گرێن “تاسالۆجە” ژ دوویرڤە دیار دبن و رەنگێن وان یێن قەھوەیی و بەلەک د بنێ قاتەکە تەنک ژ بەفرێ دا مانە. ئەڤ گرێن کو ل باژارێ سلێمانییە دنێرن، ژ پشت مەیدانەکا کو تژی ئۆتۆمۆبیلێن خراب و تێکچوویی ژبەر تەقین و بوویەرێن ترافیکێ، وەکو بینەرەکە بێدەنگ خوییادکن. ئەڤ ترۆمبێل د ژەنگێ را مانە. ترۆمبێلەکا “Daewoo” سپی و بچووک بوویە پارچەیەک و کۆمەک ژ لاستیک و ئاسنێن تێکچوویی و شکەستی. بانێ ترۆمبێلێ، ژ بهێزیا پەقینێ، ژ جھێ خوە رابوویە ل کێلەکا ترۆمبێلێ یە. ئەڤ ترۆمبێل ھاتییە کشاندن دا کو ئەو ژی دگەل ترۆمبێلێن خراب بوویی د ڤێ مەیدانێ دا کۆم ببیت. مەیدان ژی، گرێدایی ئێکەتیا نشتمانی یا کوردستانێ (YNK)یە.

من ترۆمبێلا کانی د ناڤا ھەرییێ دا پارچەبوویی دیت. جاما وێ یا پێشیێ ھەلوەشییایە.  هێشتا ژی پێلاڤا کانی لسەر پێلکا بانزینێیە. تەڤلی کو سەردار کایا (سابرییێ تۆری) کو دگەل کانی بوو د شەواتا ترۆمبێلێ دە ببوو کۆمر، لێ کورسییێ پشتێ یێ ترۆمبێلێ گەلەک زیان نەدیبوو. کانی ترۆمبێلێ تاژۆت. قەپاخێ تانکێ بانزینێ هێشتا ل جهێ خوەیە، لێ ھەیکەلێ ترۆمبێلێ ژبەر تەقینا ل بنێ کورسییا سایێقی چێبوو، رووخییایە. سەدەما تەقینێ نە کو کێشەیەکا تەکنیکی د تانکێ بانزینێ دا بوو، وەکو کو بەردەڤکێ (YNK) ژ سازی یێن مەدیا و راگھاندنێ رە گۆت. لێکۆلینگها یان بزیشکییا جینایی (داد) کو ل بریتانییایە، ئەڤ لێکۆلینگەھا کو بکارا ئینانا رژیما ئیراقێ چەکێن کیمیایی ل ھەلەپچە تەکەزکربوو، ڤێ ئەینیێ لێکۆلینگەھ، پەیدابوونا مادەیا تەقەمەنییا”ج-٤” لسەر پێلاڤا کانی و سەر ئاخا ل دەردۆرا ئەرەبەیا وی ل جھێ بوویەرێ تەکەز کر.

ھن چاڤکانی یێن سەختە یێن PKK خواستن راستییێ رەش بکەن و ڤەشێرن دەما گۆتی کو پسپۆرێن ژ (جا) ل دوو راپۆرتا لێکۆلینگەھا (ئانالیتچەم) نە. لێ نە راستە، ژبەر کو من بخوە دەلیلێن جینایی، پشتی ھەفتەیەک ژ بوویەرێ، ژ جھێ تەقینێ، من برن، و ئەز ب شاھدێ سەرەکی را ئاخڤیم کو پسپۆرێ مادەیێن تەقەمەنییێ یە و ئەندامێ پارتییا وەلاتپارێزێن کوردستانێ (PWD)یە ناڤێ وی نزامەدین تاشە کو ئەو ژی بەرێ بەرپرسەکێ لەشکەری یێ پایەبلندێ PKK بوو و ژ PKK ڤەقەتییا بوو. ھەروسا من دگەل سەرۆکێ ھێزێن ئەولەکارییێ “ئستخبارات”ێ ئێکەتیا نیشتیمانیا کوردستانێ ژی ئاخڤیم.

