“هێسرا مەروان” خەڵکی گوندی “قۆلمبغ”ی سەر بە شاری کۆبانێ رۆژئاڤای کوردستانە و ناوی دایکی “ئیلهام”ـە.
ڕفاندنی منداڵان لە ڕۆژئاوای کوردستان و ناوچەکانی ژێر دەسەڵاتی هێزەکانی هەسەدە بەردەوامن و لەم دواییانەدا چەتەکانی بەناو “جوانێن شۆرەشگەر”، کە ڕاستەوخۆ لە پەکەکە فەرمان وەردەگرن، کچێکی تەمەن 14 ساڵانیان لە کۆبانێ ڕفاندووە و هەتا ئێستا چارەنووسی نازانرێت.
سەرچاوەکانی پێگەی “دارکا مازی” ئاشکرایان کردووە کە تاقمی چەتەئاسای “جوانێن شۆرەشگەر”ی پەکەکە، لە ڕێکەوتی 7/8/2025دا کیژۆڵەیەکی مێرمنداڵیان بەناوی “هێسرا مەروان ئەحمەد جومعە” لە شاری کۆبانێ ڕۆژئاڤا ڕفاندووە کە لە ساڵی 2011دا لەدایک بووە و تەمەنی تەنها 14 ساڵە.
سەرچاوەکانی “دارکا مازی” ئاماژەیان بەوە کردووە کە “هێسرا” خەڵکی گوندی “قۆلمبغ”ی سەر بە شاری کۆبانێ رۆژئاڤای کوردستانە و ناوی دایکی “ئیلهام”ـە.
سەرەڕای ئەوەی کە مەزڵووم کۆبانێ، فەرماندەی گشتیی هێزەکانی سووریای دیموکراتیک لە ساڵی 2019دا لەگەڵ ڤێرجینیا گامبا، نوێنەری نەتەوە یەکگرتووەکان بۆ کاروباری منداڵان، پەیمانێکی واژۆ کردووە و بەڵینی داوە کە ئیدی منداڵان تێکەڵ بە ڕیزی هیزەکانی خۆی نەکات و هەروەها ئەو منداڵانانەش ئازاد بکەن کە پێشتر چەکداریان کردوون، بەڵام هەسەدە و فەرماندەکەی هەتا ئێستاشی لەگەڵدا بێت، بە بەڵێن و واژۆکەی خۆیان پێبەند نەبوون و بەردەوام و بەشێوازی جۆراوجۆر منداڵانی ڕۆژئاوای کوردستان دەڕفێنن و بەزۆر چەکداریان دەکەن و لە شەڕەکاندا بەشدارییان پێدەکەن.
بەبڕوای چاودێران ئامانجی چەتەکانی تاقمی بەناو “جوانێن شۆرەشگەر” لە ڕفاندنی منداڵی بچووک، شۆردنەوەی مێشکیان بەگوێرەی ئایدۆلۆژیاکانی پارتی کرێکارانی کوردستان (پەکەکە) و چەکدارکردن و تێکەڵکردنیانە بە ڕیزی هێزە چەکدارەکانی پەکەکە.
