تەڤلیهەڤیێن ھزرا ئاپۆی د مژارا «ژن، سێكس و ئازادیێ» دا – به‌شێ 2
ژ پرتووکا «ژنۆفۆبیا ئۆجالان» یا نڤیسكار ئاسۆ کەمال
ئەم کومێدیایێن نەرینێن ئۆجالانی بەردەوام دکه‌ین
ئۆجالان ل دۆر ژینگەھـ پارێزیێ دبێژیت: «ژن پێناسا ژینگەھـ پارێزیێ یە»
ئەو دبێژیت: «ژ بەر کو ئافراندنێن ژنێ ژ بۆ پێدڤییا ئابووریێ سەرەکی نە، ژ بەر ڤێ یەکێ نە ده‌وربه‌رێن خۆ پیس دکەت و نەژی دبیته گەف ل سەر كه‌ش و هه‌وایی»
ئەرێ ب راستی ھەوە نەرین ژ ڤێ نەرینێ کۆمیدی تر و پ كه‌نی تر دیتینە؟
پرسیار: هه‌گەر ئابووری یا سەرەکی یا نوكه د جڤاکێن جیهانێ دا پێشەسازی بیت، گەر ئەڤ ئابووری یە د دەستێن ژنێ دا بیت دێ چاوا ژن شێت ژینگەھێ پارێزیت؟
ئەرێ راست پیسبوون یان پاقژ کرنا خوه‌زای چ گرێدان ب رەگەزێ مرۆڤان ڤە هەیە! بەس ل گۆری ھزرا ئۆجالان هه‌گەر تو نێر بی ل وێ دەمی ھەر چالاکییەکا ئابووری یا كو تو ئەنجام بدەی، یەکسانە ب پیسبوونا خوه‌زای، لێ هه‌گەر تو ژن بی ھەر چالاکییەکا ئابووری یا كو تو ئەنجام بدەی یەکسانە ب خوه‌زا پارێزیێ!
ھوون دزانن ل گۆری ئۆجالان بابەت ب چ ئاوایی یە؟ ئەم دێ بۆ هەوەیێن هێژا بێژین:
پیسبوونا خوەزای چ گرێدان ب کاپیتالیزم و قازانجێ مەزن یێ كۆمپانییان ڤە نینە کو ھەر تشتی ژ بۆ قازانج کرنێ دكه‌ن، بەلکو ئه‌گه‌رێ سەرەکی یێ پیسبوونا خوەزای زەلامە، زەلام ل گۆری ئۆجالان دژە خوەزایە!
– واته چارەسەر کرنا کێمبوونا رێژه‌یا CO2 د ھەوای دا ژ بۆ کو ژینگەھ پاك ببیت، دڤێت زەلامێن رەبەن ژ چالاکیێن ئابووری دوور بکه‌ین و ل شوونا وانا ژنان بده‌ینه كاری!
– ئەڤە نەرینێن ئۆجالانێ فیلۆسۆفێ ئاخر زەمانن
ئەڤ برادەرە ژبیر دکەت بێژیته ئۆجالانی قه‌ی تو دزانی نوكه خودانێن گەلەك کۆمپانیێن مەزن ئه‌وێن ب تنێ ئارمانجا وان زێدەکرنا قازانجێ، ژنن و ئەو ژ بۆ قازانجێ بەرھەڤ نینن پابه‌ندی رێككه‌فتنا ناڤده‌وله‌تی یا ژینگەھـ پارێزیێ ببن!
ئەرێ ئەڤە ھەر ژینگەھـ پارێزن جەنابێ ئۆجالان؟ دا هێشتا نەرینێن ئۆجالانی شرۆڤە بکه‌ین:
هه‌گەر ئەم وەها هزر بكه‌ین كو توخمێ ژنێ خوه‌زا پارێزە و توخمێ زەلامی خوەزا تێکدەرە، دبیت بۆ ھەوە ئەڤ پرسە دروست ببیت، ئەرێ هه‌گەر وه‌ها بیت، چارەسەری چی یە؟
ل گۆری ئۆجالانی چاره‌سه‌ری ل ده‌ڤ مه نینه، ژ بلی کو ژنان ژ زەلامان ژ هه‌ڤ جودا بکه‌ین دا کو مە ژینگەھەکە پاك هه‌بیت!
لێ ھەلبەت ئەڤ ژینگەھا پاك یا ژنان جڤاك نینە، ژ بەر کو د جڤاکی دا زەلامێن چەپەل ئه‌وێن خوەزای پیس دکەن یێ د ناڤ دا ھەین!
ژ بۆ کو ژن ژینگەھێ پاك راگریت پێدڤییه ڤەدەر بن یان ل ئاسمانان بژین یان ژی خۆ د پەرستگەھان ڤە ئاسێ بکه‌ن و ببنه راھیبە و دووری زەلامان بژین!
