“ڕوانگەی “ئۆجەلان، پەکەکە و دەم پارتی”، لەسەر چارەسەرکردنی پرسی کورد و کوردستان، لە بنەڕەتدا سەرلەنوێ دووبارەکردنەوەی سیاسەتی “یەک دەوڵەت، یەک نەتەوە، یەک وڵات، یەک ئاڵا و یەک زمان”ی دەوڵەتی تورکە.
پارتی وڵاتپارێزانی کوردستان (PWK) پشتیوانی لە پرۆسەی چەکدانانی پارتی کرێکارانی کوردستان (پەکەکە) دەکات و پەیامێکی لەو بارەوە بڵاو کردەوە.
دەقی پەیامەکەی پارتی وڵاتپارێزانی کوردستان:
نووسینگەی ڕاگەیاندنی پارتی وڵاتپارێزانی کوردستان (PWK):
پشتگری لە چەکدانان، موخاتەبی پرسی کورد و کوردستان، گەلی کوردستان و نوێنەرە سیاسییەکانی دەکەین
لە ڕێکەوتی 11ی تەمموزی 2025دا، کۆمەڵێک گەریلای پەکەکە لە نزیک شاری سلێمانی لە باشووری کوردستان، ڕایانگەیاند کە ئەوان لەسەر بانگەوازی عەبدوڵڵا ئۆجەلان، چەکەکانیان دەسووتێنن و کۆتایی بە خەباتی چەکداری دەهێنن. ئێمە جارێکی دیکە بە گەلەکەمان ڕادەگەیەنین کە پشتیوانی لە چەکدانانی پەکەکە و کۆتایی هێنان بە شەڕ و ململانێیەکان و ئۆپەراسیۆنە سەربازییەکانی دەوڵەتی تورک و مردنەکان دەکەین.
بەڵام بێگومان، دانانی چەک لەلایەن پەکەکەوە بە واتای چارەسەرکردنی پرسی کورد و کوردستان نیە
ڕوانگەی “ئۆجەلان، پەکەکە و دەم پارتی”، لە چارەسەرکردنی پرسی کورد و کوردستاندا، کە “دەوڵەتی سەربەخۆ، فیدرالیزم، ئۆتۆنۆمی و داواکاریی کولتووری” ڕەتدەکاتەوە و ڕوانگەی “نەتەوەیەکی دیموکراتیک، کۆماری دیموکراتیک، نیشتمانێکی هاوبەش” لەسەر بنەمای “هاوڵاتییەکی یەکسان”، پێشنیار دەکەن، لە بنەڕەتدا سەرلەنوێ دووبارەکردنەوەی سیاسەتی “یەک دەوڵەت، یەک نەتەوە، یەک وڵات، یەک ئاڵا و یەک زمان”ی دەوڵەتی تورکە.
پرسی کوردستان پرسی مافی چارەی خۆنووسینی نەتەوەی کوردە، پرسی قەوارەیەکی سیاسی و جوگرافی و نەتەوەیی، خۆبەڕێوەبەریی خەڵکی کوردستانە لەسەر خاکی خۆیاندا. پرسی کورد پرسی دەستەبەرکردنی مافەکانی زمان و کولتوور و ماف و ئازادییە دیموکراتیکەکانی کوردە کە لە مەترۆپۆلەکانی تورکیادا دەژین؛ هەروەها پرسی کورد لە مەترۆپۆلەکانی تورکیادا کە دانیشتوویەکی زۆریان هەیە، پرسی خۆبەڕیوەبەریی هەرێمی کوردانە.
پێویستە بە زمانێکی ڕوون بگوترێ کە لە مەسەلەی کورد و کوردستاندا، لە هەلومەرجی ئەمڕۆدا، قبوڵکردنی تەنیا یەک ڕێکخراو و تاکێک وەک موخاتەب لە ڕووی مێژوویی و سیاسی و یاساییەوە هەڵەیە و ڕێگای چارەسەرکردنی کێشەکە قورستر دەکات. موخاتەبەی ئەو پرسە، نەتەوەی کورد و خەڵکی کوردستان و سەرجەم نوێنەرە سیاسییەکانیانە.
ئەمڕۆ نەتەوەی کورد پێویستی بە هاوپەیمانییەکی نەتەوەیی و دیموکراتیکی سەقامگیر هەیە کە داخوازیی بەپەلە و داخوازیەکانی بۆ قەوارەیەکی نەتەوەیی و جوگرافی و سیاسی و ئامانجە کورتخایەن و مامناوەند و درێژخایەنەکان لەخۆ بگرێت.
هاوکات لەگەڵ هاوپەیمانییەکی هەمیشەیی لەو جۆرە، بەمەبەستی ئامادەکردنی زەمینە بۆ چارەسەرکردنی پرسی کورد و کوردستان لەڕێگەی دیالۆگەوە؛ لە ڕێگا و ڕێبازی سیاسی، دیموکراتیک، مەدەنی و ئامرازی ئاشتیانە، ئامادە کرابێت، لەسەر بنەمای داخوازییە خێراکانی کورد، دەبێت لایەنی کوردی دابمەزرێت و ئەو لایەنە کوردییە موخاتەبەی دەوڵەتی تورکیا بێت.
لە پێناو دامەزراندنی لایەنی کوردی، پێویستە پارتە سیاسییەکانی کورد و ڕێکخراوەکانی کۆمەڵگەی مەدەنی و کەسایەتییە قبوڵکراوەکانی کورد کە کاریگەرییان لە کۆمەڵگادا هەیە، بەبێ بەفیڕۆدانی کات کۆببنەوە و لەو بوارەدا هەنگاو بنێن. لەم پڕۆسە هەستیار و گرنگەدا کە پێیدا تێدەپەڕین، دامەزراندنی نوێنەرایەتییەکی وەها نەتەوەیی و دیموکراتیکی لەم شێوەیە ئەرک و بەرپرسیارێتییەکی نەتەوەیی و نیشتمانی و مێژووییە و ئەم ئەرکەش لەسەر شانی هەموومانە.
