سەرۆکی PSK: “هۆکاری بنچینەیی شەڕ و پێکدادانی سەد ساڵەی ناوچەکە بۆ پێشێلکردنی مافە نەتەوەییەکانی گەلی کورد و دابەشکردنی کوردستان دەگەڕێتەوە”.
بایرام بۆزیەل، سەرۆکی گشتیی پارتی سۆسیالیستی کوردستان (PSK)، ئەمڕۆ شەممە 30ی تەباخ، لە بەرەبەری 1ی ئەیلول، “ڕۆژی جیهانی ئاشتی”دا، بەیاننامەیەکی نووسراوی بڵاوکردەوە و تیایدا جەختی لەوە کردەوە کە ئاشتییەکی بەردەوام و سەقامگیر لە ڕۆژهەڵاتی ناوەڕاستدا، تەنها بە چارەسەرێکی دادپەروەرانە و یەکسانیخوازانەی پرسی کورد مومکین دەبێت.
لە بەیاننامەکەدا ئاماژە بەوە کراوە کە مرۆڤایەتی لە ئاشتی دوورە و ئەو سەرچاوانەی کە دەبێ بۆ خۆشگوزەرانی سەرف بکرێن، لە شەڕدا بەکاردەهێنرێن. بۆزیەل هۆکاری بنچینەیی شەڕ و ململانێیەکانی سەد ساڵەی ناوچەکەی بۆ “پێشێلکردنی مافە نەتەوەییەکانی گەلی کورد و دابەشکردنی کوردستان” گەڕاندەوە و ڕایگەیاند، سیاسەتەکانی نکۆڵیکردن و چەوساندنەوە نەک تەنها بۆ کورد، بەڵکوو بۆ هەموو ناوچەکە ئازاری گەورەی لێکەوتووەتەوە.
دەقی ڕاگەیاندراوەکەی بایرام بۆزیەل سەرۆکی PSK:
ئاشتییەکی بەردەوام دەکرێ لەسەر بنەمای ئازادی و یەکسانی بنیات بنرێت
لە یەکەمی ئەیلول “ڕۆژی جیهانی ئاشتی”دا، مرۆڤایەتی هێشتا لە ئاشتییەکی بەردەوام و سەقامگیرەوە دوورە. لەو شەڕانەی کە لە سەرانسەری جیهان و ناوچەکەدا ڕوودەدەن، ڕۆژانە هەزاران کەسی سڤیل و ژن و منداڵ بە شێوەیەکی دڕندانە دەکوژرێن. ئەو سەرچاوە ئابوورییانەی کە دەبێ بۆ خۆشگوزەرانی مرۆڤایەتی و پەروەردە و تەندروستی و خۆراک خەرج بکرێن، بۆ چەک و شەڕ بەکاردەهێنرێن.
هۆکاری بنچینەیی شەڕ و توندوتیژی سەد ساڵەی ڕۆژهەڵاتی ناوەڕاست، بۆ پێشێلکردنی مافە نەتەوەییەکانی گەلی کورد و دابەشکردنی کوردستان دەگەڕێتەوە. سیاسەتەکانی نکۆڵیکردن و ستەمکاری کە لە سەد ساڵی ڕابردوودا دژ بە هەبوون و مافەکانی گەلی کورد بەڕێوەچوون، نەک هەر ئازارێکی گەورەی بۆ گەلی کورد خوڵقاندووە، بەڵکو بازنەیەکی سووڕانەوەی بێکۆتایی لە پێکدادان و توندوتیژیی لە ناوچەکەدا پێکهێناوە.
ئەمڕۆکە گەلەکەمان لە باشووری کوردستان قەوارەیەکی فیدراڵی و ئازادی بەدەستهێناوە، بەڵام لە وڵاتانی دیکە سیاسەتی نکۆڵیکردن و توندوتیژی بەرامبەر بە نەتەوەی کورد بەردەوامیی هەیە.
ڕژیمی کۆنەپەرستی ئێران ڕۆژانە بە لەسێدارەدانی لاوان و ژنانی کورد وەڵامی مەعسوومانەترین داواکارییەکانی گەلی کورد دەداتەوە. سەرەڕای داڕمانی دیکتاتۆرییەتی 61 سالەی ئەسەد لە سووریا، بەڵام هێشتا بێتەحەموللی لە هەمبەر هەبوون و مافەکانی گەلی کورد بەردەوامە. هەرچەند داڕمانی دیکتاتۆرییەتی ئەسەد دەرفەتێکی بۆ هەموو گرووپە نەتەوەیی و ئایینییەکان ڕەخساندووە کە دەسەڵاتێکی دیموکراتیک و فرەیی دابمەزرێنن، بەڵام هەڵوێستی دوژمنکارانە بەرامبەر بە گەلی کورد، ئەتمۆسفەری ئەرێنی ئێستای ژەهراوی کردووە. ئەو هێزانەی کە هەبوونی خۆیان لەسەر شەڕ و توندوتیژی بنیات ناوە، ئاگرەکە گەش دەکەنەوە بۆ ئەوەی سووریا بەرەو شەڕێکی نوێ ڕابکێشن.
