بۆلۆت نوورعەلی، ئەندامی کۆنسەی هەپەگە گیانی لەدەستداوە

بۆلۆت کە لە ناو پەکەکەدا بە کۆدناوی مۆردەم چەلیک دەناسرا، خەڵکی “چەولیک”ی باکووری کوردستان بوو.

فەرماندەیەکی باڵا و ئەندامی کۆنسەی هەپەگە بە ناوی بۆلۆت نوورعەلی گیانی لەدەستداوە و هەپەگە، باڵی سەربازیی پەکەکەش ئاسکرای کردووە کە نوورعەلی لە ڕووداویکدا گیانی لەدەستداوە.

ڕۆژی سێشەممە، 26/8/2025، هەپەگە، باڵی سەربازیی پارتی کرێکارانی کوردستان (پەکەکە) گیانلەدەستدانی بۆڵۆت نوورعەلی، فەرماندەی باڵا و ئەندامی کۆنسەی خۆی ڕاگەیاند و ئاماژەی بەوە کردووە کە لە 11ی تەباخی ئەمساڵدا و لە ڕووداوێکدا گیانی لەدەستداوە.

بۆلۆت نوورعەلی، لە ناو پەکەکەدا بە کۆدناوی مۆردەم چەلیک دەناسرا و خەڵکی چەولیک لە باکووری کوردستان بوو. بۆلۆت لە مانگی حوزەیرانی ساڵی 2004دا تێکەڵ بە پەکەکە ببوو و چەندین پۆستی لە ڕێکخراوەکەدا هەبووە کە دوایین بەرپرسایەتیی فەرماندەی ڕۆژئاوای زاپ و ئەندامی کۆنسەی هەپەگە بوو.

پەکەکە لە ساڵی 2021ـەوە لە ئەنجامی هێرشەکانی تورکیادا بە دەیان فەرماندە و کادیری خۆی لەدەست داوە و هەتا ئێستاش گیانلەدەستدانی زۆربەیان لە بنەماڵەکانیان و ڕای گشتیی دەشارێتەوە.

شایانی باسە کە لە ڕێکەوتی 21ی تەباخیشدا پەکەکە گیانلەدەستدانی فەرماندەیەکی دیکەی خۆی، بەناوی سەرحەد ڤارتۆ ئاشکرا کردبو و ڕایگەیاندبوو کە ئەویش بەهۆی نەخۆشییەوە گیانی لەدەستداوە.