دوکتور نەجمەدین لە سەرجەم تەمەنی 71 ساڵەی خۆیدا وەکوو “لۆبییەکی تاکەکەسی” لەپێناو کورد و کوردستاندا خەباتی کرد.
نەجمەدین کەریم لە سیاسەتی کورددا ناوێکی دیار بوو. لەساڵی 2014دا و لەکاتی پەلاماردانی کەرکووک لەلایەن تیرۆریستانی داعشەوە، کوردەکان لە نزیکەوە ئەویان ناسی. بەتایبەتیش لەبەر هەڵوێستی بە بڕشتی لەسەر بەڕێوەچوونی ڕیفراندۆمی سەربەخۆیی کوردستان لە کەرکووک، دڵی سەرجەم کەرکووکیەکانی شاد کرد و بوو بە سیمبۆلی تێکۆشانی نەتەوەیی لەپێناو کوردستاندا. سەرەڕای سەرجەم هەڵویستە نەرێنیەکانی حیزبەکەی (یەنەکە)، بەڵام دوکتور نەجمەدین بە دڵ و بە گیان پشتگیریی لە ڕیفراندۆمی سەربەخۆیی کوردستان کرد.
بەتایبەتی لە ئۆکتۆبەری 2017دا لە دژی ئەو گرووپەی ناو یەنەکە کەوا خیانەتە نگریسەکەی کەرکووکیان ئۆرگانیزە کردبوو، هەڵویستی گرت. وازی لە یەنەکە هێنا و هات لە هەولێر نیشتەجێ بوو.
نەجمەدین کەریم سەرجەم هەڕەشە و گوڕەشەکانی حکوومەتی شیعەی بەغدای ڕەد کردنەوە و لە سەرجەم تەمەنی 71 ساڵەی خۆیدا وەکوو “لۆبییەکی تاکەکەسی” لەپێناو کورد و کوردستاندا خەباتی کرد.
تەرمی دوکتور نەجمەدین کەوا لە 31ی ئۆکتۆبەری 2020دا لە واشینگتۆنی پایتەختی ئەمەریکا گیانی لەدەستدابوو، لە پیرمام بەخاکی پیرۆزی کوردستان ئەسپێردرا و بەپێی وەسییەتی خۆی داوای کردووە کە “هەرکات کەرکووک ڕزگار بکرێت تەرمەکەی ببرێتەوە و لەوێ بەخاک بسپێردرێت”.
نەجمەدین کەریم کێیە؟
د. نەجمەدین کەریم لە 12ی تەباخی ساڵی 1949 لە گەڕەکی شۆرجەی کەرکووک، وەکوو سێهەمین منداڵ لە بنەماڵەیەکی 13 منداڵی، لەدایکبووە. دایکی ژنی ماڵەوە بووە و بابیشی مەلایەکی نیشتمانپەروەر بوو کە توانیبوو نەتەوەپەروەری لە هزری نەجمەدینی کوڕیدا جێبخات و دواتریش لە خەبات و چالاکیەکانیدا چ لە یەکیەتیی خوێندکارانی کورد و چ وەکوو پیشمەرگە، پاڵپشت و یارمەتیدەری بوو.
نەجمەدین کەریم خوێندنی سەرەتایی، ناوەندی و ئامادەیی لە کەرکووک تەواو کرد و دواتر چووەتە موسڵ و بەشی پزیشکی لە کۆلێژی پزیشکیی ئەو شارەدا خوێندووە. لە ساڵی 1976دا بۆ درێژەدان بە خویندن ڕۆیشتۆتە ئەمەریکا و لە زانکۆی “جۆرج واشینگتۆن”دا درێژەی بە خوێندن داوە. دوکتور نەجمەدین لە ویلایەتەکانی واشینگتۆن و مێریلەندی ئەمەریکادا ژیاوە.
دوکتور نەجمەدین لە ساڵی 1975دا ھاوسەرگیریی لەگەڵ خاتوون زۆزان کردووە لە شاری نەغەدەی ڕۆژهەڵاتی کوردستان و بەرهەمی ئەو هاوسەرگیرییە 4 منداڵ بووە بە ناوەکانی (شوان،سیروان،کاروان،ئەڤین).
دوکتور نەجمەدین کەریم سەرۆکی یەکیەتیی خوێندکارانی کوردستان عێراق بووە و لە ساڵی 1972ـەوە بووەتە پێشمەرگە. لەساڵی 1988دا لە ئامریکای باکووردا کۆنگرەی نەتەوەیی کوردی دامەرزاند و هەتا ساڵی 1999 سەرۆکایەتیی کۆنگرەکەی کردووە.
لەساڵی 1991دا بەشداریی لە یەکەمین دانیشتنی فەرمیی لەنێوان حیزبە کوردیەکان و وەزارەتی دەرەوەی ئامریکادا کردووە و لە دامەزراندنی بەشی کوردیی رادیۆ دەنگی ئەمەریکادا ڕۆڵی بەرچاوی هەبووە. لە ساڵی 1996دا ئەنستیتۆی کوردی لە واشینگتۆن دامەزراندووە.
لەساڵی 2009دا گەڕاوەتەوە هەرێمی کوردستان و لە 3ی نیسانی 2011دا وەکوو کاندیدی یەکیەتی نیشتمانیی کوردستان (یەنەکە) بووە بە پارێزگاری کەرکووک و هەتا ساڵی 2017 لە ئەرکەکەی بەردەوام بووە.
