پەکەکە ناسنامەی فەرماندەیەکی باڵای ئاشکرا کرد

هەپەگە: “بەرفین نوورهەق، ئەندامی ئەنجومەنی پاژک و ئەندامی کۆنسەی فەرماندەیی هەپەگە و یەژاستار بوو”.

ناسنامەی فەرماندەیەکی پێشەنگی پەکەکە بە ناوی “بەرفین نوورهەق” ئاشکرا بوو کە چوار ساڵ لەمەوبەر لە چیای گارە لە هێرشێکی دەوڵەتی تورکدا کراوەتە ئامانج و پەکەکە هەتا ئێستا هەواڵی گیانلەدەستدانەکەی لە بنەماڵەکەی و ڕای گشتیی شاردبۆوە.

هەپەگە، باڵی سەربازیی پەکەکە، لە ڕێکەوتی 12ی دیسەمبەری 2025دا، ناسنامەی فەرماندەیەک و گەریلایەکی ئاشکرا کرد کە لە مانگی کانوونی یەکەمی ساڵی 2021دا لە دەڤەری گارە گیانیان لەدەستداوە.

هەپەگە لە ڕاگەیاندراوێکدا ناسنامەی ئەو فەرماندەیەی بە ناوی بەرفین نوورهەق و گەریلاکە بە ناوی سەما ڕۆزای ئاشکرا کردووە.

بەگوێرەی ڕاگەیەندراوەکە، ئەو فەرماندە و گەریلایەی پەکەکە لە ڕێکەوتی 13ی کانوونی دووەمی ساڵی 2021دا، لە دەڤەری گارە لە باشووری کوردستان گیانیان لەدەستداوە.

لە ڕاگەیاندراوەکەدا هاتووە کە بەرفین نوورهەق، ئەندامی ئەنجومەنی پاژک و ئەندامی کۆنسەی فەرماندەیی هەپەگە و یەژاستار بووە.

ناسنامەی ئەو بەرپرس و گەریلایەی پەکەکە بەم شێوەیە ڕاگەیەندراوە:

بەرفین نوورهەق: ناوی فەرمی هانم هان دەمیر، لە پارێزگای مەرەش لە باکووری کوردستان لەدایک بووە.

سەما ڕۆزا: ناوی فەرمی ئینجی سومبول، لە پارێزگای ئەرزرومی باکووری کوردستان لەدایک بووە.

پەکەکە وەکوو هەزاران گەریلای دیکە، بۆ ماوەی 4 ساڵ گیانلەدەستدانی ئەو فەرماندە و گەریلایەشی لە بنەماڵەکانیان و ڕای گشتی شاردبۆوە.