سیخوورێ PKK کانی یلماز کوشت

یلماز ب بۆمبەیەکە کو ل بن کورسییێ سایێقی ھاتبوو دانان، ھاتن کوشتن. ئەو بۆمبە، ڤەل چات (نومان) کو ل کورسییێ پشتێ روونشتبوو، چاندبوو. بوویەر د رۆژا ١١ێ شباتا ٢٠٠٦ێ روودا دەما کانی ب ترۆمبێلا خوە ژ کۆلانا ٦٠ مەتری بەر ب ھەرێما ھلبرینێ “سەنایی” زڤری. بوویەر ل تاخا “رزگاری” کو نە گەلەک دووری ناڤەندا باژێرە روودا. بەری بۆمبە بتەقیت، ڤ. چات (نوومان) ژ ترۆمبێلێ هاتە خار ب بھانەیا کو دێ چیتە جافەنەت.

پشتی کو ب رێیا تەلەفۆنێ گەف ل وی هاتن کرن، کانی ب ئەرەبەیا خوە بەر ب کەمپا کەسێن کو ژ PKK جودابووی ڤە کو ل باژێرکێ “سەید سادق”ە چوو، ژبۆ کو ھەڤالێن خوە ئاگاھدار بکەت کو PKK د سالڤەگەرا گرتنا ئۆجالان ئامادەکارییا ئێریشەکێ ل سەر وان دکەت. کانی د نیڤا وێ شەڤێ دا دگەل من ئاخڤت، لێ کانی نەدزانی کو ئەو ئارمانجا سەرەکی یا وێ هێرشێ یە. بەرپرسێن PWD ب ناڤێ ڤەل چات (نومان)بھیستبوون. چات پاسەوان “بادیگارد”ێ تایبەتیێ مورات کارای ئالان بوو. ھێزێن ئستخباراتێ یێن ب سەر YNK ڤە ئاشکرا کرن کو پەیوەندییێن تەلەفۆنێ د ناڤبەرا چات و بەرپرسەکی لەشکەری یێ PKK ب ناڤێ سەردار ھەبوون. ئەڤ سەردار ژ ئالییێ PWD دھاتە ناسکرن کو ئەندامێ ئستخباراتێ HPGێ یە. سەردار مادەیا ج-٤یا تەقەمەنییێ دابوو چات. پشترە، ئۆفیسا PWD ل ئەورۆپا دا زانین کو؛”تیما کوژەر ژ ئالییێ PKK ڤە ھاتبوو ئۆرگانیزە کرن و چات ژ ھەرێما ھیلوانا گرێدایی ئوورفایێ یە، قاشۆ ژ PKK ڤەقەتییایە و تەڤلی PWD بوویە و ل کامپا “سەید سادق”یا نێزیکی سلێمانییێ،ب جھ بوویە. بەری بوویەرێ ب دەمەکە کورت، سەردار مادەیا ج-٤یا تەقینە دا چات. و ھەموو پەیوەندییێن تەلەفۆنان د ناڤبەرا سەردار و نوومان/ چات دە تۆمارکری نە و ھەنە.”ھێزێن ئەولەکارییا YNK پشترە ناسکرن کو نوومان ڤەگەرییا قەندیلێ.