پێویستە لایەنی کوردی کە نوێنەرایەتی ئیرادەی گەلی کورد و هەموو پێکهاتەکانی کوردستان دەکات و دەوڵەتی تورکیا، بنەماکانی یاسای نێودەوڵەتی و ئەزموونەکانیش لەو بارەوە لەبەرچاو بگرێت، لەسەر مێزەکە دابنیشێت و بە شێوەیەکی کراوە و شەفاف بەرنامە و نەخشەڕێگای چارەسەری ئامادە بکات. لەوەش زیاتر؛ هەموو ڕێگا و شێواز و ڕوانگەکانی دیکە خزمەت بە چارەسەرکردنی پرسەکە ناکەن و تەنها پرسەکە ئاڵۆزتر و تێکەڵتر دەکەن.
لەو چوارچێوەیەدا، دوای چەکدانانی کۆمەڵێک گەریلای پەکەکە لە 11ی تەمووزی 2025دا، لە سەرچاوە فەرمی و نافەرمیەکانەوە ڕاگەیەندرا کە ڕەجەب تەیب ئەردۆغان، سەرۆککۆماری تورکیا لەسەر ئەو بابەتە “بەیاننامەیەکی مێژوویی” بڵاو دەکاتەوە. ئەو “بەیاننامەی مێژوویی” چاوەڕوانکراوە، لە ڕۆژی شەممە 12ی حوزەیرانی 2025 بڵاو کرایەوە. جگە لە هەڵسەنگاندنێک بۆ ئەو پرۆسەیەی کە بە “تورکیای بێ تیرۆر” پێناسە کرا و هەندێک لێدوانی گشتی سەبارەت بە دۆخی ئێستا، هیچ شتێکی نوێی بۆ کورد تێدا نەبوو. ئەوەی تازە بوو، پەرەپێدانی ئامانجەکە بوو لە “تورکیایەکی بێ تیرۆرەوە” بۆ “ناوچەیەکی بێ تیرۆر” و بۆ ئەمەش دیاریکردنی سنوورە هەژموونگەرییە ناوچەییەکان لەسەر بنەمای “برایەتی تورک، کورد و عەرەب” بوو.
ئەو سیاسەتەی کە ئەردۆغان باسی کرد، نوێکردنەوەی ستراتیژیی هەژموونیی هەرێمییە، کە لە مێژە بە “نیو-عوسمانیزم” وەسف دەکرێت. کورد و بزووتنەوەی نەتەوەیی کورد بەربەستن لە بەردەم جێبەجێکردنی ئەم ستراتیژە و بۆ لابردنی ئەو ئاستەنگە، پێویستە سەرەتا کورد لە هەموو خواست و تایبەتمەندییە نەتەوەییەکانی دوور بخرێتەوە و لەگەڵ “دەوڵەت و کۆمەڵگەی تورک”دا بکرێت بە یەک و ئاسمیلە بکرێت.
دەتوانین بڵێین هەوڵ و سیاسەتەکانی ئەم دواییەی ئەردۆغان و باخچەلی و دەوڵەتی تورکیا، هەوڵێکە بۆ ڕێگریکردن لە هەل و دەرفەتەکانی کورد کە لەگەڵ گۆڕانکاری و پێشهاتەکانی ڕۆژهەڵاتی ناوەڕاست و پەرەپێدانی ستراتیژییەکی هەژموونی نوێ، دێنەئاراوە.
داتاکانی بەردەست نیشانی دەدەن کە هەڵوێست و مەبەستی ڕەجەب تەیب ئەردۆغان و دەوڵەت باخچەلی و دەوڵەتی تورک بە شێوەیەکی گشتی، ڕێگە خۆشکردن نییە بۆ چارەسەرکردنی ماف و ئازادییە نەتەوەیی و دیموکراتییەکانی کورد لە باکووری کوردستان؛ یان بۆ ڕێزگرتن لە مافە نەتەوەیی و دیموکراتیکەکان، ئازادی و خۆبەڕیوەبەرییەکی سیاسی و خاوەن ستاتۆی نەتەوەی ئێمە لە ڕۆژئاوای کوردستان بێت. بەپێچەوانەوە بۆ ڕێگریکردن لەم کارە لە ناو ڕێکخستنێکی نوێدان.
دەوڵەتی تورکیا دەبێت دەستبەرداری سیاسەتی سەد ساڵەی ئینکاری و ئاسمیلاسیۆن و قڕکردن بێت. دەبێ ناسنامەی کورد، پەروەردە بە زمانی کوردی، فەرمیبوونی زمانی کوردی، ئازادی بیرکردنەوە و چالاکی ڕێکخراوەیی قبووڵ بکرێت و ئەو مافانە لە دەستووری بنەڕەتیی تورکیادا گەرەنتی بکرێن. پێویستە هەموو ئەو سزایانە هەڵبوەشێنرێنەوە کە لەبەر چالاکییە سیاسی و دیموکراتیک و مەدەنییەکان سەپێنراون و ئەوانەی بەهۆی ئەو هۆکارانە سزادراون ئازاد بکرێن و هەنگاوی یاسایی پێویست بگیرێتەبەر بۆ ئەوەی ڕێگە بدرێت ئەو گەریلایانەی کە چەکیان داناوە، بتوانن ئازادانە بگەڕێنەوە زێدی خۆیان.
14/7/2025
نووسینگەی ڕاگەیاندنی پارتی وڵاتپارێزانی کوردستان (PWK)
