“دەیان تانکەری پڕ لە سووتەمەنی لە ڕۆژئاوای کوردستانەوە بەرەو ناوچەکانی ژێرکۆنترۆڵی میلیشیاکانی تورکیا ڕەوانە کراون”.
هاوکات لەگەڵ قەیرانی سووتەمەنی و ڕێکخستنی کاتژمێرەکانی کارکردنی موەلیدەکانی کارەبا بەهۆیی کەمبوونی سووتەمەنی لە شار و شارۆچکەکانی ڕۆژئاوای کوردستان، بەڕێوەبەریی پارتی یەکێتی دیموکراتیک (پەیەدە)، بە ریژەیەکی بەرچاو نەوتی خاو بۆ گروپە چەکدارەکانی پاشکۆی سوپای تورکیا، ڕەوانە دەکات.
ڕوانگەی سوری بۆ مافەکانی مرۆڤ گرتەیەکی ڤیدیۆیی بڵاوکردۆتەوە کە تیایدا ژمارەیەکی زۆر بارهەڵگر پڕ لە نەوتی خاو دەبینرێن کە لە دەروازەی ئوم جەلوود لە گوندەواری منبجەوە بەرەو ناوچەکانی ژێر دەسەڵاتی میلیشیا چەکدارەکانی بەکرێگیراوی دەوڵەتی تورک تێدەپەڕن.
هاوکات بەرێوەبەریی پەیەدە بەشێک لە سووتەمەنی مولیدەکانی کارەبای لە قامیشلۆ و حەسەکە بڕیوە و بەهۆیەوە کاتژمێرەکانی کارکردنیان لە 8 کاتژمێرەوە بۆ 6 کاتژمێر کەمیکردەوە و لەگەك ئەوەشدا نرخی هەر ئەمپێریکی کارەباشی لە قامیشلۆ بەرزکردۆتەوە.
بەڕێوەبەریی پەیەدە گرنگترین بیرە نەوت و گازەکانی ناوچەکە کۆنتڕۆڵ دەکات، لەوانە بیرەکانی (ڕمێلان و ئەل ـ سووەیدییە) لە گوندەوارەکانی دێرک و بیرەکانی (ئەل ـ شەدادی و ئەل ـ جبسا) لە گوندەواری حەسەکە و کێڵگە نەوتییەکانی (ئەل ـ عومەر و ئەل ـ تەناک) لە گوندەوارەکانی دێرەزوور.
ئەمە لەکاتێکدایە کە هاووڵاتیانی شار و شارۆچکەکانی ڕۆژئاوای کوردستان بەهۆی کەمی سووتەمەنی حکومیەوە، ناچار دەبن کە بە نرخێکی زۆر گران سووتەمەنی لە بازاڕی ئازاد بکڕن و جاری وایە نرخی هەر لیترێک دەگاتە 5000 لیرەی سووری. بەڕێوەبەریی پەیەدە، پشکی مووەلیدەکانی کارەباشی لە سووتەمەنی کەم کردۆتەوە و لە ئەنجامدا کاتژمێرەکانی بەرهەمهێنانی کارەبا بۆ هاووڵاتیان کەمی کردووە و هاوکات پەیەدە نرخی ئەمپێرەکانی کارەباشی زیاد کردووە.