لێپرسین نەبوو

پشتی ھەفتەیەکێ ژ کوشتنا کانی من تو ئەندامێن PWD نەدیتن. ژ ھەولێرێ ئەز ڤەگەریام سلێمانییە دا ئەز جھێ بوویەرێ ببینم و دەلیلان کۆم بکم و بجڤینم و ھندەک زەختێ ل یەنەکێ بکەم دا کو لێپرسینێ بکەن و راپۆرتەک فەرمی دەربارێ بوویەرێ بدەن و ئاشکرا بکەن. کورێ مامێ کانی (سەلمان) کو ب تەلەفۆنێ دگەل من ئاخڤی، من برە دەف بۆتان (نزامەددن تاش) و ھەڤالێن دن یێن کانی. ل وێ دەرێ، ئەز د ئۆدەیا کانی یا گەلەک نۆرمال رازام. تشتەک د وێ ئۆدێ دا ژ بلی ھندەک جل و تشتێن تایبەت و لاپتۆپێ کو من ژ بۆ وی ئینابوون، تشتەکێ دی نەبوو. من جل و تشتێن وی بۆ مالباتا وی برن. گەلەکی خەمگین بوو. تشتەک ژ کانی نەما ژ بلی دەمژمێرا دەست و بەرچاڤکێن خواندنێ کو ئەو ژی د بوویەرێ دە شکەستبوو، و پێلاڤەکا وی و تاخمێ کو گەرەک د رێویتییا ڤەگەرا ئەورۆپا ل خوە بکرا، ما بوون. PKK نە دخواست کانی ڤەگەریت ئەورۆپا ژبەر کو ل وێرێ گەلەک دھات ناسکرن و حەزکرن.

ئەز و حسەین کایتان چووین سەرەدانا بەرپرسێ ئەولەکارییێ کو گرێدایی ئێکەتیێ یە سەرکەوت حەسەن (کو ب ناڤێ سەرکەوت کووبە دھات ناسکرن). ژ بۆ مە قەھوەیا ترکی ئینا. مە ژ وی خواست کو لێپرسینەک فەرمی د دەربارێ بوویەرێ دا ڤەکەن. پشتی نیڤ دەمژمێرێ، سەرکەوت، ئەم دگەل ٢ پێشمەرگەیێن ئێکەتیێ شاندینە مەیدانا ترۆمبێلێن پەقی و تێکچوویی کو ترۆمبێلا کانی ژی د ناڤ وان دا بوو و ژەنگێ گرتبوو. سەرەدانا بورۆیا “سەرکەوت کووبە” گاڤەکە گرینگ بەری سەردانا بورۆیا تێکیلی یێن گشتی یا ئێکەتیێ ل ناڤەندا سلێمانییێ بوو. زلامێن روویێن وان ترش ئەز و حسەین کایتان برین وەزارەتا کارێ ناڤخۆ. مە وەزیرێ کارێ ناڤخۆ دیت و بێ دلێ خوە دگەل مە ئاخڤی و گۆت؛ “ھەموو تشتێ ژ دەستێن مە بێت، دێ کەین دا کو تاوانبار بچنە بەر دادوەرییێ.” تشتێ بالکێش کو د وێ رۆژێ دا چێبوو کو ٧ کەسێن گومانبار ب تاوانا کوشتنا ئەندامەکێ PWD، برنە گرتیگەھێ! رۆژنامەیەکا ھەرێمی گۆت: “کوژەرێن کو کانی یلماز کوشتی، پشتی ھەفتەیەکێ ژ بوویەرێ، ھاتینە دادگەھ کرن.”مە ناسنەکر گەلۆ ئەڤ ٧ کەس کوژەرێن کەمال شاھین بوون؟ یان روونشتنا دادگەھێ وەکو رەدفێعلا ل سەر کوشتنا کانی بوو؟!.

وەزارەتا کارێ ناڤخۆ یێ ترکیێ هێلا کاروانێ جەنازەیێن کانی و سابری ژ سنۆر بهێن دەرباسکرن، د دەمەکێ دا کو ئەگەر ھەردوو زندی بانا ترکیێ نەدهێلا ب فەرمی سینۆرێ وێ دەرباسبکەن.

