تیرۆریستانی شانە نوستووەکانی داعش خەریکبوو هەڕەشەیان لەسەر خەڵکی ئاسایی و بەتایبەتیش لەسەر بەندیخانەکان و ناوەندەکانی گرتن دروست دەکرد.
هێزەکانی سووریای دیموکراتیک (هەسەدە) بە هاوکاریی هێزەکانی ئاسایشی ناوخۆ (ئاسایش) و یەکینەکانی پاراستنی ژن (یەپەژە) و لەچوارچیوەی ئۆپەراسیۆنێکی بەرفراواندا لە شاری حەسەکە و ناوچەکانی دەوروبەریدا لە ڕۆژئاوای کوردستان، 39 چەکداری شانە نوستووەکانی تیرۆریستانی داعشیان دەستگیر کردووە.
ئەمڕۆ شەممە 30/8/2025، ناوەندی ڕاگەیاندنی هێزەکانی سووریای دیموکراتیک (هەسەدە)، لە بەیاننامەیەکدا ڕایگەیاند: هێزەکانی ئاسایشی ناوخۆ لە باکووری ڕۆژهەڵاتی سووریا، بەهەماهەنگی یەکینەکانی پاراستنی ژن، ئۆپەراسیۆنێکی هاوبەشیان دژی شانەکانی داعش لە حەسەکە و دەورووبەری ئەنجامدا.
هێزەکانی سووریای دیموکراتیک لە بەیاننامەکەدا ئاماژەی بەوە کردووە، ئۆپەراسیۆنە سەربازییەکە لەپێناو ڕووبەڕووبوونەوەی داعش و شانە نوستووەکان و چالاکییەکان ئەنجامدرا کە خەریکبوو هەڕەشەیان لەسەر خەڵکی ئاسایی دروست دەکرد، بەتایبەتیش لەسەر بەندیخانەکان و ناوەندەکانی گرتن.
هەسەدە ڕایگەیاندووە، لە ئۆپەراسیۆنەکەدا، تیمی ئۆپەراسیۆنی سەربازیی (TOL) بۆ پشتیوانیی هەواڵگریی، بەشدارییان کردووە، زانیاریی وردیان بە هێزەکان داوە بۆ ئەوەی تەنیا چەکدارانی داعش و شانە نوستووەکانیان بە ئامانج بگرێن و خەڵکی ئاسایی لە ئۆپەراسیۆنەکەدا سەلامەت بن.
