کۆبوونەوەکەی ئۆجەلان و کۆمیسیۆنی پەرلەمانی تورکیا نمایشێکی نوێ بوو بۆ فریودانی ڕای گشتی
کۆبوونەوەی ئیمرالی لەجیاتی ئەوەی کە نیشانەی دەستپێکی ئاشتی بێت، بیرهێنانەوەی سووڕی کۆنی ئەو بەڵێنانەیە کە قەد جێبەجێ نەکراون و بە دەیان ساڵە خەڵکی کوردستانیان قەتیس کردووە.
کۆبوونەوەی ئەم دواییەی عەبدوڵڵا ئۆجەلان، ڕێبەری بەندکراوی پەکەکە لەگەڵ کۆمیسیۆنی پەرلەمانی تورکیا نە “هەنگاوێک بەرەو ئاشتی” بوو، نە “پێشکەوتنێکی مێژوویی”ش. ئەم کۆبوونەوەیە زیاتر نمایشێکی دەستکرد بوو کە ئامانجی ئەوە بوو کە شکستە سیاسییەکانی ئەنقەرە و ئەو چەقبەستووییە لەمێژینەیە لەسەر پرسی کورد، بە وێنەیەکی یادگاری ئیمرالی، بشارێتەوە.
ئۆجەلان بە بانگەوازە نوێیەکانی بۆ “هەڵوەشاندنەوەی پەکەکە” و “رێگای دیموکراتیک”، هەوڵدەدات سیمایەکی فریادڕەس لە خۆی وێنا بکات؛ سیمایەک کەوا نیشان بدات ئەو هیچ پەیوەندییەکی بە دەیان ساڵ شەڕ و توندوتیژی و شەڕی چەکداری و بڕیارە کارەساتبارەکانیەوە نییە. هەروەها حکومەتی تورکیاش ئەم نمایشەی ڕێک بۆ ئەم گێڕانەوەیە دەوێت: وێنەیەکی نوێ بەبێ هیچ گەرەنتییەکی ڕاستەقینە، بۆ چارەسەری بنەڕەتیانەی پرسی کورد دروست بکات.
کۆمیسیۆنی پەرلەمانی تورکیا کە 51 ئەندامی هەیە، بە دروشمە جوانەکانی “پێکەوە ژیان” و “ئاشتی”، نە ئامرازی ئاشتییە و نە نوێنەری ئیرادەیەکی جدییشە بۆ چاکسازی. کۆمیسیۆنەکە زیاتر لە قەڵغانێکی سیاسی دەچێت کە ڕایدەگەیەنێت پرۆسەی ئاشتی “لە جووڵەدایە”، بەبێ ئەوەی هیچ هەنگاوێکی جددی بنرێت.
تا تورکیا چاکسازی قووڵی یاسایی جێبەجێ نەکات و بە فەرمی دان بە مافەکانی نەتەوەی کورددا نەنێت و واز لە بەکارهێنانی ئۆجەلان وەک ئامرازێک نەهێنێت، ئەم جۆرە کۆبوونەوانە لە تاکتیکی سیاسی و خەرجکردنی ناوخۆیی زیاتر هیچی تر نابن.
کۆبوونەوەی ئیمرالی لەجیاتی ئەوەی کە نیشانەی دەستپێکی ئاشتی بێت، بیرهێنانەوەی هەمان سووڕی کۆنی ئەو بەڵێنانەیە کە قەد جێبەجێ نەکراون و بە دەیان ساڵە خەڵکی کوردستانیان قەتیس کردووە.
