“ئەگەر تورکیا ئاشتی و ئارامیی بۆ سووریا دەوێت، نابێ هەبوونی کورد وەک هەڕەشەیەک بۆ سەر خۆی ببینێت”.
سیپان حەمۆ، ئەندامی فەرماندەیی گشتیی هێزەکانی سوریای دیموکراتیک (هەسەدە)، هەڵوێستی هێزەکانی سووریای دیموکراتیکی سەبارەت بە گفتوگۆکانی یەکخستنی هێزە سەربازییەکان لە سووریا ئاشکرا کرد و ڕایگەیاند، ئەوان یەکگرتن لەسەر بنەمای تەسلیمبوون ڕەتدەکەنەوە و تەنها “یەکخستنێکی دیموکراتیک” قبووڵ دەکەن.
لە چاوپێکەوتنێکی تایبەتدا سیپان حەمۆ ڕوونیکردەوە کە تێگەیشتنی هەسەدە بۆ “یەکخستن” جیاوازە لە تێگەیشتنی لایەنەکانی دیکە و دەڵێت: “باشترین یەکگرتن ئەو یەکگرتنەیە کە بە ئیرادەی گەلان و لەسەر بنەمای هۆشمەندییەکی ئازاد پێکدێت. بەڵام ئەو بۆچوونەی کە لە دیمەشق زاڵە، لەسەر بنەمای ‘دەبێ هەموو کەسێک بچێتە نێو دەوڵەتی ناوەندی’یەوە دامەزراوە. ئەمە هۆشمەندییەکی بەیعەتکردنە و ناتوانێ هەموو کۆمەڵگە لە ئامێز بگرێت”.
سیپان حەمۆ هەروەها حکومەتی دیمەشقی بە پووچەڵکردنەوەی ڕێککەوتنی 10ی ئازار تۆمەتبار کرد و ئاماژەی بە کۆمەڵکوژییەکانی کە دژ بە گەلی عەلەوی و ناوچە کەنارئاوەکان و هێرشەکانی سەر سوەیدا کرد. سیپان حەمۆ هاوکات باسی لە ڕەشنووسی دەستووری تاکلایەنە و دپەراوێزخستنی باکوور و ڕۆژهەڵاتی سووریا لە هەڵبژاردنەکاندا کرد و وەکوو بەڵگەیەک بۆ ئەم هۆشمەندییە نادیموکراتیکە ناوی برد.
“سوپا ئاوێنەیەکی سیستەمی سیاسییە”
سیپان حەمۆ جەختی لەوە کردەوە کە پێش ئەوەی باس لە یەکخستنی ئەرتەش بکرێت، دەبێت سیستەمی سیاسی وڵات چارەسەر بکرێت. بە گوتەی حەمۆ، سوپا ئاوێنەیەکی سیستەمی سیاسییە و دەبێت لەسەر یاسا دیموکراتیکەکان بنیات بنرێت و گوتی: “تا گۆڕانکاری بنەڕەتی لە یاساکاندا نەکرێت و سیستەمێکی سیاسی لامەرکەزی کە دان بە مافی هەموو پێکهاتەکانی (کورد، عەرەب، سریانی، ئەرمەنی، عەلەوی و دروزی)دا بنێت، دانەمەزرێت، گفتوگۆکردن لەسەر ئەنتەگراسیۆنی هەسەدە بێ مانایە”.
سیپان حەمۆ هەروەها ڕایگەیاند کە هەسەدە بە ئەزموونە بەرفراوانەکەی لە شەڕ لەگەڵ داعش و ڕژێمی بەعسدا، دەتوانێت بنەمای سوپایەکی نوێ و پیشەیی بۆ هەموو سووریا بێت. ناوبراو وەک هەنگاوی یەکەم پێشنیاری دامەزراندنی “ئەنجومەنێکی سەربازیی هاوبەش”ی لەگەڵ سووپای حکومەتی دیمەشق کرد، بەڵام ئاماژەی بەوەشکرد کە جێبەجێکردنی ئەو هەنگاوە، بەستراوەتەوە بە ئیرادەی سیاسییەوە.
ڕۆڵی هێزە دەرەکییەکان و داوا لە تورکیا
سەبارەت بە ڕۆڵی هێزە نێودەوڵەتییەکان، سیپان حەمۆ بەرپرسیارێتی سەرەکیی خستە سەر شانی هاوپەیمانی نێودەوڵەتی و ئەمریکا و داوای لێکردن کە بۆ گەلی سووریاش هەمان ئەو پێوەرە دیموکراتیکانە بگرنەبەر کە بۆ خۆیانیان دەوێت.
حەمۆ بە تایبەتی داوای لە تورکیا کرد و گوتی: “ئێمە وەکوو هێزەکانی سووریای دیموکراتیک (هەسەدە)، هەرگیز هەڕەشەمان بۆ سەر دەوڵەتی تورکیا دروست نەکردووە و ئەگەر بەڕاستی تورکیا ئاشتی و ئارامیی بۆ سووریا دەوێت، نابێ هەبوونی کورد وەک هەڕەشەیەک بۆ سەر خۆی ببینێت، بەڵکوو پێویستە باوەڕی بەوە هەبێت کە کورد بنەمای دیموکراتیزەکردنی سوریایە”.
