“تۆپبارانەکە ئەو ناوچانەی کردۆتە ئامانج کە هێزە کوردییەکان و هێزەکانی ڕژێمی سووریایان تێدا جێگیرکراون”.
لە ئەنجامی تۆپباران کردنی گوندێکی باکووری شاری حەلەب لەلایەن دەوڵەتی تورکەوە، هاوڵاتییەکی سڤیل گیانی لەدەستدا و 3 منداڵیش بریندار بوون.
ڕوانگەی سوری بۆ مافەکانی مرۆڤ بڵاویکردەوە، لە ئەنجامی تۆپبارانەکانی ئەرتەشی تورکیا و میلیشیا داگیرکەرەکانی بەکرێگیراوی دەوڵەتی تورک بۆ سەر گوندی “حەلیسە”، کۆچبەرێکی تەمەن 40 ساڵی خەڵکی عەفرین شەهید بووە و 3 منداڵی تەمەن 9، 13 و 14 ساڵانیش بە سەختی برینداربوون.
ڕوانگەکە دەستنیشانیشی کردووە کە تۆپبارانەکە گوندەوارەکانی باکووری حەلەب و ئەو ناوچانەی کردۆتە ئامانج کە هێزە کوردییەکان و هێزەکانی ڕژێمی سووریایان تێدا جێگیرکراون.
شایانی باسە ئەو هاووڵاتییەی کە شەهید بووە، خەڵکی ناوچەی “جندرێس”ی هەرێمی عەفرینی ڕۆژئاوای کوردستان بووە.
