یالچین کوچوک – پەشا یەکەمین
دەولەتا ترکیێ پاش سالێن ھەفتەیان ژ چاخا رابووری، ب دەھان زەلامێن خوە ژ بۆ مەبەستێن ئیستخباراتی و بجی کرنا ئارمانجێن دەولەتێ شاندنە ناڤا پارتێن چەپ یێن ترکیێ ب گشتی و پەکەکێ ب تایبەتی کو د وێ دەمێ دە، پەکەکێ خوە وەکە پارتییەکە گرێدایی بنەمایێن کورداتیێ و تەکۆشینا ژ بۆ ئاڤاکرنا کوردستانا مەزن دایە ناس کرن، لێ بەلێ ب فۆرمەکە چەپ.
یالچین کوچوک یەک ژ وان کەسان بوو کو دەولەتا ترکیێ و سازیێن وێ یێن گرینگ وەکە سازیێن ئیستخباراتی و لەشکری مفایەکە ھەری زێدە ژ ھزرا وی کریە، ب تایبەت ل دەما دەستپێکرنا شۆرەشێن باشوورێ کوردستانێ و ھەست کرنا ترکیێ ب ژدەستدانا کوردێن باکوور و نێزی بوونا وان ژ بزاڤا رزگاریخوازا کوردستانێ، ھەموەخت خورت بوونا ھەست و ھزرا ناسیۆنالیستی، ترکیێ ئەڤ زەلام بکار ئانی و ب رێیا وی ئەبدوڵا ئۆجەلان وەکە سەرۆکێ کوردان ل باکوورێ کوردستانێ بەرنیاس کر، گەلۆ ئەرێ ئەڤ چ کەسە ترکیێ ل ئاستەکی وھا بەرز وەزیفەدار کری؟
یالچین کوچوک واتە “یالچینێ بچووک” ل سالا ١٩٣٨ان دە ل باژارێ ھاتای ژ دایک بوویە، ئەو نیڤ تورکمەن و نیڤ قەفقازە، وەکە سیاسەتمەدار و دیرۆک نڤیس و نڤیسکار تێ مێزە کرن، ل سالا ١٩٦٠ان دە ل زانینگەھا ئەنقەرێ وەکە خوەندکارێ یەکەم ل بەشا زانستێن سیاسی دەردچە، کوچوک نێزی ٣٠ پرتووک نڤیساندنە، ھەر وھا پرتووکا ب ناڤێ (ئینسکلۆپیدیا / زانیارییێن گشتی) نڤیساندیە، دەمەکێ وی ل زانینگەھا ئەمەریکی ئا ب ناڤێ (یالی) دەرس وەرگرتنە و دەمەکە دن ل بەریتانیایێ و ل زانینگەھا (بێرمینگ ھام)، وی ھەروەھا پسپۆریەکە بێھەمپا د زمان و ناڤان دە ھەیە و زمانێن ترکی، ئینگلیزی، فارسی و رووسی باش فێم دکە، پاش سالێن نۆتان دچە جەم ئۆجالان و ل ور فێری زمانێ کوردی ب ھەردو زارێن کورمانجی و سۆرانی دبە.
یالچین کوچوک یەک ژ وان کەسانە کو دەولەتا ترکیێ مفایەکە ھەری زێدە ژێ دبینە، ب تایبەت د ئالیێ لەشکری و ئیستخباراتی دە، ھەر وھا ترکیێ یالچین کوچوک وەکە کەسەکە گرینگ ل دژی ئالیێن چەپ بکار دینە.
وەختا ل ترکیێ باس ل مارکسییەتێ یان رووسیا یان ژی چەپگەریێ تێ کرن، یەکەم ناڤێ کو تێ سەر زمان و د ھزرا ھەر کەسێ دە، یالچین کوچوکە.
یالچین کوچوک ب ناڤێ نوونەراتیا ھێلا چەپ ب سالان رۆژنامە و کۆڤار چاپ کرنە، د بەرنامەیێن رادیۆ و تیڤی یان دە ب نڤیسان و پرتووکێن خوە بوویە کەسەکە باوەرپێکری ژ ئالیێ ھزری دە.
پاش کو پارتا داد و گەشەپێدان ئاکەپە AKP ل ترکیێ دبە دەستھلاتدار، یالچین کوچوک و گرۆپا وی ھێدی ھێدی باندۆرا خوە ژ دەست دان، ئەو و پرانیا ئەندامێن گرۆپا وی ب بەھانەیا ئەندام بوونێ د گرۆپا (ئەرگەنەکۆن) تێن بنچاڤ کرن.
گرۆپا ئەرگەنەکۆن ژ ھنەک نڤیسەر و کەساتیێن نێزی پارتییا گەلیا کۆماری جەهەپێ پێک دھات، وەختا یالچین کوچوک ب سووچا ئەندامەتییا ڤێ گرۆپێ تێ بنچاڤکرن، کەمال کلچدارۆخلۆ سەرۆکێ جەهەپێ لێ خوەدی دەردکەڤە و داخوازێ ژ ھکوومەتا ترکیێ دکە یالچین کوچوک سەربەست بێ ئازاد کرن.
یالچین کوچوک تێ ئازاد کرن، لێ بۆ وەختا ٢ سالان ئەو ب سەدەما رەوشا خوەیا ساخلەمیێ نکارە وەکە بەرێ د بەرنامە و رەپۆرتاژێن مەدیایی دا دەرکەڤە.
گەلەک کەس وەھا دفکرن کو یالچین کوچوک ب دەستێ دەولەتێ ھاتیە ھنارتن بۆ ناڤا پارتییێن چەپ دە، د وان پرتووکێن ب دەستێ وی ھاتی نڤیساندن پرانیا زانیاریان ژ ئالیێ دەولەتێ ڤە ب وی رە ھاتینە دایین، ئەو ھەرتم بەرەڤانیێ ل مەزن بوونا ترکیێ دکە و ل سەر ڤێ بابەتێ خەباتا خوە ددۆمینە، پڕ دیکۆمێنت ژ بۆ ڤێ یەکێ ھەنە.
سەبارەت تێکلیا یالچین دگەل ئەبدوڵا ئۆجالان رێبەرێ زیندانی کرییێ پەکەکێ ب تو ئاوایەکێ ئەڤ تێکلیە شەخسی نە بوون بەلکو تێکلییێن دەولەتا ترکیێ بوون دگەل ئۆجالان ئانکو یالچین وەکە پرەکێ بوو دناڤبەرا دەولەتێ و ئۆجالان دە.
پیلانا ترکیێ ژ شاندنا یالچین کوچوک بۆ ناڤ رێخستنێن چەپ و ب تایبەت پەکەکێ ب تمامەتی سەرکەتن ئانیە، ئەڤ یەک ب دەڤێ یالچین کوچوک ب خوە ھاتیە تەسبیت کرن، وەختا کو ل دادگەھێ ب دادوەر رە گۆتی کو راستە ناڤێ وی یالچینێ بچووکە، لێ بەلێ وی خزمەتەکە ھەری مەزن ژبۆ دەولەتا ترکیێ کریە و ژ دادوەر خواست ناڤێ یالچینێ مەزن لێ وەرە کرن، دکارین ببێژین یالچین پرا سەرەکە یا لھەڤگوھەرتنا زانیاریان بوو ل ناڤبەرا دەولەتا ترکیێ و رێبەرێ پەکەکێ ئەبدوڵا ئۆجالان دە.
