كادرێن یه‌كێتیێ ل به‌هدینان 48 ده‌مژمێر مۆله‌ت دانه حزبا خوه
هه‌ژماره‌كه كادر و به‌رپرسیارێن یه‌كیتیا نشتیمانی ئا كوردستانێ ل ناڤچه‌یا به‌هدینان ئا باشوورێ كوردستانێ، ب سه‌ده‌ما ده‌ستوه‌ردانا هنه‌ك به‌رپرسیارێن یه‌كیتیێ و كڕینا ده‌نگان ژ ئالیێ وان ڤه، سكالا ژ بۆ سه‌كره‌ته‌رێن گشتی ئێن حیزبێ شاندن، وان كادران گۆتنه: «هه‌رێم كه‌مال ئاخا ئه‌ندامێ كۆمیتا سه‌كرداتیا یه‌كێتیێ، په‌ره‌یه‌كێ زۆر ل گه‌ل خوه ئانیه ناڤچه‌یا به‌هدینان كو ده‌نگێن كادران ژ بۆ خوه پێ گارانتی بكه».
ئیرۆ رۆژا پێنجشه‌می 12/12/2019ان، نێزی 30 كادر و به‌رپرسیارێن یه‌كیتیا نشتیمانی ئا كوردستانێ ل پارێزگه‌هیا دهۆكێ و ناڤچه‌یا به‌هدینان ئا باشوورێ كوردستانێ، كۆنفه‌ره‌نسه‌كه چاپه‌مه‌نیێ ل دارخستن و تێده مژارا ده‌ستوه‌ردانا هنه‌ك به‌رپرسیارێن یه‌كێتیێ و كڕینا ده‌نگان ژبۆ كۆنگره‌یا چاره‌مین ئانین زمان.
ئه‌بدولخالق هه‌ركی جهگرێ به‌رپرسیارێ مه‌لبه‌ندا 4مین ئا یه‌كێتیێ ل دهۆكێ ده‌ست نیشان كر كو «هه‌رێم كه‌مال ئاخا» به‌رپرسیارێ یه‌كێتیێ و ئه‌ندامێ كۆمیتا سه‌ركرداتیا وێ پارتیێ، ب په‌ره‌یه‌كێ زۆر ڤه هاتیه دهۆكێ و هه‌ولا ده‌ستوه‌ردانێ و كرینا ده‌نگان ژ بۆ خوه دكه.
كادرێن یه‌كێتیێ ل ڤێ ده‌ربارێ ده سكالا ژ بۆ «كوسره‌ت ره‌سوول ئه‌لی و د. به‌رهه‌م سالهـ» سه‌كره‌ته‌رێن گشتی ئێن پارتیا خوه شاندنه و تێده هشیاری دانه هه‌گه‌ر د وه‌ختا 48 ده‌مژمێرێن بهێن ده ئه‌ڤ ره‌وش نه‌یێ چاره‌سه‌ره كرن، ئه‌وێ هه‌موو راستیان ژ رایا گشتی ره ئه‌شكه‌ره بكن.
یه‌كێتیا نشتیمانی ئا كوردستانێ وێ كۆنگره‌یا خوه ئا چاره‌مین ل 21 دیسامبه‌را ئیسال 2019ان ل داربخه، ل 9 دیسامبه‌رێ هلبژارتنا كادر و ئه‌ندامێن ئۆرگانێن یه‌كێتیێ ژ بۆ كۆنگره‌ی برێڤه‌چوون، لێ به‌لێ ل هه‌ژماره‌كا باژار و باژاركێن كوردستانێ ئالۆزی ده‌ركه‌تن هۆلێ، به‌لكو بێهتر ل هنه‌ك باژاركان مینا كفری ته‌قه ل ناڤبه‌را كادر و ئه‌ندامێن بال و جه‌مسه‌رێن یه‌كێتیێ ده چێبوو.
هه‌ر كو دچه، وه‌ختا ساز كرنا كۆنگره‌یا چاره‌مین ئا یه‌كێتیێ نێزیكتر دبه، لێ به‌لێ ناكۆكی و ئالۆزیا ل نێڤبه‌را بالێن جودا جودا یێن وێ پارتیێ ژی دژوار تر دبه.
ل 6 مه‌ها رابووری شاناز ئیبراهیم كه‌چا دامه‌زرێنه‌رێ یه‌كێتیێ و به‌رپرسیارا ناڤه‌ندا ده‌رڤه یا وێ پارتیێ سه‌ردانا ناڤچه‌یا به‌هدینان و ب تایبه‌ت باژاركێ زاخۆ كربوو و ره‌خنه‌یێن هه‌ری دژوار ل سه‌ركرداتیا یه‌كێتیێ گرتبوون و گۆتبوو: «وان ناڤچه‌یا به‌هدینان پشتگوهـ خستنه».
ئه‌ڤ سه‌ردان ژ بۆ ناڤچه‌یا به‌هدینان و باژارێ زاخۆ ل ده‌مه‌كی بوو كو كادرێن یه‌كێتیێ یێن زاخۆ ئه‌ڤ سه‌ردان ره‌خنه كر و ب نه‌رینا وان، یه‌كێتی ته‌نێ وه‌ختا پێویستیێ وه‌كه هلبژارتنان بیریا وان دكه و ل وه‌ختا پارڤه‌كرنا پۆستان ب تو ئاوایێ بیریا وان ناكه.
