ئەم سێ زیندانییە سیاسییەی کورد، مەترسی لە سێدارەدانیان لەسەرە

ئەو 3 زیندانییە سیاسییە لە کاتی شۆڕشی ژینادا بە دروشمی “ژن، ژیان، ئازادی”، لەلایەن هێزە ئەمنییەکانی ئێرانەوە دەستبەسەر کراون.

ڕێژیمی ئیسلامیی ئێران، وەک ئامادەکاری بۆ لەسیدارەدانیان، 3 زیندانیی سیاسیی کوردی لە زیندانی ناوەندیی ڕێژیم لە ئورمیەوە بۆ “زیندانی گشتیی تاوانەکان” گواستۆتەوە.

ڕێکخراوی مافی مرۆڤی کوردستان ڕایگەیاند، سێ زیندانیی سیاسی کورد کە سزای لەسێدارەدانیان بەسەردا سەپێنراوە، لە ورمێ بۆ زیندانێکی دیکە گواستراونەتەوە و مەترسی جێبەجێ کردنی سزاکەیان لە هەر کاتێک زیاتر بووتەوە.

لە ڕاگەیاندراوی ڕێکخراوەکەدا هاتووە، دوێنێ شەممە، 23/8/2025، سێ زیندانیی سیاسیی سزادراو بە سزای لە سێدارەدان بە ناوەکانی پژمان سوڵتانی تەمەن 30 ساڵ، عەلی سۆران قاسمی تەمەن 28 ساڵ و ڕۆژگار بەگزادە تەمەن 42 ساڵ بە شێوەیەکی نایاسایی لە زیندانی ڕێژیمی ئێران لە ئورمیەوە بۆ “زیندانی گشتی تاوانەکان” گواستراونەتەوە.

لە ڕاگەیاندراوەکەدا ئاماژە بەوەشکراوە، دامەزراوەکانی مافی مرۆڤ ئەو هەوڵەیان وەکوو هەڕەشەیەکی ئاشکرا دژی پاراستنی گیانی ئەوان لە قەڵەمی داوە کە گواستنەوەی زیندانییانی سیاسیی لە ورمێ پێشێلکارییەکی ئاشکرای مافەکانی مرۆڤە.

باس لەوەشکراوە، بنەماڵەی ئەو سێ زیندانییە سیاسییە لە سەردانە بەردەوامەکانیان بۆ لای کاربەدەستانی دادوەری و ئەمنییەت خوازیاری ڕوون بوونەوەی دۆخی منداڵەکانیان بوون، بەڵام تا ئێستا وڵامی دیارکراویان پێ نەدراوەتەوە و بەدواداچوونەکانیشیان بێ ئەنجام ماوەتەوە.

جێگای ئاماژەیە، ئەو سێ زیندانییە سیاسییە لە کاتی شۆڕشی ژینادا بە دروشمی “ژن، ژیان، ئازادی” لە لایەن هێزە ئەمنییەکانی ڕێژیمی ئێرانەوە دەستبەسەر کراون و  پرۆسەی بەناو دادگاییکردنەکەیان لە “دادگای شۆڕشی” ڕێژیمی ئێران لە ورمێ بە نادادپەروەریی و بەبێ ئامادەبوونی پارێزەرەکانیان بەڕێوەچووە.

ئەو 3 زیندانییە سیاسییەی کورد، لە لایەن ڕێژیمی ئێرانەوە بە تۆمەتی “یاخیبوون، پێکهێنانی گرووپی دژ بە حکومەت، پەیوەندی و پیلانگێڕی دژ بە ئاسایشی نەتەوەیی و پڕوپاگەندە لە دژی دەوڵەت” بە لەسێدارەدان سزا دراون.