ئۆجەلان: من هاوکاریی پێویست بۆ پێشنیارەکەی بەڕیز باخچەلی و بەڕێز ئەردۆغان دەکەم

ئۆجەلان: ”بەهێزکردنەوەی برایەتیی کورد – تورک بەرپرسیارێتییەکی مێژووییە”.

یەکەمین ڕاگەیاندراوی شاندەکەی پارتی یەکسانی و دیموکراسیی گەلان (دەم پارتی) کە پێکهاتبوو لە سری سورەیا ئۆندەر و پەروین بوڵدان، لەبارەی کۆبوونەوەیان لەگەڵ عەبدوڵڵا ئۆجەلان بڵاوکرایەوە. ئۆحجەلان لە پەیامەکەی خۆیدا گوتوویەتی: “من خاوەنی ئەو شارەزایی و بڕیارەم کە بەشداری پێویست لە پارادایمە نوێیەکەدا بکەم کە بەڕێزان باخچەلی و ئەردۆغان پشتیوانیی لێ دەکەن”.

 شاندەکەی دەم پارتی دەڵێت ”لە 28ـی کانوونی یەکەمی 2024 لە ئیمرالی لەگەڵ بەڕێز ئۆجەلان کۆبوونەوەیەکی فراوانمان ئەنجامدا.”

 ئەو دوو پەرلەمانتارە ئاماژەیان بە تەندروستیی ئۆجەلان کردووە و نووسیویانە ”تەندروستیی باشە و ورەی بەرز بوو. ئەو هەڵسەنگاندنانەی لەبارەی چارەسەری هەمیشەیی پرسی کورد کردنی، زۆر گرنگ بوون.”

 پەروین بوڵدان و سری سورەیا ئۆندەر دەڵێن ئۆجەلان گوتوویەتی، ”بەهێزکردنەوەی برایەتیی کورد – تورک بەرپرسیارێتییەکی مێژووییە.”

 رێبەری زیندانیکراوی پەکەکە لە کۆبوونەوەکەدا گوتووشییەتی ”رووداوەکانی غەززە و سووریا پیشانیاندا کە نابێت بە دەستوەردانی دەرەکی کە هەوڵی ئەوە دەدات چارەسەری ئەو کێشەیە قووڵتر بکات، چارەسەری ئەم کێشەیە دوابخرێت. بۆ هەوڵدان لەپێناو بەسەرکەوتن گەیاندنی ئەمە، پاڵپشتی و پێشنیازەکانی ئۆپۆزسیۆنیش گرنگن.”

 ئۆجەلان ئاماژەی بەوە کردووە ”بۆ سەرکەوتنی پرۆسەکە، دەبێت هەموو لایەنە سیاسییەکان بێ گوێدانە مامەڵە تەسک و سەردەمییەکان، دەستپێشخەری بکەن، بنیادنەرانە مامەڵە بکەن و پاڵپشتیی پێشکێش بکەن. بێگومان یەکێك لە گرنگترین زەوینەکانی ئەم پەڵپشتییە، پەرلەمانە”.

 دەقی ڕاگەیاندراوەکە:

بۆ راگەیاندن و رای گشتی؛

 لە 28ـیی کانوونی یەکەمی 2024ـدا، دانیشتنێکی فراوانمان لەگەڵ بەڕێز عەبدوڵڵا ئۆجەلان لە ئیمرالی ئەنجام دا. تەندروستیی باشە و ورەی زۆر بەرزە. هەڵسەنگاندنەکانی سەبارەت بە دۆزینەوەی چارەسەری هەمیشەیی بۆ کێشەی کورد، زۆر گرنگ بوون.

 لە دانیشتنەکەدا کە هەڵسەنگاندن بۆ دوایین پێشهاتەکانی رۆژهەڵاتی نێوەڕاست و تورکیا کرا، بەڕێز ئۆجەلان پێشنیازی چارەسەری ئەرێنیی خستەڕوو بەرامبەر بە سیناریۆ تاریکەکان کە دەسەپێنرێن.

 چوارچێوەی گشتیی بیرۆکەکان و روانگەکانی بەم شێوەیەن:

 – بەهێزکردنەوەی برایەتی تورک-کورد، وێڕای ئەوەی بەرپرسیاریێتییەکی مێژووییە، گرنگە و بووەتە پێویستییەکی چارەنووسساز بۆ هەموو گەلان.

 – بۆ سەرکەوتنی پرۆسەکە، پێویستە سەرجەم لایەنە سیاسییەکانی تورکیا دەستپێشخەری بکەن و هەڵوێستی ئەرێنی و ئاڤاکاریان هەبێت بەبێ گیرۆدەبوون بە حیساباتی کاتی و تەسک. بێگومان یەکێک لە گرنگترین مەیدانەکانی ئەم بەشدارییە، پەرلەمانی تورکیا دەبێت.

 – رووداوەکانی غەززە و سووریا دەریان خستووە کە چیتر ناکرێت چارەسەری ئەم کێشەیە دوابخرێت کە هەوڵدەدرێت لە رێگەی دەستتێوەردانی دەرەکییەوە ئاڵۆزتر بکرێت. بۆ بەسەرکەوتن گەیاندنی کارێک کە گرنگییەکەی هاوشێوەی مەترسییەکەیە، پێشنیاز و بەشداریی ئۆپۆزیسیۆنیش گرنگن.

 – من خاوەنی ئەو شارەزایی و بڕیارەم کە بەشداری پێویست لە پارادایمە نوێیەکەدا بکەم کە بەڕێزان باخچەلی و ئەردۆغان پشتیوانیی لێ دەکەن.

– شاند، ئەم روانگەیەی من لەگەڵ دەوڵەت و لایەنە سیاسییەکان باس دەکات. لەبەر رۆشنایی ئەمانە، ئامادەم هەنگاوی ئەرێنی بنێم و بانگەواز بکەم.

– هەموو ئەم هەوڵانەمان، وڵات دەگەیێنێتە ئەو ئاستەی شایستەیەتی و هاوکات رێبەرێکی زۆر بەنرخیش دەبێت بۆ گۆڕانکاری دیموکراتی.

 سەردەم، سەردەمی ئاشتی و دیموکراسی و برایەتییە بۆ تورکیا و ناوچەکە.

 بەڕێزەوە بۆ رای گشتی،

 29ـی کانوونی یەکەمی 2024

پەروین بوڵدان و سڕی سوورەیا ئۆندەر