تورکیا ئیدیعا دەکات هێرشەکان زیانی گیانیشیان هەبووە، بەڵام پەکەکە لەوبارەوە هیچ ڕاگەیاندراوێکی بڵاو نەکردۆتەوە.
وەزارەتی بەرگریی تورکیا ڕایگەیاند، لەو هێرشە ئاسمانیانەی کە لە 24 کاتژمێری ڕابردوودا دژ بە پێگەکانی پەکەکە لە چیای خواکورکی باشووری کوردستان ئەنجامیان داون، 15 پێگەی ئەو حیزبە کراونەتە ئامانج و تێکدراون.
وەزارەتی بەرگریی تورکیا لە هەژماری فەرمی خۆی لە تۆڕە کۆمەڵایەتیەکاندا، ڕاگەیەندراوێکی بڵاو کردۆتەوە کە تێیدا هاتووە، “ڕۆژی شەممە 4/11/2023، فڕۆکە شەرکەرەکانی ئەو وڵاتە، گەریلاکانی پەکەکەیان لە ناوچەی خواکورک لە باشووری کوردستان کردۆتە ئامانج و زیانی زۆریان بە پێگەکانی پەکەکە گەیاندووە.
لە ڕاگەیاندراوەکەدا ئاماژە بەوە کراوە کە لەو هێرشانەدا بە گشتی 15 پێگە لە ئەشکەوت، حەشارگە و پەناگە و کۆگای پەکەکە کراونەتە ئامانج.
وەزارەتی بەرگری تورکیا ئیدیعای ئەوەی کردووە کە هێرشەکانیان زیانی گیانیشی لێکەوتۆتەوە، بەڵام میدیاکانی پەکەکە لەوبارەوە هیچ ڕاگەیاندراوێکیان بڵاو نەکردۆتەوە.