ئاسانیا کوشتنێ ل کوردستانێ

ئۆتۆمۆبیل نالڤیت، د دەما کو ئەز لبەر دیوارێ کرێمیتێ ژ پییان راوەستییا مە. تو دبێ قەی ئەز ل بن ئەسمانێ زڤستانێ شەھت بوومە. نە چرووسکەکە رۆناھی ژ ناڤ ئەوران تێ، نە دەستێ خوەدێ درێژ دبە دا کو ژیانێ وەرگەرینە مرییان. تنێ بایەکێ سار ب چەرمێ قەتیایی یێ کورسی و وایرێن مەکینا ترۆمبێلێ دھەژینیت و دلەیزینیت. ژ بلی ڤێ یەکێ، تشتەک نینە. ئەڤ ترۆمبێل، د ڤێ کۆشەیێ دە ھەر کو بچیت دێ ژەنگ وێ بخوە. بەلکی د دەمەکە نێزیک دە ئەڤ ئەرەبە وەرە ژبیرکرن، گەلۆیا کێ بوو؟ و کی ئەو ئینایە ڤێرە؟ و ژ بەر چ؟

سیسەتمەدارێ ئێکەتیێ سەعدی پیرە کو ل ھەولێرێ دمینیت گۆت: “کانی سیاستمەدارەکێ باش بوو. ئەم چ بکەین؟ ژیان وسایە.” پیرە گۆتە من: “د ڤی ئاڤاھی دا، بەری ٢ سالان، کورێ من و برایێ من و کورێ برایێ من دگەل  دەھان کەسان، ب مادەیا ج-٤ ھاتن کوشتن.” من گۆتە خوە: ێ ما ھەما تەنێ مرۆڤ سیاستمەدار بە، سەدەمەکە ھێژایە کو مرۆڤ وەرە کوشتن و راستی وەرن ڤەشارتن؟!. ل ئیراقێ مرۆڤ وەکو چیچکێن ئەسمانان تێنە کوشتن. نە لێپرسینەکا ئاشکرا ھەبوو و نە ژی سزادان. کوژەرێن کانی و سابر کارێ خوە کرن و تە دگۆت قەی کەسەک نەوێریت ھەسابێ ژ وان بخوازە!؟

دەما من چاکێتێ کانییێ شین کو پەرچە پەرچە ببوو ژ ناڤ ھەرییا مەیدانا ترۆمبێلا راکر، ھاتە پێش چاڤێن من دەما کانی ئەو چاکێت ل پێشییا خۆدیکەکا شکەستی یا دوکانەکا جلان ل خوە دکر و دجەرباند. کانی ئەڤ چاکێت کری دا کو وی ژ سەرما زڤستانێ بپارێزیت. لێ ڤا ئەڤ چاکێت، پشتی خۆدانێ وی ھاتە کوشتن، ل ڤێرەیە، قەتییایە، رزییایە، ل کێلەکا ھەیکەلێ ترۆمبێلێ ھاتییە هاڤێتن.

ئەور بەلاڤ بوون و تیرێژێن رۆژێ دەرکەتن، ئەز ژی بێ دلێ خوە دووری کاڤلێ ترۆمبێلا رووخایی کەتم تە دگۆت قەی ب مانا من، دێ خوەدییێ ترۆمبێلێ دیسا ڤەگەرینم ژیانێ دا کو ئەرەبەیا خوە باژۆن و بەرێ خوە بدە رێیەک و ئالییەکە خوەش و شاد نە کو ل ڤرا بمینە.

————-

شەری لایزەر

* نڤیسکار، رۆژنامەڤان و رۆمانڤیسەکە بریتانییە. دۆستەکی ماف و دۆزا کوردە و ھەڤالا ک. یلمازە.ئەڤ نڤیس د ٨ێ شباتا ٢٠٠٦ان دە ھاتییە نڤیساندن. ژ ئینگلیزی ھاتییە وەرگێران بۆ ئەرەبی و ژ ئەرەبی ھاتییە وەرگەراندن بۆکوردی.

هوینێن هێژا دشێن ل ڤان لینکان دا چەندین بابەتێن دی ل سەر کوشتنا کانی یلماز و هندەک ولاتپارێزێن دی ژ ئالیێ پەکەکێ ڤە بخوینن: