پرۆسەی ئاشتی تورکیا ڕێگای 15 گوندی سنووری “ئامێدی”ی کردەوە

پرۆسەی ئاشتی تورکیا، کاریگەریی ئەرێنی لەسەر دۆخی جووتیاران و خەڵکی گوندەکان داناوە.

بەهۆی وەستانی شەڕی نێوان پارتی کرێکارانی کوردستان(پەکەکە) و ئەرتەشی تورکیا، ڕێگەی 15 گوند لە بناری چیای گارەی سنووری قەزای ئامێدی کراونەتەوە، جووتیاران و خەڵکی گوندەکانیش بەپرۆسەکە دڵخۆشن.

 ساڵانی پێشوو، چەند کاتژمێرێک ڕێگە بە جووتیاران دەدرا بچنە نێو باخەکانی خۆیان بۆ ئەوەی کاری چاندن یاخود ڕنینەوەی بەرهەمە کشتوکاڵییەکانیان بکەن و بیگەیەننە بازاڕەکان، بەڵام ئەمساڵ پرۆسەی ئاشتی تورکیا، کاریگەریی ئەرێنی لەسەر دۆخی جووتیاران و خەڵکی گوندەکان، هەروەها بەرهەمی کشتوکاڵی ناوچەکە کردووە.

لەماوەی یەک هەفتەدا، خەڵکێکی زۆری ئەو 15 گوندەکانی بناری چیای گارە، گەڕاونەتەوە سەر ماڵ و زەوی کشتوکاڵی خۆیان، پەیامنێری کەناڵی کوردستان24ی باشووری کوردستان، ئاماژە بەوە دەکات، بەرهەمی سماق، زۆرترین بەرهەمی کشتوکاڵی ناوچەکەیە، بەپێی ئاماری بەڕێوەبەرایەتی کشتوکاڵی دهۆک، داهاتی بەرهەمی سماقی ناوچەکە 500 ملیۆن دینارە.

بەهۆی هێرشی فڕۆکە و تۆپەکانی تورکیا، لە گوندی دێرەشێ، زیانێکی زۆر بەر ماڵی هاووڵاتییان و زەوییە کشتوکاڵییەکان کەوتووە، هاووڵاتییەکی دانیشتوی گوندەکە بە کوردستان24ـی گوتووە: “ماوەی هەفتەیەکە خەڵکی گوندەکە دەگەڕێنەوە سەر ماڵی خۆیان، ناوچەکە ئارام بووەتەوە”، دەشڵێت: “هەر 15 گوندەکە، بەرهەمی سماق و گوێز و ترێی زۆریان هەیە، گوتی: دڵخۆشین بەوەی، ئێستا بێ ترس دەتوانین بچینە نێو باخەکانی خۆمان و کشتوکاڵ بکەین”.

گوتووشیەتی: “بەهۆی بۆردومانی تۆپ و فڕۆکەی تورکیا، زیانێکی زۆر بەر ئەو گوندانە کەوتووە، ماڵی ئێمەش بۆردومانکرا، بەڵام نەمردین، 20 ڕۆژێکە تۆپ و فڕۆکە بۆردومانمان ناکات و حەساوینەتەوە”.