لە سەدەی ڕابردوودا، پێکدادان و سیاسەتی توندوتیژی دژ بە کورد لە تورکیا، نەک هەر ئازارێکی زۆری بۆ نەتەوەی کورد گەیاندووە، بەڵکو هاوکات تورکیاشی لە هەموو ڕوویەکەوە خستووەتە قەیرانێکی قووڵەوە.
دەسەڵاتدارانی تورکیا بەهۆی پێشهاتەکانی ئەم دواییانەی ناوچەکەوە، پرۆسەیەکیان دەستپێکردووە کە ئامانج لێی چەکدانانی پەکەکەیە. کۆمیسیۆنێکی پەرلەمانی کە بۆ دانانی بنەمایەکی یاسایی بۆ چەکدانانی پەکەکە دامەزراوە، کۆبوونەوەی جۆراوجۆر ئەنجام دەدات.
بێگومان گرنگە کەوا پەکەکە چەک دابنێت و شەڕ و پێکدادانەکان کۆتاییان پێبێت. شەڕ و پێکدادان، کە زیانێکی گەورەی بە ژیان و موڵک و ماڵی خەڵکی کوردستان گەیاندووە، پێویستە دەستبەجێ کۆتایی پێبێت و ڕێگا بۆ گرتنەبەری سیاسەتی دیموکراتیک هەموار بکرێت. بەڵام لەبەر نەبوونی ئاسۆ و چارەسەریەکی بەرفراوان بۆ پرسی کورد لەلایەن حکوومەتەوە، پرۆسەی چەکدانانی پەکەکە بە پێی بەرنامە بەڕێوەناچێت.
ئێمە وەک PSK، دووپاتی دەکەینەوە کە مەسەلەی بنەڕەتی، ئازادی نەتەوەیی گەلی کوردستانە. سەرچاوەی سەرجەم پرسە هەنووکەییەکان، سیاسەتی سەد ساڵەی ڕەتکردنەوە، ئینکار، ئاسمیلاسیۆن و توندوتیژییە لە دژی نەتەوەی کورد و ئاشتییەکی سەقامگیر و درێژخایەن بەبێ کۆتاییهێنان بەو نادادپەروەرییە مێژووییە سەدان ساڵەیەی کە لە دژی گەلی کورد بەڕێوەچوون، بەرقەرار ناکرێ. بەبێ داننان بە مافەکانی گەلی کورد کە لە ناسنامە نەتەوەییەکەیەوە سەرچاوەی گرتووە، ئارامی و سەقامگیری لە ناوچەکەدا پێکنایەت. هەتا پرسی کورد بە شێوەیەکی دادپەروەرانە و یەکسانیخوازانە چارەسەر نەکرێت، کەس ناتوانێت ئاشتی ببینێت.
کلیلی ئاشتی و ئارامی لە ڕۆژهەڵاتی ناوەڕاستدا ئەوەیە کە گەلی کورد بتوانێت بە ئازادی لە وڵاتی خۆی واتە لە کوردستاندا بژی. سەرکەوتنی پڕۆسەی چەکدانانی پەکەکەش پێویستی بە تێگەیشتنێکی فرەلایەنە لە پرسی کورد هەیە. پرۆسەی چەکدانان تەنیا بە دەسپێشخەری نووسینی دەستوورێکی نوێ کە دان بە هەبوونی نەتەوەیی و مافەکانی گەلی کورددا بنێت، دەتوانێ سەرکەوتوو بێت.
بەبۆنەی 1ی ئەیلوول، ڕۆژی جیهانی ئاشتی، داوا لە هەموو ئەکتەرە سیاسییەکانی تورکیا دەکەین کە ئیرادەیەکی بنیاتنەر و کاریگەر سەبارەت بە پرسی کورد نیشان بدەن. با لەبیرمان نەچێت: ئەگەر کورد ئازاد نەبێت، ئازادیی تورکیش تەنها خەونێک دەبێت.
لەکاتێکدا کە هەرێمەکەمان بە قۆناغێکی گرینگ و هەستیاردا تێدەپەڕێت، داوا لە هەموو ئەکتەرە سیاسییەکانی کوردستان دەکەین: وەرن با دەست لە ناو دەستی یەکتر، گوێ لە بانگەوازێکی مێژوو بگرین بۆ ئەوەی دۆخی ئێستا بەشێوەیەکی کاریگەر بۆ ئازادیی نەتەوەیی گەلەکەمان بەکاربهێنین.
ئەم داوایە هاوکات هیوا و خواستی گەلەکەمانە.
ئێمە نابێ دوا بکەوین…