ئەڤە ژنولۆژییا ئۆجەلانی یه د بیاڤێ سێکس و ئەشقێ دا!
ئۆجالان دبێژیت: رەگەزێ نێر رۆلێ سەرەکی دایە سێکسی، قه‌ی جۆتبوون و گوھنێلیێ د ناڤا گیانەوەران دا یا سنۆردارە و گرێدایی دەمەکێ سالێ یە، لێ ل جەم زەلامان جۆتبوون ب وێ قه‌ده‌رێ یه کو وەختە ببیت 24 ده‌مژمێر، سێکس ب خۆ جۆرەکە ژ مرنێ، زەلام گه‌له‌ك درندە و دلرەق و بێ رەوشتە و یێ بێ بارە ژ ئەشقێ.
ئەڤ نەرینه یێن فیلۆسۆفێ ئاخر زەمانن، باشە هه‌گەر ئەڤ نەرینە کەسەکێ دی بەیان کربان ما مە نەدگۆت ئەڤ کەسه شێت و ده‌به‌نگه!
ل گۆری ئۆجالانی گرێدانا ھەر پەیوەندییەکێ جۆرەکە ژ خیانەتێ و پێدڤییه ژن و زەلامێن گەریلا وەک راستییەکا ئەخلاقی ب په‌ژرین کو بێی رزگاری و ئازادی نەشێن تەماشەی هەڤدو ژی بکه‌ن.
ببینن ئۆجالان پەیوەندییا د ناڤبەرا ژن و زەلامان دا د سەربازگەھەکێ دا چارچووڤە کرینە و ژن وه‌ها خەساندینە خۆ نەشێن ل هەڤدو ژی بنێرن و ئەگەر ژنەکێ گۆت من حەز ل سەر پەیوەندییەکێ ھەیە ل وی دەمێ دێ بیته خیانەتکار و دێ هێته سزادان، ئەڤ رووتکرنا ژنێ ژ ئەشق و سێکس و ڤیانێ و پەیوەندییا دگەل زەلامی د چ سەردەمێن دیرۆکی دا نەبوویە، ژبلی وان ژنێن دبنه رەبەن و ل پەرستگەھێن ئۆلێ كرستیانان دا، یا ئۆجالان ناڤ لێ کری زانستێ ژنناسی پێکهاتییە ژ بێ بەشکرنا ژنێ ژ مافێن ده‌ستپێكی و ڤەقەتیانەکە ژ جڤاکێ، لێ هه‌گەر ببنه گەریلا، کۆلە و سۆتەمەنیێن ئایدۆلۆژییا پەکەکێ ژ بۆ ئۆجالان کێشە نینه.
بۆ زانین سێکس و جۆتبوون و ئەشق شێوه‌یا ده‌ستپێكێ یا ژیانا ژن و زەلامان بوویە و ئەڤه بوویە ئه‌گه‌رێ درستبوونا خێزانێ و جڤاکی، ھەلبەت ئەڤه د قۆناغێن دیرۆکا مروڤاتیێ دا ب چەندین فۆرم و شیوازێن جودا ده‌ركه‌تینه و ل ده‌ڤ ھەر جڤاک و خێلەکێ ب ئاوایەکێ جودا، خێل ھەبووینە زەواجا ب کۆم د ناڤ دا بەربەلاڤ، فرە مێری و فرە ژنی ھەبوویە، ھەتا گه‌هشتییه نوكه کو خێزانا یەک ژن و مێری ل دنیایێ میناکا بلندە، مەرەم پێ ئەڤەیه ئاوایێ ئۆجالان دخوازیت نە ل دیرۆکێ و نەژی نوكه و نەژی ل پاشه‌رۆژێ دروست دبیت، ژ بەر کو قەدەخەکرنا سێکس و ئەشقێ د ژیانێ دا مەحالە!
پرسیار گەر ئەڤ مۆدێلا ئۆجالان دخوازیت نه‌چێبیت، ئەرێ بۆچی دوپاتیێ ل سەر دکەت؟
-دبیت بەرسڤ پڕ ئاسان و روھن و ئاشکر بیت، ئەرێ هه‌گەر ئۆجالانی د نڤیسێن خۆ دا پرۆپاگندا ژنا خوەداوەند و فریشتە و پەریا دەریا نەکەت، ما ھوون دبێژن کچەکا 14 سالی د بھارا ژیێ خۆ دا ب هزرا ئۆجالانی سەرمەست ببیت؟
گەر پێ سەرمەست نه‌بیت چەوا دێ بیته سۆتەمەنیا ئایدۆلۆژییا ئۆجالانی؟
هەڤالنۆ هوون بەرسڤێ بده‌ن؟
