شاندەکەی ئەمریکا پشتیوانیی وڵاتەکەی بۆ هێزەکانی سووریای دیموکراتیک (هەسەدە) دەربڕیوە.
کۆبوونەوەیەک لە عەممانی پایتەختی ئوردن لە نێوان شاندێکی ئەمریکا و شاندێکی بەڕێوەبەریی خۆسەری ڕۆژئاڤادا بەڕێوەچوو و تێیدا بابەتەکانی “تێکەڵبوونی دیموکراتیک” و “سیستەمێکی لامەرکەزی” گفتوگۆیان لەبارەوە کرا.
شاندێکی ئەمریکا کە لە جێن شاهین سیناتۆر و جۆ ویلسۆن ئەندامی کۆنگرێسی ئەو وڵاتە پێکهاتبوو، لە ڕێکەوتی 25ی تەباخدا لەگەڵ شاندێکی بەڕێوەبەریی خۆسەر لە عەممان کۆبۆتەوە کە لە مەزڵووم عەبدی فەرماندەی گشتیی هێزی سووریای دیموکراتیک (هەسەدە) و ئیلهام ئەحمەد هاوسەرۆکی بەڕێوەبەرایەتیی پەیوەندییەکانی دەرەوە، پێکهاتبوون.
دوابەدوای کۆبوونەوەکە ڕاگەیەندرا کە باس لە جێبەجێکردنی ڕێککەوتنەکەی 10ی ئازاری نێوان مەزڵووم عەبدی، فەرماندەی گشتیی هەسەدە و ئەحمەد شەرع، سەرۆکی حکوومەتی ڕاگوزەری دیمەشق کراوە. هەروەها شاندەکەی ئەمریکا پشتیوانی خۆی بۆ هێزەکانی هەسەدە دەربڕیوە.
بەپێی ئەو زانیارییانەی لە لایەن سەرچاوەیەکی نزیک لە بەڕێوەبەریی خۆسەرەوە بە میدیاکان دراوە، ، لە میانی کۆبوونەوەکەدا گفتوگۆکانی نێوان بەڕێوەبەریی خۆسەر و حکومەتی دیمەشق و ئەو ئاستەنگانەی کە دروست بوون و هەروەها و ڕێگاکانی چارەسەرکردنی کێشەکان تاوتوێ کراون.
پرسی تێکەڵبوون و بەشداریی دیموکراتیک لە چوارچێوەی سیستەمێکی لامەرکەزیدا گفتوگۆی لەبارەوە کراوە و شێوازەکانی تاوتوێ کراون.
ئەو سەرچاوەیە ئاماژەی بەوەشکردووە، هەوڵەکان بۆ پێکهێنانی کۆبوونەوەیەک لە نێوان بەڕێوەبەریی خۆسەر و حکومەتی سووریادا بەردەوامن، بەڵام تا ئێستا دیار نییە ئەم کۆبوونەوەیە کەی ئەنجام دەدرێت.
