گەلیی “برایەتی گەلان”دا بە دەست جەندرمەکانی تورکی بە کوشتن داون و پاش تێپەڕ بوونی ماوەیەکی زۆر ئەوجا هەواڵی گیانلەدەستدانەکەیان بڵاو دەکاتەوە و دەڵێ ئەوان شایستەی ئەوە بوون کە ببنە قوربانیی ئاپۆ.!

گریمانە دەکرێت هێشتا بە هەزاران لاوی دیکەی کورد هەبن کە پەکەکە لە ساڵەکانی رابردوودا بە کوشتنی دابن و هێشتا هەواڵی گیانلەدەستدانەکەیانی رانەگەیاندبێت.